Loxem: Би өөрөө ичээгүй байхад миний өмнөөс олон хүн ичиж байна

Ногоон цамцтай, хар нүдний шилтэй охин гэнэтхэн гарч ирээд, “flexing on your bitch” хэмээн дууллаа. Хараалын болон ёс бус үг хэллэг нэлээдгүй агуулагдсан эл дууг 15 настай охин ийнхүү зохиож, клипжүүлсэн нь нийгмийн сүлжээнд шүүмжлэл дагуулав. Түүнийг Б.Насанжаргал гэдэг, ЕБС-ийн 10-р ангийн сурагч. Хоёр жилийн турш өөрийн гэсэн дуу гаргахыг мөрөөдөж, оролдсоны эцэст зорилгодоо хүрсэн нь тэр.

Хүүхэд насанд алдаж, онох зүйл бишгүй. Гэвч тэмүүлэлтэй, зоригтой, хөдөлмөрч бас шинэлэг байж чадсан учир түүний хувь ертөнцийг уншигчдад зөвөөр таниулах үүднээс LOXEM буюу Б.Насанжаргалыг ярилцлагын буландаа урилаа.

ЗААВАЛ ХАЙР ДУУЛЖ ЭХЛЭХ АЛБАГҮЙ ШҮҮ ДЭЭ

-Тэмцээнд оролцож түрүүлээд студид дуу бичүүлэх эрхээр шагнуулсан гэсэн. Ингэж “I’m Flexing On Your Bitch” дуу бүтэх боломж олдсон юм байна. Эндээс яриагаа эхэлье?

-Hanging Gang хамтлаг тоглолт хийх үеэрээ “Freestyle” тэмцээн зохион байгуулсан. Тоглолтынхоо сүүл хэсэгт үзэгчдээс сайн дурын оролцогч гаргаж ирэн, хооронд нь өрсөлдүүлсэн юм. Ийм тэмцээн болно гэсэн урьдчилсан мэдээг авсан байсан учир тодорхой хэмжээнд өөрийгөө бэлдсэн байлаа. Ялагчийг алга ташилтаар тодруулснаар би шалгарч, дуу бичүүлэх эрхээр шагнуулсан. Энэ эрхээ ашиглаж, “I’m Flexing On Your Bitch” дуугаа бичүүлсэн. Харин клипийг хоёр сарын турш хоолны мөнгөө цуглуулж байгаад босгосон зардлаар хийсэн.

-Дууныхаа үгийг өөрөө бичсэн гэж дуулсан. Ямар нэг утга илэрхийлэхийг зорьсон уу? “...Надаас битгий ай, амьд хүнээс ай...”. Ийм үгс гарах болсон сэдэл хаанаас эхтэй вэ?

-Эхний дөрвөн такт буюу мөрийг сүнслэг өнгө аяс оруулах зорилгоор бичсэн. Тухайн үед Халловины баярт зориулж, нэг тийм чөтгөр дуулаад байгаа мэт дууны үг зохиохоор оролдож байсан юм. Үүний дагуу эхний дөрвөн мөр бүтсэн. Бусад мөрүүдийн хувьд нэг их утга агуулга илэрхийлэхийг зориогүй. Толгойдоо орсон болгоныг тэмдэглэж явсаар нийлүүлсэн. Ерөнхий цогцоор нь авч үзвэл ямар нэг утга байхгүй.

“15 настай охин ийм хүнд үгтэй дуу зохиож болдог юм уу” гэсэн хандлага их байна. Энэ миний анхны уран бүтээл, мэдээж алдаа оноо зөндөө бий. Заавал хайр дуулж эхлэх албагүй шүү дээ. Монголын эмэгтэй репперүүд уян зөөлөн, хайр дуулсан хүмүүс байдаг. Иймээс шинэлэг байя л гэж бодсоноос эхтэй.

-Хараалын үг цөөнгүй бий. Үүнд хүмүүс шүүмжлэлтэй хандаж байгаа. Бичиж байхдаа ийм хандлага ирнэ гэдгийг урьдчилаад төсөөлсөн байв уу? Насанд хүрээгүй хүүхэд хараалын үгтэй дуу зохиож, үүнийгээ олон нийтийн сүлжээнд байршуулах нь хэр ёс зүйтэй вэ?

-“Хүмүүс юу гэж бодох бол, яаж хүлээж авах бол” гэсэн айдсаар өөрийгөө хорьж, бариад дэмий шүү дээ. Өөрийнхөө юу дуулмаар байна, хүмүүст ямар мэдрэмж өгмөөр байна түүнийгээ бүтээх хэрэгтэй. Ямар нэг зүйлд хавчигдаж, баригдах шаардлагагүй гэж боддог. Гадаад, дэлхийн хэмжээний дуунуудад эмэгтэйчүүд нь, “Bitch, bitch” гээд дуулаад л байдаг. Орчуулаад үзвэл минийх дэргэд нь маш эвтэйхэн харагдана. Цаашид хараалын үггүй дуу гаргаж ч болно шүү дээ. Гаж, ёс бус зүйл агуулагдав гэсэн тайлбараа хийгээд л явдаг, хип хоп урсгал.

-Тийм тайлбарыг дуун дээрээ хийсэн үү?

-Постерийнхоо нэг буланд биччихсэн байгаа.

-Дуу хийхдээ насанд хүрсэн хүмүүсээс зөвлөгөө авсан уу?

-Тэгсэн. Дуу хийх гэж байгаа тухайгаа ойр дотны хүмүүстээ хэлж, “Эмэгтэй хүн заавал уян зөөлөн, smooth дуу дуулах албатай юм уу?” гэж асуусан. Тэгэхэд, “Тийм шүү дээ, эмэгтэй хүн заавал зөөлөн, уяхан байх хэрэгтэй” гэдэг хариултыг өгч байсан. Харин нэг хүндэлж явдаг реппер эгч маань үүнээс гажиж, юу хиймээр байна түүнийгээ чөлөөтэй гаргах хэрэгтэй, чамайг сонсох нь сонсож, сонсохгүй нь сонсохгүй гэж хэлсэн. Энэ зөвлөгөө надад үнэтэй тусаж, хүлээж авсан даа.

НАМАЙГ МИНИЙ ДУУНЫ ҮГЭЭР ДҮГНЭЖ, ЦОЛЛОЖ БОЛОХГҮЙ ШҮҮ ДЭЭ

-Хип хоп, реп урсгалын дуу хийх хүсэл хэзээнээс төрж эхэлсэн бэ?

-2017 оны үеэс энэ урсгалын нэлээн үнэнч сонсогч болсон. Ийм тэмцээн, уралдаан болдог юм байна. Реп гэж ийм зүйл байдаг юм байна. Үг холболт хийнэ гэж үүнийг хэлдэг юм байна гэж ойлгож эхэлсэн. Мөн Wolfizm-ийг тэр үед идэвхтэй сонсох болж, дууных нь үг холболтууд таалагдаж эхэлсэн. “Яг ийм хүн болмоор байна” гэдэг хүсэл төрсөн. Ингээд үг бичих гээд оролдтол болж өгөөгүй, сонин юм билээ. “Амаргүй зүйл байдаг юм байна” гэж бодсон ч, бууж өгөхгүй мөрөөдөж явсаар энэ хүсэл биеллээ.

-Монголын ямар репперүүдийг сонсож, үлгэр дууриал авч байна?

-Зарим хүмүүс намуухан хөгжим сонсоод таашаал авдаг. Миний хувьд зүгээр сууж байхад гэнэт босоод бүжиглэмээр санагдуулдаг хөгжим сонсох дуртай. Ийм хэмнэлтэй дуунуудыг ихэвчлэн сонсдог гэсэн үг. Юуны түрүүнд Wolfizm-ийн маш үнэнч сонсогч, бүх дууг нь сонсоно. Харин бусад репперүүдээс таалагдсан дуугаа л сонсдог. Loce, Pacrap, Ginjin, Big Gee, Thunder, Don Dior гээд олон.

-Ийм хөгжим сонсдогт нь гэр бүлийн зүгээс яаж ханддаг вэ? Гэр бүлээ товч танилцуулаач?

-Би эхээс гурвуулаа, өөрөө дундах охин нь. Аав маань намайг дөрөвдүгээр ангид байхад нас барсан. Хойт аавтай. Эгч маань тусдаа гарсан. Дүүтэйгээ, гэр бүлтэйгээ хамт амьдардаг. Дүү гарчихсан болохоор аав, ээжтэй нэг их зүйлээ ярьж, хуваалцах боломж багассан. Тодорхой хэмжээгээр дотно байдаг.

Гэр бүл маань миний сонирхлыг их хүндэлдэг ээ.

-Дуу хийж байгаагаа аав, ээж хоёртоо хэлж байсан уу?

-Хэлсэн. Дээр дурьдсан тэмцээнд оролцож, дуу бичүүлэх эрх авсан тухайгаа дуулгасан. Намайг нэг их дуу гаргаад явна, чадна гэж бодоогүй байх. Гэхдээ хийснийг минь хараад надад итгэж байгаа болов уу. Үүнээс өмнө дуу гаргаж үзээгүй, хоолойгоо ч бичүүлж үзээгүй хүн явлаа.

-“Loxem” сошиалд нэлээдгүй ярианы сэдэв болж байна. Дийлэнх хэсэг нь шүүмжилж, тэр дотроо муучлах шиг. Эдгээрийг яаж хүлээж авч байна вэ?

-Харин тийм. Meme хүртэл хийгээд л, бөөн юм болж байна. Гэхдээ би эднийг хараад нэг их эмзэглэж хүлээж аваагүй ээ. “Олигтой юм бич л дээ, та нар” гэсэн хариу өгчихөөд л, инээгээд сууж байгаа. Өөрийнхөө өдөр тутам хийх ёстой зүйлсийг хийгээд л явж байна. “Чамайг ингээд биччихсэн байна” гээд чатаар их орж ирэх юм. “Аймаар” лайтай. Байн байн залгаж тоглоод л, “Loxem мөн үү?” гэнэ, төвөгтэй л юм.

Шүүмжилж байгаа хүмүүс өөрсдөө зохиолын дуунд дуртай, эсвэл намуухан, зөөлөн хөгжим сонсдог байгаа ч юм билүү? Өөрсдийн сонирхол, үзэл бодлоосоо шалтгаалж л ийм хандлагууд гаргаж байгаа. Тэдний буруу биш гэж боддог учир хүндээр тусгаж авдаггүй. Дэлхийн хэмжээнд авч үзвэл миний дуу сүртэй юм биш ш дээ.

-“Ийм жаахан охин хараалын үгтэй дуу хийж болох уу?” гэсэн хандлага байна?

-Намайг миний дууны үгээр дүгнэж, цоллож болохгүй шүү дээ. Хэдий хараалын үгтэй дуу дуулдаг ч, цаанаа хүмүүжилтэй, сайн үйлсийн аян зохион байгуулаад явдаг хүн байхыг үгүйсгэхгүй. Тэгэхээр дууны үгэнд анхаарал хандуулаад ямар ч хэрэггүй.

ЮУГ НЬ АВЧ, ЮУГ НЬ ХАЯХ ВЭ ГЭДЭГ СОНГОЛТ ШИЙДВЭРИЙН ХЭРЭГ

-Сошиалд шүүмжлүүлж байгааг нь аав, ээж хоёр нь харсан байх. Юу гэж байх юм?

-Ээж нэг удаа, “Энэ хүмүүс ингэж бичээд байх юм. Миний охин нэг бол болих юм уу?” гэж хэлж байсан санагдаж байна. Нэгэнт хийчихсэн, цааш нь үргэлжлүүлнэ гэсэн зорилготой байгаа хүн юу гэж ийм зүйлс дээр шантарч, мөрөөдлөө орхих вэ дээ. Муулах, муулуулах зүйл байж л байдаг шүү дээ.

Анхнаасаа ийм дуу хийж байгаа гэдгээ, процессоо байнга ярьж явсан учир ээж нэг их сүртэй хүлээж аваагүй. Сюрприз барьсан биш.

-Дуу цацагдсанаас хойш үе тэнгийнхний нь харилцаа өөрчлөгдөж байна уу?

-Өө, найз байсан хүмүүс найз байхаа болиод л. “Би чамаас ичээд байна” энэ тэр гээд. Би өөрөө ичээгүй байхад өмнөөс ичээд ч байх шиг. Харин сайн найзуудын хувьд, “Ийм юман дээр эморохгүй биз дээ, дараачийнх дээрээ бүр алаад хаяна биз дээ” гэж дэмжиж урамшуулж байна. Бусад “Найз аа, найз аа” гээд гүйж байсан хүмүүс одоо тоохоо ч больж. Энэ нэг бодлын сайн зүйл байх.

Ангийн багш, “Танай хүүхэд ийм дуу гаргачихсан байна” гэж ээж рүү ярьсан байна билээ. Клипэнд тоглосон нэг охины ээж хүртэл залгасан гэсэн. Хэрвээ хүмүүс ингэж муулаагүй байсан бол эд нар зүв зүгээр, байдгаараа байж л байх байсан шд. Анх зүгээр эхэлчхээд, одоо ердөө хүмүүсийн хандлагаас шалтгаалж зан нь хувирч харагдах. Ер нь муулуулахгүй явна гэж юу байх вэ дээ.

-Энгийн амьдралдаа Б.Насанжаргал гэж яг ямархуу охин байдаг юм бэ?

-Байнга хараал хэлээд байдаггүй. Стресстсэн үедээ ганц, нэг хэлэх зүйл бий.

Миний үеийн зарим охид хөнгөхөн бодолтой байдаг ш дээ. 5 мянган төгрөг байвал хямдхан ээмэг аваад зүүчихье гэж боддог. Харин би байгаа 5 мянган төгрөгөө цааш хурааж өсгөвөл юу авч болох талаар боддог. Юманд ул суурьтай ханддаг, жижигхэн бодолтой биш гэж хэлмээр юм уу. Тэвчээртэй, зоригтой...Би хүмүүжилгүй охин биш. “За” гэсэн бол “ёо”-гүй. Багадаа айлд очоод эд зүйлсэд нь дураараа хүрдэггүй, “Идэж болно” гэснийг нь тавгийн ширээнээс авдаг байсан ийм л охин.

-Үеийн болон түүнээс дооших хүүхдүүдэд үзүүлэх үлгэр дууриалаа бодсон уу?

-Хүүхдүүд миний дууг сонсож авах ёстой кайфаа авах хэрэгтэй. Үүнээс цааш хараалын, бүдүүлэг үг хэллэгийг нь өөртөө тусгаж авч, хэвшил болгож байгаа бол өөрсдийнх нь ухамсрын асуудал. Юмнаас юуг нь авч, юуг нь хаях вэ гэдэг сонголт, шийдвэрийн хэрэг.

-Ирээдүйд реп-артист болно гэж боддог уу? Ажил мэргэжлийн хувьд?

-Би сэтгэлзүйч болно гэж боддог. Нэг үг хэлээд хүний үзэл бодлыг, хандлагыг өөрчилнө, шидтэнээс илүүтэй нөлөөлж, тусална гэдэг сайхан зүйл. Сэтгэлзүйчийнхээ хажуугаар уран бүтээлээ хийгээд л явна гэж боддог.

-Ярилцсанд баярлалаа.

ГЭРЭЛ ЗУРГИЙГ: С.БОРГИЛ

Энэ мэдээнд өгөх таны үнэлгээ

Хуваалцаарай Жиргээрэй