Тарвагатай андуурч хүн буудаж хөнөөсөн этгээдэд 4 жил зорчих эрхийг хязгаарлах ял оноожээ

Төв аймгийн Заамар сумын Тосон багийн нутаг дэвсгэрт тарвагатай андууран хүн буудаж хөнөөсөн хэрэг гарсан байна.

Тодруулбал, Тосон багийн Гуа ам гэх газарт сангийн анги 76156 дугаартай, замаг 156 дугаартай 7х64 мм-ийн калибртай ZKK-600 загварын галт зэвсгээр Б.Ө-ын амь насыг хохироожээ.

Уг гэмт хэргийн дуудлага өнгөрсөн оны долоодугаар сарын 14-ний өдөр Төв аймаг дахь цагдаагийн газарт ирсэн бөгөөд дуудлагын дагуу очиж шалгахад толгой хэсэгтээ хоёр удаа буудуулсан байсан аж.

Шүүгдэгч шүүхэд өгсөн мэдүүлэгтээ "11 цагийн үед тарвага хараад ирье гээд яваад Хоньчийн нуруунд ирээд зам өгсөөд тарвага хараад явж байтал дэрстэй дош дотор нэг юм хөдлөөд байхаар нь буугаа гаргаж ирээд дурангаар нь харахад 2 хуруу хүрэхгүй нарийн тарваганы толгой шиг зүйл нэг далдраад нэг ил гараад бөртөлзөөд байсан. Тарвага байна гэж бодоод нүхэндээ орохоос нь өмнө буудъя гэж бодоод машин дотроосоо буудсан.

Ингээд машинтайгаа ойртоод хүрээд иртэл хүн байгаа нь харагдсан тэгээд л сандраад машинаа зогсоогоод гүйж очиж хараад яахаа мэдэхгүй хэсэг балмагдаад тусламж дуудахаар ойр хавиараа сүлжээ хайж давхиад олдоогүй. Нөгөө талын уулан дээр мал хариулж яваа морьтой хүн харагдахаар нь хүрч очоод болсон зүйлээ хэлэхэд би гэртээ харьж хэлж өгнө гээд би эргээд давхиж байтал хар өнгийн приус машинтай хүмүүс тааралдаад би үнэн учраа хэлээд тусламж гуйтал надтай хамт очиж үзээд бидэнтэй хамт явж байсан хүн байна гээд таниад эмнэлэг цагдаа дуудахаар явсан. Би эмнэлэг цагдаа иртэл байрандаа хэргийн газартаа хүлээгээд байж байсан” хэмээсэн байна.

Улмаар гэрч нарын мэдүүлэ, шүүх шинжилгээний дүгнэлт зэргээр шүүгдэгч М-ийг тус хэргийг үйлдсэн болох нь тогтоогдсон юм.

Иймд шүүхээс дөрвөн жилийн хугацаагаар “эрх бүхий байгууллагын хяналтад өөрийн оршин суугаа газар болох Заамар сумын нутаг дэвсгэрээс гарахыг хориглох” зорчих эрхийг хязгаарлах ял шийтгэсэн байна.

О.УНДРАЛ

Энэ мэдээнд өгөх таны үнэлгээ

Хуваалцаарай Жиргээрэй