ЗӨСҮТ-ийн захирал байхдаа хуурамч гэрээгээр төсвийн мөнгө шамшигдуулсан Н.Цогбадрах шүүхээс ял сонсов

Н.Цогбадрах ЗӨСҮТ-ийн захирлаар ажиллаж байхдаа хуурамчаар "ажил гүйцэтгүүлэх" гэрээ байгуулан, өөрөө баталж улсын төсвөөс 18 сая төгрөгөөр чиргүүл худалдан авсан байна. Ингэхдээ өөртөө 10 сая төгрөгийг бэлнээр авч, албан тушаалын давуу байдал бий болгосон нь тогтоогджээ.

Хэргийг эхнээс нь өгүүлье.

-Н.Цогбадрах гэж хэн бэ-

АУДС-ийн эмчилгээний факультетыг 1989 онд хүний их эмч мэргэжлээр, Удирдлагын академийг 2004 онд Нийгмийн удирдлагын менежерээр төгссөн. Үндсэн мэргэжил нь Эх барих эмэгтэйчүүд, уламжлалтын эмч бөгөөд 2013 онд ЭМШИУС-д докторын зэрэг хамгаалсан.

Ажилласан байдлын хувьд,

• 1989-1999 онд Өвөрхангай аймгийн Уянга сумын хүн эмнэлгийн эрхлэгч эмч,
• 1999-2004 онд Чингэлтэй дүүргийн Эрүүл мэндийн нэгдлийн эмчилгээ эрхэлсэн орлогч,
• 2004-2008 Чингэлтэй дүүргийн Хүүхдийн сувиллын дарга,
• 2008-2015 Нийслэлийн эрүүл мэндийн газрын Эмнэлгийн тусламжийн хэлтсийн даргын албыг хашиж,
• 2015 оноос Зоонозын өвчин судлалын үндэсний төвийн ерөнхий захирлаар есөн жил ажилласан юм.

-Хэрэг үйлдээгүй гэж мэлзсэн ч нотлогдож нийтийн албанд томилогдох эрхийг 2 жилээр хасаж, 5.4 саяар торгож, өөрт авсан 10 сая төгрөгийг ЗӨСҮТ-д олгуулахаар шийдвэрлэв-

Улмаар ажиллах байх хугацаандаа буюу 2022 оны Зооноз өвчин судлалын үндэсний төвийн төсөвт тусгагдаагүй ажил болох байгууллагын ажилчдын ажиллах орчин нөхцөлийг сайжруулах нэрийдлээр нэр бүхийн компанитай тухайн оны 12 дугаар сарын 16-ны өдөр 18.895.000 төгрөгийн үнэ бүхий тусгай тоноглолтой лабораторийг чиргүүлийн хамтаар хийж гүйцэтгэх тухай гэрээг байгуулсан аж.

Энд дурдагдаад буй чиргүүл 8-9 сая төгрөгөөр бүтсэн, үлдэгдэл мөнгө болох 10 сая төгрөгийн өөрийн жолоочоор дамжуулан бэлнээр Н.Цогбадрах авсан байна. Үүнийг гэрчүүд нотолсон аж.

Хариуд Н.Цогбадрах өөрийгөө өмгөөлөн шүүхэд "Олон нийтэд халдвар тараахаас сэргийлж лаборатори ажилчдаа зөөх, тандалт судалгаа явуулахдаа ажилтнуудынхаа хачиг бүүрэгт хазуулахаас эхлээд галзуу ан амьтан, араатан жигүүртний эрсдэлд өртөх, хүйтэн бороо, цас шуургатай үед майхан нь хийсээд явчихдаг, гэрийн бүрээс нь урагдчихдаг, гэр нь нурчихдаг, үүнээс болоод халдварын эрсдэлд өртөх асуудал жил бүхэн яригддаг байсан. Энэ асуудлыг шийдэх нь зүйтэй гэсэн үндэслэлээр материалуудыг бүрдүүлж жил бүхэн хөөцөлдөж ажиллаж байсан боловч асуудал шийдэгдэж байгаагүй. Мөнхсайхан сайдад энэ асуудлыг тавихад “шийдвэрлэж өгье, 2  автобус авч өгье” гээд үнийн судалгаа хийгээд байж байтал корона вирус гараад энэ асуудал шийдэгдээгүй.

Би энэ байгууллагыг 9 жил удирдсаны хувьд чиргүүл авч, байгууллагад хэрэгцээтэй зүйлийг нь хямд үнээр авчихлаа гэж баяртай байсан. Харин ямар зардлаас гарсан, ямар зүйлүүд зөрчигдсөн талаар хайнга хандаж хянаж чадаагүй нь миний буруу. Бид хэмнэсэн төсвөө тухайн жилдээ хураалгадаг байсан. Тухайн жил бид нар үндсэн төсвөөсөө 127 сая төгрөгийг буцаан татуулсан. Энэ 18 саяыг нэмбэл 140 орчим сая төгрөг буцаан татагдах гэж байсан болохоор байгууллагадаа хэрэгцээтэй юм авчихъя гэж бодсон. Энийг гүйцэтгэх явцдаа хайнга байж ийм эрх зүйн зөрчилд орсон байгаа. Миний хувьд энэ дундаас мөнгө төгрөг авах, өөртөө давуу байдал үүсгэх юм уу, бусдад давуу байдал бий болгох санаа, зорилго огт байгаагүй" хэмээн мэдүүлсэн байна.

Харин мөрдлөг болоод гэрч нарын мэдүүлгээр албан тушаалаа урвуулан ашиглаж, өөртөө давуу байдал бий болгосон нь баримтаар ил болж, прокуророос Эрүүгийн хуулийн 22.1 дэх хэсэгт заасан зүйл ангиар яллаж шүүхэд шилжүүлсэн байдаг.

Улмаар шүүх тус хэргийг хянан хэлэлцэн шүүгдэгчид нийтийн албанд томилогдох эрхийг 2 /хоёр/ жилийн хугацаагаар хасаж, 5.4 сая төгрөгөөр торгох ял оногдуулсан байна. Үүнээс гадна өөрт давуу байдлаар авсан 10 сая төгрөгийг ЗӨСҮТ-д олгуулахаар шийдвэрлэжээ.

-Н.Цогбадрах болон түүнтэй хэрэгт холбогдож байсан одоогийн ЗӨСҮТ-ийн захирал Б.Амгаланбаярын ХОМ-той танилц-

Дээрх хэргээс гадна 2023 онд дэд захирлын хамтаар эрх мэдэл, албан тушаалын байдлаа урвуулан ашиглаж, үндэслэлгүй хөрөнгөжсөн, бусдад давуу байдал олгосон гэх үндэслэлээр АТГ-т шалгагдаж байсан.

Тодруулбал, Н.Цогбадрахыг цар тахлын үеэр ариутгал халдваргүйжилтийг өөрийн болон ойр тойрны хүмүүсийнхээ хамаарал бүхий компаниар хийлгэж, хөрөнгөжсөн байж болзошгүйгээр, мөн устгалд оруулах тарвагыг шамшигдуулсан, нэр бүхий эрх мэдэлтнүүдэд бэлэглэж, ашиг хонжоо олдог, хувьдаа завшдаг байж болзошгүйгээр шалгаж, өрөөнд нь нэгжлэг хийж байсан удаатай. Түүнтэй хамт шалгагдсан хүн болох Б.Амгаланбаяр одоо ЗӨСҮТ-ийн захирлаар ажиллаж байна.

Н.Цогбадрах нь хамгийн сүүлд буюу 2022 онд АТГ-д мэдүүлсэн хөрөнгө орлогын мэдүүлэгтээ

• Нийт орлого - 31 сая
• Гэр бүлийн орлого - 71 сая /2019 оноос 31 сая төгрөгөөр өссөн дүн/
• Нийтийн орон сууц 1, зуслангийн байшин 1, авто граш 1 - нийт үнэлгээ нь 1 тэрбум төгрөг
• Toyota Land 200 автомашинтай - 95 сая төгрөг
• 78 хоньтой - 11 сая
• 30 сая төгрөгөөр үнэлэгдэх газартай
• 15 саяын үнэт эдлэлтэй
• 18 саяын хадгаламжтай
• 690 сая төгрөгийн зээлтэй хэмээн мэдүүлсэн байна.

Харин түүнтэй нэг хэргээр АТГ-д шалгагдаж, өдгөө суудалд нь суугаад буй Б.Амгаланбаярын хувьд 2017 онд тус төвийн албаны даргаар томилогдож, 2019 онд дэд захирал болон дэвшиж, 2023 онд захирлаар томилогдсон байдаг.

Хамгийн сүүлд буюу 2023 оны ХОМ-доо

• Нийт орлого - 25 сая /2019 оноос 11 сая төгрөгөөр өссөн/
• Гэр бүлийн орлого 82 сая - /2019 оноос 67 саяар өссөн/
• Нийтийн орон сууц 2, дуусаагүй нэг барилгатай - 355 сая /2019 оноос 280 саяар өссөн/
• Суудлын жижиг машин, Lexus, HS 250- 1, Суудлын жижиг машин,Lexus, RX 400- 1- нийт өртөг нь 51 сая /2019 оноос 34 саяар өссөн/
• Ямаа-20, Адуу-10 - 12 сая төгрөг /2019 оноос 5 сая төгрөгөөр өссөн/
• Эзэмших-500м2-2, Эзэмших-699м2-1, Эзэмших-700м2-1 гэх гурван газартай - 47 сая төгрөгөөр үнэлэгддэг / 2019 оноос 41.5 саяар өссөн/
• Үнэт эдлэл - 15 сая
• Хадгаламж - 3.7 сая
• Авлага - 85 сая
• Зээл - 179 сая хэмээн мэдүүлсэн байна.

Энэ мэдээнд өгөх таны үнэлгээ

Хуваалцаарай Жиргээрэй