“Онтрэ”-гийн асуудал бужигнаж байхад “Рио Тинто”-гийн захирал албан тушаалаа өгөхөөр болов

Долоо хоногийн өмнө “Онтрэ”-гийн зүгээс “Оюу Толгой” руу “Жавхлант” ордын лицензийн 80 хувийг шилжүүлсэн. Харин дараа нь “Шивээ толгой”-н лицензийг шилжүүлэх процесс явагдана.

Улмаар дээрх хоёр ордын лицензийн эзэшилтэй холбоотойгоор Монголын төрийн хувь хэмжээ яригдах асуудлыг УИХ-ын байнгын хороогоор хэлэлцэж, уг асуудлыг Засгийн газрыг яаравчлуулах шаардлага бий талаар салбарын сайд нь хэлж байсан билээ.

“Рио Тинто”-гийн зүгээс “Оюу Толгой”-н хөрөнгө оруулалтын гэрээнд “Онтрэ”-гийн эзэмшлийн хоёр лицензийн асуудлыг тусгасан гэж тайлбарладаг ч үнэндээ ганцхан битүү заалт бий. Үүгээр Засгийн газрын эзэмших 34 хувийн агуулгыг зохицуулах боломжгүй.

Иймээс тус хоёр ордын лиценз дээр шинээр Хөрөнгө оруулалтын гэрээний асуудал яригдах уу, хуучин гэрээнд заалтаар нэмж тусгах уу гэдэг агуулга яригдаж байгаа.

Засгийн газар шийдэл олох гэсээр байтал үндсэндээ дээр хоёр лиценз “Оюу Толгой” руу бүрэн шилжчихэж ч магадгүй харагдаж буй.

Ийм асуудал хөвөрч байх зуурт “Рио Тинто” компанийн Гүйцэтгэх захирал Якоб Стаусхолм энэ онд албан тушаалаа өгөхөөр болсон талаар албан ёсны мэдэгдэл гаргажээ. “Оюу Толгой”-н гүний уурхайн төслийг эхлүүлж байсан, одоогийн үүсээд байгаа асуудлыг нарийн мэдэж байгаа удирдлага нь хэрвээ солигдвол Монголын талаас удирдлагатай асуудлыг дахиад эхнээс нь ярих нөхцөл үүснэ гэсэн үг.

ЗГХЭГ-ын дарга Н.Учрал дээрх асуудлыг дүгнэн хэлэлцэж, нэгтгэх ажлын хэсгийг ахалж байгаа. Гэтэл нөгөө талд засаг хөдөлгөөнд орж эхэлснээр “Онтрэ” дээрх хоёр лицензийн асуудлыг УИХ-аар хэлэлцүүлэх нэн чухал агуулга улам бүр хойшлох дүр зураг харагдаж байна.

Өөрөөр хэлбэл биднийг ийн бужигнаж байх зуурт “Онтрэ” цаг хожиж буй. Мөн нөгөө талд одоо шилжүүлээд байгаа “Жавхлант” ордын лицензийн 80 хувийг 100 хувь болгож шилжүүлэх эсэх нь ч тодорхойгүй нөхцөлд оров.

Т.БАТСҮРЭН

Энэ мэдээнд өгөх таны үнэлгээ

Хуваалцаарай Жиргээрэй