Яармагийн түгжрэлийг арилгах төлөвлөгөөтэй ₮116 тэрбумын гүүрийг Хятад компани барина

Энэ онд орон нутгийн төсвийн хөрөнгө оруулалтаас санхүүжих хэд хэдэн томоохон төслүүд хөдөлгөөнд орсон. Үүний нэг нь Яармаг, Нисэхийн түгжрэлийг бүрэн арилгахаар төлөвлөсөн 116 тэрбум төгрөгийн өртөгтэй Наадамчдын гүүрэн байгууламж.

Ерөнхийдөө, 800 метр урт байхаар төлөвлөгдөж буй энэхүү гүүр нь Монгол Улсын анхны дүүжин буюу татлагат гүүр болно гэгдээд буй.

Гүүрийн хоёр талын зам нь зургаан эгнээтэй, хоёр талын явган хүний зам нь 2.5 м өргөнтэй байна. Харин Наадамчдын гүүрэн байгууламжийн тухайд,

• Дөрвөн урсгалтай, хажуугийн явган хүний зам 2.5 м өргөнтэй
• Гүүрэн байгууламж, авто зам нь нийт 21.9 - 32.6м өргөнтэй,
• Хоёр эгнээ туслах авто замтай,
• Гүүрийн нийт урт 820.4 у/м байхаар тусгасан байна.

Эл бүтээн байгуулалтын тендерийг энэ оны хоёрдугаар сарын 20-нд зарлаж, энэ сарын 12-ны өдөр хүртэл оролцогч компаниудаас үнийн санал хүлээн авсан. Улмаар Монголд урьд нь ажил гүйцэтгэж байсан туршлагагүй Shandong Luqiao Group Co., Ltd гэх БНХАУ-ын хөрөнгө оруулалттай компани шалгарсан байна.

• Үйл ажиллагааны чиглэл нь төмөр зам болон автозамын байгууламж барих
• Монголын Төрийн худалдан авах ажиллагааны системд /2024-10-22/-нд бүртгүүлсэн

2024 онд 8 их наяд төгрөгийн төсөвтэй Метроны тендерт үнийн санал илгээж байсан бол энэ онд дөрвөн тендерт оролцож гурваас нь хасагдсан байна. Тодруулан хэлбэл Монголд өмнө нь тендерт шалгарч, ажил гүйцэтгэж байгаагүй компани анхны дүүжин гүүрийг барихаар болсон гэсэн үг.

Энэ мэдээнд өгөх таны үнэлгээ

Хуваалцаарай Жиргээрэй