Э.Баттулга: Цаг уур орчны шинжилгээний газрын 1893 ажилтнаас 171 хүнийг цомхотгосон

Ус цаг уурын байгууллагын зарим ажилтныг цомхтгох мэдэгдэл хүргүүлсэн тухай асуудлаар Байгаль орчин, уур амьсгалын өөрчлөлтийн сайд Б.Батбаатар мэдээлэл өглөө.

"Бүтцийн өөрчлөлттэй холбоотойгоор анхан шатанд ажилладаг мэргэжилтэн, төрийн албан хаагчийг чөлөөлж байгаа. Үүнд хяналт зохион байгуулж, үнэхээр тэднийг цомхтгох нь зөв эсэхийг тогтоох ажлын хэсэг байгуулсан. УЦУОШГ-т бүтцийн өөрчлөлт хийхээр болсон" гэсэн юм. Үргэлжлүүлэн,

Цаг уур орчны шинжилгээний газрын дарга Э.Баттулга:

"Манай байгууллага 21 аймгийн 318 суманд салбар, нэгжтэй. Нийт 1893 хүн ажилладаг. Эдгээрээс нийт 171 ажилтанд цомхотгол хийсэн. Төсвийн тодотголоор манай байгуулгын төсөв 80,4 тэрбум төгрөг байсныг 77,3 тэрбум төгрөг болгож бууруулсан.

Ингэхдээ 21 аймгийн төвүүдээс санал авсан. Үүн дээр тусгай ажлын хэсэг ажилласан. Цомхотгол хийхдээ нэгдүгээрт анхан шатны ажилтны орон тоог цөөлөхгүй байх бодлого барьсан. Хоёрдугаарт удирдах албан тушаалтны тоог цөөлөх буюу нэг төв гурван дарга хэлтсийн даргатай байсныг нэг болгож цомхотгосон. Мөн бүх төвүүд адилхан бүтэцтэй байх бодлого барьсан буюу бүгд ижил бүтэцтэй байхаар зохицуулалт хийсэн. Энэ ямар нэгэн хүний тухай асуудал биш, бүтцийн тухай асуудал юм. Цаашид цаг уур орчны шинжилгээний салбар олон улсын нийтлэг жишгээр мэдээллийн технологи, хиймэл оюун ухаанд суурилж хөгжих шаардлага бий. Есдүгээр сараас бид дараагийн үеийн супер компьютерыг үйл ажиллагаанд нэвтрүүлнэ. Мөн хиймэл оюун ухаант цаг уурын сервер, программ хангамжийг үйл ажиллагаандаа нэвтрүүлнэ" гэв.

Т.ГЭРЭЛТ-ИРЭЭДҮЙ

Энэ мэдээнд өгөх таны үнэлгээ

Хуваалцаарай Жиргээрэй