Сайдын өмнө ажилтнуудаа дарамталсан Говь-Алтайн ЗДТГ-ын даргыг БОУАӨ яам ажлаас чөлөөлөхийг шаардлаа

Байгаль орчин уур амьсгалын өөрчлөлтийн сайд Б.Батбаатар энэ зун орон нутагт ажиллаж, яамныхаа үйл ажиллагаатай танилцаж буй. Энэ хүрээнд тэрбээр саяхан Говь-Алтай аймгийн байгаль орчны байгууллагуудын ажилчид болон удирдлагуудтай уулзаж, хэлэлцүүлэг хийсэн юм.

Харин тус уулзалтын үеэр ажилтнуудынхаа амыг боож, ёс зүйгүй авирласан удирдах албан тушаалтанд яаралтай хариуцлага тооцох шийдвэрийг яам гаргажээ.

Учир нь Байгаль орчин, уур амьсгалын сайд энэ сарын 14-нд Говь-Алтай аймгийн ЗДТГ, Байгаль орчны газар, Говийн их дархан цаазат газрын А, Б хэсгийн Хамгаалалтын захиргаа зэрэг байгууллагуудын удирдлага болон холбогдох албан тушаалтнуудтай уулзаж, өөрийн эрхлэх асуудлын хүрээнд 2025 оны төлөвлөгөөний хэрэгжилт болон орон нутгийн хэмжээнд тулгамдаж буй асуудал, түүнийг хэрхэн шийдвэрлэх талаар санал хүсэлт сонсон, бодлогын хэлэлцүүлэг өрнүүлсэн.

Уг уулзалт хэлэлцүүлэгт тус аймгийн ЗДТГ-ын дарга Ш.Эрдэнэбатын зүгээс “Алба хаагчдын бэлтгэсэн мэдээлэл дундуур орж загнах, тулгамдаж буй асуудал болон сайдад санал санал, хүсэлт өгөхөөр бол аймгийн удирдлагад танилцуулж байж өгөх” зэрэг шаардлага тавьжээ.

Тиймд БОУАӨ-ийн яамнаас Ш.Эрдэнэбатыг ажилтнууддаа зүй бус шаардлага тавьсан. Төрийн албаны тухай хууль болон Төрийн алба хаагчийн ёс зүйн тухай хуульд заасан ёс зүйн нийтлэг хэм хэмжээг зөрчсөн үйлдлүүдийг удаа дараа гаргасан хэмээн үзсэн байна. Улмаар түүнд хууль тогтоомжид заасан хариуцлага тооцож, энэ оны есдүгээр сарын 15-ны дотор хариу ирүүлэх шаардлагыг энэ сарын 21-нд Говь-Алтай аймгийн ЗДТГ-ын дэргэдэх ёс зүйн хороонд хүргүүлээд байгаа аж.

Энд нэр дурдагдсан Ш.Эрдэнэбат өмнө нь аймгийнхаа ИТХ-ын даргаар ажиллаж байхдаа эрх мэдлээ урвуулан ашигласан хэргээр аймгийнхаа прокуророос яллах дүгнэлт авч хэрэг нь шүүхэд шилжиж байжээ. Гэсэн ч уг хэрэг замхарч, Ш.Эрдэнэбат Говь-Алтай аймгийн ЗДТГ-ын даргаар ажиллаж эхэлсэн байгаа юм.

Мөн УИХ-ын гишүүн О.Амгаланбаатарын гар хөлүүдийн нэг тэрбээр Нарансэвстэйн боомтыг нээх санаачлагд идэвхтэй оролцдог нэгэн. Тиймээс дээрх сайдын хуралдааны үеэр дархан цаазат газрынхан тулгамдсан асуудал болох Нарансэвстэйн боомтын талаар дурдахад ёс зүйгүй авирлан амыг нь хааж, тушаан захирсан үйлдлүүдийг гаргажээ.

Ш.Эрдэнэбатад холбогдох хэрэг:  

2013 онд Авлигатай тэмцэх газраас Говь-Алтай аймгийн Иргэдийн төлөөлөгчдийн хурлын дарга асан Ш.Эрдэнэбатыг албан тушаалаа урвуулан ашигласныг тогтоож, Говь-Алтай аймгийн прокурорын газарт яллах дүгнэлт гарган, хэргийг шүүхэд шилжүүлсэн байдаг.

 Ш.Эрдэнэбат нь 2008 онд аймгийн Засаг даргийн орлогч, Эрчим хүчний зохицуулах зөвлөлийн даргаар ажиллаж байхдаа эрчим хүчний зохицуулах зөвлөлийн 2008 оны долдугаар сарын 29-ны өдөр №04 тоот тогтоолоор халаалтын үнийг үндэслэлгүйгээр 1800 төгрөг болгон нэмжээ. Энэхүү шийдвэрээс үүдэн 2008-2012 онд төсвийн 35 байгууллагад 800 сая төгрөгийн буюу онц их хэмжээний хохирол учруулсан байна. Мөн 2008 онд тус аймгийн Есөнбулаг сумын нутаг дэвсгэрт баригдсан Шүтээний өндөрлөг цогцолборын ажлыг нээлттэй тендер зарлалгүйгээр “Монгол дайвин” ХХК, “Бизнес фокус” ХХК-тай ажил гүйцэтгэх 472 сая төгрөгийн гэрээ хууль бусаар байгуулж ажил гүйцэтгүүлсэн, мөн албан тушаалын байдлаа урвуулан 2011 оны 12 дугаар сарын 20-ны өдөр аймгийн ИТХ-аас орон нутгийн төсвийн хөрөнгө 430 сая төгрөгөөр шинээр баригдахаар шийдвэрлэсэн Бугат сумын ЗДТГ-ын барилгын ажлыг хуучин барилга худалдан авах, засварлах гэж нэрийг өөрчлөн Нийтийн аж ахуйн үйлчилгээний 37 сая төгрөгөөр үнэлсэн хуучин барилгыг 100 сая төгрөгөөр худалдаж авах тухай аймгийн ИТХ-ын тогтоол гаргаж, 63 сая төгрөгийн буюу онц их хэмжээний хохирол учруулсан үндэслэлээр 2012 оны 12 дугаар сарын 11-ний өдөр Эрүүгийн хуулийн тусгай ангийн 263 дугаар зүйлийн 263.2 дахь хэсэгт зааснаар эрүүгийн хэрэг үүсгэн шалгаж хэргийн мөрдөн байцаалтын ажиллагаа дууссан тул хэргийг 2013 оны есдүгээр сарын 17-ний өдөр Говь-Алтай аймгийн прокурорын газарт яллах дүгнэлт үйлдүүлж шүүхэд шилжүүлэх санал гаргаж шилжүүлсэн юм.

Д.ЦЭГЦ

Энэ мэдээнд өгөх таны үнэлгээ

Хуваалцаарай Жиргээрэй