Б.Пүрэвдорж: Чөлөөт зах зээлийг эргүүлэн авчрахын тулд АН-ын даргад нэр дэвшлээ

Ардчилсан намын даргад нэрээ дэвшүүлэхээр УИХ-ын гишүүн Б.Пүрэвдорж хүсэлт, мөрийн хөтөлбөрөө өгөв.

Нэр дэвшигчдийг өнөөдрийн 18.00 цаг хүртэл Дотоод сонгуулийн хороо хүлээж авах юм.

Б.Пүрэвдорж хүсэлтээ өгсний дараа “Надад Ховд аймгийн Ардчилсан намын даргаар ажилласан зэрэг багагүй туршлага бий юм. 2016 оноос УИХ-ын гурван сонгууль дараалан ялж, ард түмний захиасыг хууль, бодлого болгох чиглэлд ажилласан. Эрх баригчдын буруу шийдвэртэй үргэлж тэмцэж ирсэн.

Би АН-ын дарга болбол дараах чиглэлд анхаарч ажиллана.

Нэгдүгээрт, чөлөөт зах зээлийг шинэ шатанд гаргах, баруун төвийн үзэлд нь эргэж аваачих. Монголын эдийн засагт төрийн оролцоо маш их болсон. Монголын нийт эдийн засгийн 75 хувь нь төсөв, ТӨК, дарга нарын компанитай болчихоод байгаа. Үлдсэн 25 хувь дээр л Монгол Улсын эдийн засаг явж байгаа. Ерөөсөө төвлөрсөн төлөвлөгөөт эдийн засагтай орон болсон. Хэвийн хэвшлээ дэмжсэн улс орнууд л өнөөдөр хөгжиж байгаа.

Хоёрдугаарт, хариуцлагын асуудал. Есөн жилийн турш МАН үнэмлэхүй олонхоор засаглахдаа бүхий л боломжийг хулгайллаа. Олон хулгай хийсэн. Энэ бүхэн дээрээ огт хариуцлага тооцсонгүй. Нүүрсний үнэ 400 ам.долларт хүрсэн асар боломжтой цаг үеийг хулгай болгож хувиргасан жишээтэй. Нэгэндээ хариуцлага тооцож чаддаггүй МАН бол 2028 онд АН ялалт байгуулсны дараа хариуцлагаа хүлээцгээнэ гэдгийг хэлье.

Мөн Ардчилсан намд эв нэгдэл бий болгох, хангах тал дээр анхаарна. 2012-2016 онд АН засаглахад маш их бүтээн байгуулалт хийгдсэн ч дотроо хагаралдсан, засгаа унагасан. Тийм учраас эв нэгдэлтэй болоод ир гэж ард түмэн дүн тавьж, УИХ-д есөн суудал өгсөн. Гэвч 2020, 2024 онд ч тэгж чадаагүй. Одоо үүнийг эргүүлэн авчрах цаг ирсэн” гэлээ.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй