Б.Жавхлан "Номад" бондын 631 тэрбумыг дахин шинэ бонд гаргах замаар төлнө

Засгийн газраас олон улсын зах зээлд арилжаалсан гадаад бондын үлдэгдэл энэ оны эхний хагас жилд гэхэд 2 тэрбум 528 сая ам.доллар буюу 9 их наяд 53 тэрбум төгрөг байв. Задлаад харвал,

• Номад бондын үлдэгдэл - 176.3 сая ам.доллар буюу 631 тэрбум төгрөг
• Сенчери-1 бондын үлдэгдэл - 420 сая ам.доллар буюу 1.5 их наяд төгрөг
• Сенчири-2 бондын үлдэгдэл - 558 сая ам.доллар буюу 1.9 их наяд төгрөг
• Сенчири-3 бондын үлдэгдэл 351 сая ам.доллар буюу 1.2 их наяд төгрөг
• Сенчири-4 бондын үлдэгдэл 511 сая ам.доллар буюу 1.8 их наяд төгрөг
• Сенчери-1 /31/ бондын үлдэгдэл 510 сая ам.доллар буюу 1.8 их наяд төгрөг

Дээрх бондуудын төлөлтийн эхнийх нь Номад бондын 631 тэрбум бөгөөд ирэх оны 4-р сард төлөх ёстой. Харин Засгийн газраас дээрх бондуудын өр төлбөр буюу өндөр хүүтэй бондыг эргэн төлөхийн оронд шинэ, бага хүүтэй, урт хугацаатай бонд гаргах аргыг туршсаар буй.

Энэ хүрээнд Засгийн газраас тэрбум ам.доллар хүртэлх гадаад бонд гаргах эрхийг Ерөнхий сайдад УИХ-ын тогтоолоор бий болгож өгсөн бөгөөд үүнийг ирэх оны төсөвт тусгасан.

Гэтэл нөгөө талд манай гадаад бондын хүү дэлхийн дунджаас өндөр бөгөөд бондын хүүгийн зардал өснө гэсэн үг. Бондын санхүүжилтээс үүссэн валютын урсгал нь эргээд төгрөг сулрах нэг шалтгаан бөгөөд төгрөг суларвал гадаад бондын өрийн дарамт нэмэгдэнэ гээд харилцан хамааралтай цикл үүсдэг.

Хэрвээ шинээр гаргах гадаад бондын санхүүжилтийг зөвхөн өрийг дахин санхүүжүүлэхэд зориулбал оновчтой алхам байж болох ч төсвийн алдагдлыг нөхөхөд ашиглавал төсвийн тогтвортой байдал алдагдах эрсдэл бий. Ирэх оны төсвийн төсөлд Засгийн газрын өрийн дахин санхүүжилтийн эрсдэл бага түвшинд хадгалагдаж байна гэж үнэлсэн ч өмнө нь арилжааны нөхцөлтэй гадаад үнэт цаасны хэмжээг үе шаттай бууруулж, хугацаа тулсан томоохон гадаад төлбөрийг шийдвэрлэсэн тохиолдлууд бий. Тухайлбал, 2021-2024 онд нийт 2.9 тэрбум ам.долларыг Сенчири-1, Сенчири-2, Сенчири-3 бондын хүрээнд төлсөн юм.

Засгийн газрын нийт гадаад зээлийн 29.8 хувийг хувьсах хүүтэй гадаад зээл эзэлж байна. Гадаад өрийн нийт өрд эзлэх хувь нэмэгдсэн нь Засгийн газрын өрийн зардлыг бууруулах зорилгоор Засгийн газрын санхүүжилтийн хэрэгцээг бага хүүтэй гадаад хөнгөлөлттэй зээлийн хөрөнгөөр санхүүжүүлж байгаатай холбоотой.

Засгийн газар өмнө нь шинэ бонд гаргаж, Хуралдай бондын эргэн төлөлтийн хугацааг 5 жилээр хойшлуулж байсан юм.

Ингэхээр Сангийн сайд Б.Жавхлан бондын өр төлбөрийг дахин гадаад бонд гаргаж санхүүжилт татан, бусад өр төлбөрүүдийг барагдуулах гэсэн аргаа дахин турших бөгөөд нийт өрийн хэмжээ нэмэгдэж буй нь урт хугацааны тогтвортой байдлын эрсдэл хэвээр үлдэж буйг сануулах нь зүй биз ээ.

Т.БАТСҮРЭН

Энэ мэдээнд өгөх таны үнэлгээ

Хуваалцаарай Жиргээрэй