О.Цогтгэрэлийн "сорилго": АН доторх томилгоо ба явуулах хүмүүс

Улсын дээд шүүх АН-ын даргаар О.Цогтгэрэлийг торох юмгүй бүртгэлээ. Намаа ямар ч байсан авлаа, одоо харин бүл бүтцээ хэрхэн авч явах уу. Асуудлуудаа яаж даван туулах уу гэдэг сорилт түүнд тулгарч буй.

АН-ын дарга, шинэчилсэн дүрэм сэлт Улсын дээд шүүх тойроод л явж байдаг. Тамга тэмдгээ булаацалдаж, нэгнээ элдэвчилдэг. МАН-ын хүслээр хэдэнтээ салж, нийлдэг байсан инстутиц парламентад 42 суудалтай болсноор харьцангуй хүчирхэгжсэн. Одоо тэд бас чиг дуртай үедээ МАН-ын хүслээр салж нийлээд байхгүй. Дотроо учир эвээ олох, эв түнжингээ нэгтгэх хэмжээнд асуудлаа ярихуйц боллоо.

Шинээр намаа удирдах болсон О.Цогтгэрэл эдүгээ генсекээ хэнээр томилох уу. УИХ дахь бүлгээ хэнээр удирдуулах уу гэдэг асуудал хүлээлт үүсгэв. Тэрбээр, АН-ын дарга болохоосоо өмнө Л.Гантөмөрөөр УИХ дахь намын бүлгээ удирдуулах амлалт өгсөн гэгдсэн. Нэг ёсондоо Л.Гантөмөрөөс намын даргынх нь суудлыг авч, өөрийнхөө бүлгийн даргын эрэмбийг олгохоор тохирсон гэсэн үг.

УИХ-д 42 суудалтай намын бүлгийг ахална гэдэг үндсэндээ намын даргатайгаа шууд энтэйд оччих хэлбэр. Тийм ч учраас намын дарга болсон хойноо "Би бүлгийн даргаа хамт хийчихсэн ч яахав ээ" гэх агуулга амнаасаа унагаад үзэж байна. Угаас өгөхөд ийм хайран албан суудал юм. Л.Гантөмөртөө бүлгийн даргын суудлаа өгөхгүй бол өрсөлдөх амбицтай буй Ц.Баатархүү, Ж.Батсуурь тэргүүтний уралдаан гүнзгийрнэ гэсэн үг.

Дараа нь, генсекийн асуудал. Үүн дээр УДШ дээр бүртгэлээ асуудалгүй явуулахын тулд С.Баярцогтыг томилохоор Ерөнхийлөгч У.Хүрэлсүхтэй нэг талд тохирч, нөгөө талд "Нэг монгол" фракцийн дэмжлэгийг авах зорилгоор Н.Ганибалаар үргэлжлүүлэх хэлцлийг хийсэн гэгдэж буй.

Өөрөөр хэлбэл, О.Цогтгэрэл хоёр талд хоёр генсекийн амлалт өгч, өөрөө намын дарга болоод асуудлыг шийдэхээр бизнес хүний ухаанаар "хууралт" хийсэн гэсэн үг. Энэ тоглолтоо одоо өөрөө хэрхэн дааж, аль талд нь генсекийн суудлыг өгөх үү гэдэг асуудал үүсээд байна.

Ингэж О.Цогтгэрэл УИХ дахь намын бүлгийн дарга, генсекийн суудлаа цэгцлээд, АН-ын намын хороод, үүрийн дарга нарын томилгоонд орно. Хамгийн түрүүнд тэр хотын АН-ын хорооны даргаар Х.Баттулгын хүн Т.Батцогтоос авах уу. Аваад Ч.Лодойсамбууд өгөх хувилбар яригдаж буй. Яг санал хураах мөчид гишүүдийн уур амьсгал гол нь, 2024 оны сонгуулийн өмнөхөн намд нь орж ирээд парламентад суучихсан дүрийг дэмжих үү. Хуучны уг углуургуудаасаа нэгийг сонгох уу гэдэг асуудал үүснэ.

АН доторх энэ их шинээр сэлгэн томилох асуудлын хажуугаар О.Цогтгэрэлд парламентын танхимаасаа С.Ганбаатар, Дав.Цогтбаатар нарыг УИХ-ын гишүүнээс нь түдгэлзүүлэхгүй байх бас нэг сорилт наалдчхаж байгаа. С.Ганбаатар жишээ нь аман дээрээ яаж ч попорлоо гэсэн хэрэг нь хөдлөшгүй байдлаар нотлогдон, боогдсон гэгдэж байгаа. Түүнийг яллах тогтоолдоо гарын үсэг зурахгүй байсанд АТГ-ынхан бичгээ аваад өрөөнд нь ирсэн. Үүнийг бөөн попрол болгон хувиргачих жишээтэй. Хэдий ингээд цаг аваад байж болох ч хэрэг боогдсон бол тэр тойрохоо зуруулах эрсдэлтэйгээ нүүр тулсан л гэсэн үг.

С.Ганбаатартай зэрэгцээд Дав.Цогтбаатарыг ялаа эдлэх ёстой Дээд шүүхийн шийдвэр хүлээж буй. Хуулийг янз бүрээр тайлбарлаад байгаа ч Дээд шүүхийн шийдвэрийг холбиролгүй мөрдөх учиртай зарчим, жанжин шугам гэж байна. Дав.Цогтбаатарын кэйс нь парламентаа эвдүүлэхгүй байх МАН-ынхны дотоод хагаралтай уялдсанаар түүнийг аварсаар буй. Өмнөх парламентад Х.Баттулга А.Адьяасүрэнг хамгаалсаар авч үлдсэн шиг эрх мэдлийн хэм хэмжээ хэр удаан, хаана хүртэл парламент дээр үргэлжлэх үү гэдэг өөрөө өнөө цагийн асуудал юм.

Энэ мэтээр О.Цогтгэрэлийн асуудлууд ар араасаа үргэлжлэх нь ээ. АН байртай болох ч бас түүний асуудал юм. Нэг нам нь төв талбайдаа өндөр барилга сүндэрлүүлсэн байхад АН зочид буудал хөлслөн, контор хайж яваа дээр тэр бас л ажиллаж таарна. Үүнийг тусад нь нэг бичих сэдэв юм.

Энэ мэдээнд өгөх таны үнэлгээ

Хуваалцаарай Жиргээрэй