СПОРТ

Допингийн эсрэг О.Хангай шиг тэмцье, дуу хоолойгоо нэгтгэе, бөхчүүд ээ

Монголд суудал нь өнцөгдчихсөн нэг холбоо байгаа нь МҮБХ. Б.Бат-Эрдэнэ аварга, “Гацуурт”-ын Л.Чинбат хоёрын байгуулсан, адилхан нэртэй, хоёр өөр холбооны дундах хэрүүл, Бөхийн өргөөг булаацалдсан талцал нь он удаан үргэлжилсний эцэст арайхийж намжтал жилийн жилд “шүдний өвчин” болсоор ирсэн допингийн асуудал дахиад л тэдний толгойг гашилгаж байна. Аман дээрээ “Допингтой тэмцье” хэмээдэг ч ачир дээрээ барим тавим зүйл хийдэггүй МҮБХ-ныхны эхлүүлж чадаагүйг улсын харцага О.Хангай өчигдөр хийлээ. Залуу харцага үндэсний бөхийн спортод шинэ салхи дахин сэвэлзүүлэв. Бөхчүүд яг түүн шиг допингийн эсрэг зоригтой дуугарч, эрс шийдэмгий эсэргүүцэх л дутаад байсан юм. Олон хүчтэний зориглоогүй зүйлийг тэр эхлүүллээ. Тэгэхдээ бүр “Хэрвээ Э.Оюунболдыг Цагаан сарын барилдаанд зодогловол би барилдахгүй. Би ганцхан Э.Оюунболдтой тэмцээгүй. Нэр бүхий 37 бөхийн нэрийг зарлуулж, допингтой холбоотой бугшсан идээ бээрийг шахаж, үндэсний бөхийн спортоо ирээдүй хойчдоо өвлүүлж үлдээхийг хүсэж байна” гэж өөртөө итгэлтэй нь аргагүй зоригтой хэлэв.

АТГ 2009-2019 онд шөвгөрсөн 109 (давхацсан тоогоор 192) бөхийн шинжилгээг дахин нягтлахад 37-гоос нь допинг илэрсэн гэх яриа гараад буй. Энэ талаарх дуулиан цахим ертөнцөд өрнөсөөр байгаа. О.Хангай мөн тэдгээр бөхчүүдийн нэрийг зарлахыг шаардсан юм.

Ерөөс бөхчүүд түүн шиг ингэж үзэл бодлоо зоригтой илэрхийлж, тэмцэх л дутаад байгаа юм.

БӨХЧҮҮД ДОПИНГИЙН ЭСРЭГ ТЭМЦЭЭД ҮР ДҮНД ХҮРСЭН НЬ НЭГ БУС

Ер нь бөхчүүд ингэж тэмцээд үр дүнд хүрсэн тохиолдол нэг бус. Нийтлэлийн эхэнд “Залуу харцага үндэсний бөхөд шинэ салхи дахин сэвэлзүүллээ” гэж тодтгосныг уншигч та анзаарсан байх. Дахин гэсэн нь ийм учиртай.

2018 онд нэгдүгээр сард улсын гарьд Ө.Бат-Орших, заан Б.Пүрэвсайхан, начин Э.Даш, аймгийн арслан Б.Номиндалай, сумын заан С.Майнбаяр нараас сэргээш илэрч, барилдах эрхээ хоёр жилээр хасуулсан. Тэдний шийтгэлийн хугацаа  энэ онд дуусах учиртай байв. Гэтэл дээрх бөхчүүд МҮБХ-ны тэргүүн Б.Бат-Эрдэнэд өргөдөл бичиж, уучлал хүсэн, эрхээ сэргээлгэх хүсэлт гаргасныг нь зөвшөөрсөн. Түүгээр ч үл барам өнгөрсөн оны зургадугаар сард болсон улсын арслан Ш.Ванчинхүүгийн нэрэмжит барилдаанд Б.Пүрэвсайхан, Б.Номиндалай, Э.Даш нар бүртгүүлж, зодоглохоор оролдсон нь байдлыг улам хүндрүүлж, олныг талцуулсан билээ.

Үндэсний бөхөд байтугай спортын салбарт өмнө нь байгаагүй, байх ч учиргүй эл шийдвэрийг улсын аварга Ч.Санжаадамба тэргүүтэй бөхчүүд эсэргүүцсэн. Бараг хагас цаг гаруй маргалдсаны эцэст МҮБХ-ны удирдлага дээрх гурван бөхийг тус барилдаанаас хассаныг уншигчид сайн мэднэ. Тэгсэн ч улсын заан Б.Пүрэвсайхан барилдахыг оролдоход бөхчүүд эсэргүүцэн, үзэгчийн суудалд суусан. Үзэгчид ч мөн эсэргүүцэхэд Б.Пүрэвсайхан аргагүйн эрхэнд Бөхийн өргөөг орхисон билээ. Улсын аварга Ч.Санжаадамба тэргүүтэй бөхчүүдийн тэмцлийн үр дүн үүгээр дуусаагүй. Хагас жил гаруйн дараа дуусах шийтгэлийн хугацаагаа наашлуулан, барилдах эрхтэй болсон улсын заан Б.Пүрэвсайхан улсын наадамд барилдахыг оролдсон. Үүнийг нь бөхчүүд төдийгүй олон түмэн эсэргүүцсэн юм. Улмаар МҮБХ-ноос шийдвэрээ цуцалснаар улсын гарьд Ө.Бат-Орших, заан Б.Пүрэвсайхан нарын барилдах эрх допингийн эсрэг журмын дагуу энэ оны өмнө сэргэсэн.

Харин Б.Пүрэвсайханы шийтгэлийн хугацаа хоёрдугаар сарын 1-нд дуусна. Тэрбээр B сорьцоо шинжлүүлсэн тул барилдах эрхийг нь хасах асуудлыг тодорхой хугацааны дараа шийдсэн юм. Энэ бол бөхчүүд допингийн эсрэг, хориотой бодис хэрэглэсэн бөхчүүдийн эсрэг тэмцээд тодорхой үр дүнд хүрсэн барим тавим жишээ. Тэгвэл одоо дахиад нэгдэн, дуу хоолойгоо нэгтгэх хэрэгтэй. Тэгэхдээ зөвхөн Э.Оюунболдыг Цагаан сарын барилдаанд зодоглуулахгүйн төлөө бус үндэсний бөхөд олон жил бугшсан допингийн асуудлыг, эдээ бээрийг нь нэг мөсөн шахаж гаргахын төлөө тэмцэх нь зүйтэй.

МҮБХ: Э.Оюунболдыг хоёр жил барилдуулахгүй

Цагаан сарын барилдаанд зодоглохоо илэрхийлсэн Э.Оюунболдын асуудалд МҮБХ ийм байр суурьтай байна. Цагаан сарын барилдаанд байтугай ойрын хоёр жилийн хугацаанд, бүр тодруулбал шийтгэлийнх нь хугацаа дуустал отгон аварга хүч сорих боломжгүйг тэд сануулав. Э.Оюунболд барилдах эсэхийг шийдэх гол байгууллага нь МҮБХ. Тус холбооны шийдвэр бөхчүүдэд хүчин төгөлдөр үйлчлэх учиртай. Энэ талаар МҮБХ-ны дэд тэргүүн, улсын заан Ц.Магалжаваас тодруулахад “Манай холбоо допингтой хатуу тэмцсээр ирсэн. Цаашид ч энэ байр сууриндаа бат зогсоно. Э.Оюунболдын цолыг хураах эсэх Ерөнхийлөгчийн шийдэх асуудал. Баяр наадмыг зохион байгуулах хорооноос түүний барилдах эрхийг хоёр жилээр хассан тул Цагаан сарын барилдаанд зодоглуулахгүй. Тэд Э.Оюунболдын барилдах эрхийг хассан тогтоолоо оны өмнө МҮБХ-нд ирүүлсэн. Нэгэнт тийм тогтоол гарсан тул мөрдөх учиртай. Бид түүнийг нь дагах учиртай. Тиймээс Э.Оюунболдыг хоёр жил барилдуулахгүй” гэв.

ДОПИНГИЙН ШИНЖИЛГЭЭГ СОЛЬДОГ ЮМ БИШ ҮҮ

Ингэж бичихээр зарим хүн “За, хардах юмаа мөн олов оо” гэжшүүмжилж магадгүй. Бүхий л шатны байгууллагынхны ганц хэлдэг үг нь “Допингийн шинжилгээг солих боломжгүй” болохоор арга ч үгүй биз. Шинжлэх ухаан өндөр түвшинд хөгжсөн өнөө цагт тэгэх боломжгүй байх магадлал тун өндөр. Гэхдээ ингэж хардаг нэгэн жишээг улсын харцага О.Хангай өчигдөр ярьсныг уншигч та анзаарсан байх.

khangai

Тэрбээр “Би нэрийг нь хэлэхгүйгээр нэг зүйлийн талаар хэлье. Би 2017 онд улсын наадамд шөвгөрөөд допингийн шинжилгээ өгсөн. Тэгэхэд миний хажууд шинжилгээ өгч байсан бөх шээсээ сольж байгаад баригдсан. Яг миний хажууд өнөөх бөхийг Допингийн эсрэг үндэсний төвийнхөн загнасан. Тэгэхэд би “Эн жилийн наадмаар нэг хүнээс допинг илрэх нь дээ” гэж бодсон. Гэтэл чив чимээгүй өнгөрсөн, хэн нэгнээс допинг илэрсэн тухай ямар ч зүйл яригдаагүй. АТГ 2009-2019 онд шөвгөрсөн 109 (давхацсан тоогоор 192) бөхийн шинжилгээг дахин нягтлахад 37-гоос нь допинг илэрсэн гэгдэж байгаа. Цаана нь илрээгүй 72 бөх бий. Тэдний шинжилгээний дээжийг БНСУ-ын лабораторит хадгалж буй дээжтэй нь харьцуулж, нягтлах хэрэгтэй. Тэгж байж л шээс солигдсон эсэх асуудлыг шийдэх боломжтой” гэсэн.

Эндээс харахад бөхчүүд шээсээ сольдог, тэднээс допинг илэрсэн ч харьяа байгууллагууд хав дараад өнгөрдөг юм биш үү. Тэгээд зарим жил “Тэдэн бөхөөс допинг илэрлээ” гэж зарим нэгээр нь “туг тахиад”, ажил хийж байгаа, шийтгэл ногдуулж байгаа болж харагддаг юм биш үү.

ГЭРЭЛ ЗУРГИЙГ Ц.МЯГМАРСҮРЭН

Таг

Холбоотой мэдээ

СЭТГЭГДЭЛ

АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

avatar
140
Back to top button