АН-ыг давсан Н.Номтойбаярын улс төр

УИХ-ын сонгуулиар парламентад дөрвөн суудал авсан “Үндэсний эвсэл”-ийн тэргүүн, УИХ-ын гишүүн Н.Номтойбаяр томилогддог болон сонгогддог улс төрийн 50 гаруй өндөр албан тушаалтнуудын ёс зүйн асуудлыг хөндөх, тэдний албан үүргийн эрх, хязгаарыг зохицуулсан хуулийн төсөл санаачлан боловсруулан талаараа мэдээлэл хийсэн.

Энэ нь УИХ-ын гишүүнийг эгүүлэн татах тухай ерөнхийлөгчийн хуулиас өөр бөгөөд төрийн өндөр албан тушаалтнуудын ёс зүйн асуудлыг ч мөн авч үзэх шаардлагатай гэж үзэн Ерөнхийлөгч, Ерөнхий сайд, УИХ-ын дарга, шүүгч, Цэцийн гишүүд, АТГ, ЦЕГ-ын дарга тэргүүтэй улс төрийн өндөр албан тушаалтнуудын ажил үүргийн хариуцлагыг нарийвчлан зохицуулахаар уг хуулийн төсөлдөө тусгажээ.

Өөрөөр хэлбэл УИХ-ын гишүүд л дан ганц ёс зүйн асуудлаа хэлэлцүүлдэг биш эргээд төрийн өндөр албан тушаалтнуудаас ч мөн сахилга, хариуцлага нэхэх хууль гэдэг утгаараа ерөнхийлөгчийн санаачилсан хуулиас илүү өргөн хүрээтэй аж.

Ардчилсан нам уг нь ерөнхийлөгчийн санаачилсан хуульд өөрсдийн эрүүл шүүмжийг хэлээд сууж байх ёстой сөрөг хүчин боловч намын бүлэг дээрээ уг хуулийн төслийн агуулгыг огт хэлэлцэж, санал солилцоогүй гэв.

Харин Үндэсний эвсэл ерөнхийлөгчийн санаачилсан хуулийг хариуцлага ярьж буй нь зөв боловч хэрэгжих процессийн хувьд учир дутагдалтай хэмээн шүүмжилсэн бөгөөд ойрын өдрүүдэд уг хуулийн төслийг өргөн барих гэж буйгаа мэдэгдсэн. Ингэхээр ерөнхийлөгчийн өргөн барих хуультай зэрэгцүүлэн төрийн өндөр албан тушаалтнууд руу чиглүүлэн хаврын чуулганы эхэнд сөрөг хүчнээс давсан улс төрийг хаврын чуулганаар Н.Номтойбаяр хийхээр харагдаж байна.

Т.БАТСҮРЭН

Өөрийн сэтгэгдлээ илэрхийл

Share Tweet