Л.Оюун-Эрдэнийн Ерөнхийлөгчийн дүүтэй холбоотой өргөдөл Халдашгүй байдлын дэд хороонд хав дарагдав

Ерөнхий сайд асан Л.Оюун-Эрдэнэ Ерөнхийлөгчийн төрсөн дүү, УИХ-ын гишүүн У.Отгонбаярыг өрөөнд нь согтуу орж ирэн, агсам тавьж, нүүр рүү нь архи цацсан, "Монгол цэргийн нэгдсэн холбоогоо хөдөлгөнө шүү" хэмээн заналхийлсэн гэх асуудлаар УИХ-ын гишүүний халдашгүй байдлын дэд хороонд хандсан. Уг асуудал олон нийтэд ил болсон цаг хугацаа нь дөрөвдүгээр сарын эх. Өөрөөр хэлбэл, сар орчмын хугацаа өнгөрөөд буй.

У.Отгонбаяр "УИХ-ын гишүүд маргалдах, ам мурийх юм байлгүй яах вэ.Надтай холбоотой гомдол гаргасан байна билээ., Ц..Даваасүрэн гишүүн уулзсан” гэсэн шиг ээ Төрийн ордонд хээвнэг алхаж яваа. Үүгээрээ тэр тэдний хооронд гомдол гаргах хэмжээний зүйл өрнөсөн гэдгийг өгүүлж байгаа юм.

Нэг нь албан ёсоор өргөдлөө өгчихсөн, нөгөө нь аман байдлаар үйл явдлаа "баталчихсан", хамт байсан гэрчүүд байсаар атал хариуцлага тооцуулахаар хандсан хороо нь таг чиг байсаар энэ хүрлээ.

Тэднийг Ерөнхийлөгчийн санаачилсан УИХ-ын гишүүнийг эгүүлэн татах агуулга бүхий хуулийн төслөөс болж маргалдсан гэдэг. Тэр нь ч үнэн болов уу. Угтаа бол маргаан гэхээс илүүтэй ахынх нь өөдөөс үг хэлээд байгаад дүү нь баахан шарлахсан явдал гэнэ. Тодруулбал, Л.Оюун-Эрдэнийг Лхагвын тойм" нэвтрүүлэгт орж, орон даяар Ерөнхийлөгчийн инситуцын түрэмгийлэл болоод парламентын дархлаанд сөргөөр нөлөөлж болзошгүй хуулийн төсөл өргөн бариад байгаа талаар ярьснаас эхэлсэн аж.

Угтах бол У.Отгонбаяр Л.Оюун-Эрдэнэтэй хамт нэг тойргоос сонгогдсон, түүний нэр дор сонгуулийн сурталчилгаагаа “базсан” хүн. Гэхдээ улс төрд мөнхийн эрх ашиг байдаг гэдгийг харуулж увайгүйтэв. Хэдийгээр Ерөнхийлөгчийн дүү хэдий ч УИХ-ын гишүүний хувьд парламентын дархлаагаа хамгаалах үүрэг түүнд ногдоно.

Халдашгүй байдлын дэд хороо хуралдах нөхцөл үүсээгүй гэв

УИХ-ын гишүүний халдашгүй байдлын дэд хорооноос хурлын тов, хэлэлцэх асуудлын талаар тодруулахад "Ойрын хугацаанд хурлын болох тов байхгүй. Манай хороо бусад хорооноос онцлогтой, өргөдөл гомдол ирсэн тухай бүр хэлэлцдэггүй. УИХ-ын тухай хуулийн 45.1, 45.2-т заасны дагуу хуралддаг. Хуралдах нөхцөл бүрдээгүй байгаа гэсэн үг. Л.Оюун-Эрдэнэ гишүүний гомдлыг хэлэлцэх эсэхийг мэдэхгүй байна. Ц.Даваасүрэн дарга болон гишүүд хэлэлцэж шийдэх байх" гэсэн юм.

Тэгвэл УИХ-ын тухай хуулийн 45 дугаар зүйлийн 45.1, 45.2-т юу гэж заасныг дор тодруулъя.

45 дугаар зүйл.Улсын Их Хурлын гишүүний халдашгүй байдал, бүрэн эрхийг түдгэлзүүлэх

• 45.1.Гишүүнд холбогдуулан эрүүгийн хэрэг үүсгэсэн бөгөөд Улсын ерөнхий прокуророос түүний гэр, албан өрөө, тээврийн хэрэгсэл, биед нь үзлэг, нэгжлэг хийх зөвшөөрөл хүсэж, халдашгүй байдлыг нь түдгэлзүүлэх тухай санал ирүүлсэн бол гишүүний халдашгүй байдлыг түдгэлзүүлэх эсэх асуудлыг УИХ шийдвэрлэнэ.

45.2.Улсын Их Хурлын гишүүний бүрэн эрхийг дараах тохиолдолд түдгэлзүүлэх эсэх асуудлыг Улсын Их Хурал хэлэлцэж шийдвэрлэнэ:

• 45.2.1.гэмт үйлдлийнх нь явцад, эсхүл гэмт хэргийн газарт нотлох баримттай нь баривчилж, улмаар Улсын ерөнхий прокурор гишүүний бүрэн эрхийг түдгэлзүүлэх тухай саналыг УИХ-д оруулсан;
• 45.2.2.гишүүнд холбогдуулан эрүүгийн хэрэг үүсгэсэн бөгөөд түүнийг албадан саатуулах, баривчлах, цагдан хорих зайлшгүй шаардлагатай гэж үзэн Улсын ерөнхий прокурор бүрэн эрхийг нь түдгэлзүүлэх тухай саналыг УИХ-д оруулсан;
• 45.2.3.гишүүнийг эрүүгийн хэрэгт шалгаж яллах дүгнэлт үйлдэн шүүхэд шилжүүлэхийн өмнө Улсын ерөнхий прокурор түүний бүрэн эрхийг түдгэлзүүлэх тухай саналыг УИХ-д оруулсан гэж тус тус заажээ

Тэгэхээр энэ янзаараа бол прокуророос бичиг ирэх, хэн нэгнийх нь бүрэн эрх хөндөгдөх хүртэл тус хороо өргөдлийг хав дарсаар байх бололтой. УИХ-ын гишүүний Халдашгүй байдлын дэд хороон есөн гишүүнтэй бөгөөд УИХ-ын гишүүн Ц.Даваасүрэн ахалдаг.

Д.ХАДААН

Өөрийн сэтгэгдлээ илэрхийл

Share Tweet