Иргэдийн санал гомдлыг хүлээн авдаг Dparliament.mn дээр иргэн Д.Галсанцэрэн Тээврийн хэрэгсэлийн улсын дугаар олгохыг хязгаарлах журмыг цуцлуулах өргөдөл санаачилжээ. Одоогоор тус өргөдөлд 2,199 иргэн гарын үсэг зурсан байна.
Дээрх өргөдөлд ирэх наймдугаар сарын 14-ний 23:41 цаг хүртэл санал авах аж. Хэрэвзээ 100,000 иргэн гарын үсэг зурвал УИХ-аар хэлэлцэх юм.
Өргөдөл санаачилсан иргэн Д.Галсанцэрэн "Улаанбаатар хотод тээврийн хэрэгслийн улсын дугаар олгохыг тоон хязгаарлалтаар зохицуулж буй журам нь Монгол Улсын Үндсэн хуульд заасан иргэний өмчлөх эрхийг бодитоор хязгаарлаж, иргэдийн хууль ёсны эрх, ашиг сонирхолд сөргөөр нөлөөлж байна гэж үзэж байна.
Уг журам хэрэгжиж эхэлснээс хойш замын хөдөлгөөний түгжрэлийг бууруулах үндсэн зорилго нь бодит үр дүнд хүрсэн нь тодорхой бус хэвээр байгаа бөгөөд нөгөө талаас улсын дугаарын хомсдол, автомашины үнийн өсөлт, дамлан худалдаалах нөхцөл бүрдэх зэрэг сөрөг үр дагавар үүссэн талаар олон нийтээс шүүмжлэл гарсаар байгаа. Иймд энэхүү журмын хууль зүйн үндэслэл, хэрэгжилтийн үр нөлөө, иргэдийн үндсэн эрхэд үзүүлж буй нөлөөллийг дахин нягтлан үзэж, хүчингүй болгох шаардлагатай гэж үзэж байна" гэжээ.
Б.АЗЖАРГАЛ
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.