Сонгинохайрхан дүүргийн 21-р хороо "Ногоон толгой" өртөө орчмын айлууд ундны усгүй болоод сар орчим болж байгаа тухай иргэн манай редакцад хандлаа.
Оршин суугч, иргэн энэ тухай "Манай энд зуслангийн айлууд болон малчид нийлсэн 1,000 өрх байдаг. Тэд дундаа ганц худагтай. Гэтэл тэр худаг нь ажиллахгүй болоод сар орчим болж байна. Энэ тухай хорооны засаг даргад хэлэхэд "800 метрийн цахилгааны утасгүй. Түүнийг шийдэх төсөв хороонд байхгүй учраас дүүрэг рүү хүсэлтээ өгсөн" гэдэг хариу хэлээд удаж байна. Одоо бүр утсаа авахгүй болсон. Ойр орчмын айлуудын хүүхдүүд горхины ус уутал амаар нь эдээтэй зүйл гарах асуудал гарсан" гэлээ.
Бид мэдээллийг тэнцвэртэй, үнэн бодиттой хүргэх үүднээс тус хорооны засаг дарга н.Батбямбаас тодруулахад "800 метрийн цахилгааны утасгүй гэх шалтгаанаар худаг нь ажиллахгүй байгаа асуудал гарсан. Хороонд төсөв байдаггүй учраас бид дүүрэг рүү мэдэгдсэн. Дүүргээс дөнгөж сая эрчим хүчний хүмүүсийг явууллаа гэдэг хариу өглөө. Хороо төсөвгүй учраас тухайн бүсэд оршин суугчаас хэдэн төгрөг цуглуулаад цахилгааны утас авах санал тавьсан ч иргэд хүлээн зөвшөөрөөгүй. Улмаар удсан асуудал үүссэн" гэв.
Б.АЗЖАРГАЛ
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.