Улс төрөөс арчигдсан Ж.Батзандан ард А.Аюушийг дуурайж дугуйлан байгуулахаа зарлалаа
Загас шиг дуугүй, хонь шиг номхон байж чадахгүй. Өнөөдөр 13 цагт Хэвлэлийн хурал хийнэ. Цаг үеийн асуудлаар нээлттэй ярилцъя гэж зарласан Ж.Батзандан "Богд уул" гэх иргэний нийгмийн хөдөлгөөн үүсгэж буйгаа зарлалаа.
Ингэхдээ улстөрч бүрийн амны уншлага болсон "ард иргэдийн амьдрал, хэрэглээний үнийн индекс, бензиний оочер" гэх зэрэг эмзэглэл дээр дөрөөлөхөө мартсангүй. Мөн өөрийгөө гурван ч удаа шоронд хоригдон гэм буруугүй хэмээн гарч ирснээ ч дөвийлгөн ярив.
Хэвлэл мэдээллийн хоёр байгууллага дуудаж, 30 минут гаран ярихдаа нэг ном танилцуулж, мөн ард А.Аюушийг дурсахын сацуу хүчтэй иргэний нийгмийн хөдөлгөөн үүсгэж Монгол нутагтаа эзэн байя, уул усаа хамгаалъя, гадаадынхнаас газар шороогоо хамгаалах нь зөв гэв. Өнөөдрөөс үүсгэн байгуулж байгаа дугуйлангийнх нь нэрийг "Богд уул" гэх бөгөөд нэгдэн нийлж, тэмцэхийг уриалав. Улс төрөөс арчигдаад долоо гаруй жилийн нүүрийг үзэж, өнгөрсөн онд БЭТ-ийн дүрээр эргэн ирээд буцсан түүний дараагийн алхам дугуйлангийн тэргүүн болой.
Эргэн сануулахад, Тэрбээр өмнө нь Хөгжлийн банкны хэргээр хоёр сар хоригдож байсан. Мөн 2019 онд Төв талбайд жагсаж, "Шударга тав” хэмээн өөрсдийгөө цоллож байсан хүмүүсийн нэг. Бас олноо “Төрд хэрэггүй хүн” хэмээн цоллуулсан нэгэн билээ.
Г.МИШЭЭЛ
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.