Энэ хавар буюу 4-р сард Экологийн цагдаагийн албаны даргад Б.Оюутболдыг Гэмт хэрэг, зөрчил шалгах албаны даргын үүрэгт ажлаас нь дэвшүүлэн томилсон.
Г.Занданшатарын Засгийн газрын үед ЦЕГ-ын дарга Ж.Болдын тушаалаар ийн түүнийг дэвшүүлэхдээ оронд нь Экологийн цагдаагийн албаны даргаар ажиллаж байсан Ц.Амгалан-Энхийг зөрүүлж Б.Оюутболдын албан тушаалд сэлгэж байв.
Үүнээс өмнө, 2024 оны 3-р сард Б.Оюутболдыг Тээврийн цагдаагийн албаны даргаар ажиллаж байхад нь тухайн үед ХЗДХ-ийн сайдаар Б.Энхбаяр ажиллаж байхдаа түүнийг үүрэгт ажлаас нь чөлөөлсөн. Ингэхдээ сошиалд өрнөсөн Х.Нямбаатар, Б.Энхбаяр нарын маргаан дунд шидэгдэж, улмаар Г.Занданшатарыг ЕС байх үед ЦЕГ-ын даргад хүртэл нэр нь яригдаж байсан Б.Оюутболд ийн үүрэгт ажлаасаа буусан удаатай.
Харин энэ удаад түүнийг ХЗДХ-ийн сайд Ц.Амарсайхан үүрэгдсэний дагуу, ЦЕГ-ын дарга Ж.Болдын тушаалаар Экологийн цагдаагийн албаны даргын үүрэгт ажлаас нь чөлөөлөв.
Учир нь ХЗДХ-ийн сайд С.Амарсайхан өчигдөр яаман дээрээ ЦЕГ-ын дарга, Дотоодын цэргийн командлагч, Хошууч Генерал Ж.Болд, ЦЕГ-ын Тэргүүн дэд дарга, Бригадын Генерал Ж.Батбаатар нарт Хууль бус алт олборлолт, Байгаль орчны эсрэг гэмт хэрэгтэй тэмцэх ажлыг улсын хэмжээнд эрчимжүүлж, холбогдох арга хэмжээ авч түргэн шуурхай, үр дүнтэй ажиллах үүрэг чиглэлийг өгсөн.
Ингэхдээ “Хууль бусаар ашигт малтмал олборлох тэр дундаа алт олборлолт, байгаль орчны сүйтгэл газар авч, олон нийтийн нүдэн дээр ил тод явагдаж байхад хууль хяналтын байгууллагуудын ажиллагаа сул, хариуцлага тодорхойгүй хэвээр байж болохгүй. Ялангуяа шүүх, прокурор, цагдаа гээд хууль сахиулах байгууллагууд ажлаа хийхгүй байгаа мэтээр олон нийтийг төөрөгдүүлж, нийгмийг худал мэдээллээр талцуулдаг байдалд цэг тавих ёстой" гэсэн юм.
Энэ нь “Урьхан”-ы Б.Чинбат нарын алтны уурхай, лицензтэй холбоотой асуудалд нэр холбогдсон цагдаагийн албан тушаалтнуудыг дотоод хяналтаараа шалгах тухай.
Дээрх асуудалд, нэр холбогдсон этгээдүүд нь Туул голын хамгаалалтын ай сав газарт олборлолт хийж, байгаль орчинд хохирол учруулсан зэрэг асуудал ч мөн бий учир ийн Б.Оюутболдыг үүрэгт ажлаас нь чөлөөлсөн аж. Гол үндэслэл нь "Хууль бус алт олборлолт, байгаль орчны эсрэг гэмт хэрэгтэй тэмцэх ажилд хариуцлагагүй хандсан" гэжээ.
Түүнчлэн дээрх асуудлуудыг 14 хоногийн дотор бүх талаас нь шалгаж, улмаар үр дүнг нь олон нийтэд танилцуулахыг ЦЕГ-ын дарга Ж.Болдод сайд нь үүрэгдэв.
Т.ГЭРЭЛТ-ИРЭЭДҮЙ
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.