Д.Эрдэнэбилэг, Ц.Элбэгдоржийг шалгуулах зүрхгүй С.Амарсайхан С.Молор-Эрдэнэ, Г.Солонгод л мундагдана

Н.Учралын Засгийн газар бүрдсэнээс хойш таван сарын нүүрийг үзэхэд тун ойртож явна. Түүний танхимд Хууль зүй, дотоод хэргийн сайдын албан тушаалд С.Амарсайхан МАН доторх 30-ын талаас томилогдсон.

Тэр энэ суудалд очсоныхоо дараа яг л бусад сайд нарын ижлээр "сошиал төвт" шийдвэрүүдийг гаргаж, олон нийтийн өмнө оноо авах гэдэг имижээр ажилласаар байна. Ажлаа хүлээж аваад удаагүй байхдаа “Төрийн байгууллагын бүтэц, зохион байгуулалтыг оновчтой болгох, төрийн албан хаагчдын ажлын ачааллыг бууруулах зарим арга хэмжээний тухай” тогтоол батласан. Гэтэл баталмагцаа араас нь шөнөөр ажилтнуудаа хүндрүүлэн, ажил үүрэг шалгадаг нөхөр болж түүнийгээ шууд дамжуулах хэмжээнд попорсон.

Араас нь, согтуугаар тээврийн хэрэгсэл жолоодвол насан туршид нь жолооны эрхийг нь хасдаг болох хууль санаачилж өргөн барина гэлээ. Түүгээр зогсохгүй Дорнодын Матад суманд "томорч" явсан хоёр жагсагч эмэгтэйг мөн баривчлуулах чиглэл өгсөн бололтой. Цагдаагийнхан яаравчлан ажиллаж харагдсан. Ингээд саяхан Философич С.Молор-Эрдэнийг шалгахыг мөн үүрэгдэж, сошиалд тарсан алтны ченжүүдийн цууг няцаахыг тушаав.

Уг нь хуулийн сайд хэрэг шийдвэрлэх тушаал өгөх эрхгүй. Харин бодлогын хувьд чиглүүлэг өгөх боломжтой. Үнэхээр шалгуулах үүрэг чиглэл өгдөг юм гэхэд жагсагч, философич л лав биш.

С.Амарсайхан энэ мэтийг ярьж суух зуур 4 жилийн өмнө Сингапур руу гараад явчихсан сахал хочит Д.Эрдэнэбилэг Монголд ирчихсэн айраг, цагаа сөгнөж суув. Нийтдээ есөн жил мөрдөгдөж, гурван жилийн өмнө шүүх рүү шилжсэн Эрдэнэт үйлдвэрийн 49 хувийн гэх хэрэгт холбоотой түүнийг хууль бусаар улсын үйлдвэрүүдийг хувьд авч, мөнгө угаасан гэх үндэслэлээр цагдан хорьж байв.

Мөн Ерөнхийлөгч асан Ц.Элбэгдорж Монголд ирж, Эрдэнэт үйлдвэрийн ойн баярын арга хэмжээнд оролцож, улмаар долоон жилийн өмнө АТГ-аас Тавантолгойн орд газрыг Хятадын компанид 100 жилийн хугацаатай үнэгүй өгөхийг завдсан байж болзошгүй гэх үндэслэлээр шалгаж байх үед тэр гадагш явсан.

Ингээд түүнд холбогдох хэргүүд түүний эзгүй жилүүдэд шалгагдсаар байсан ч 2025 онд Ц.Элбэгдоржийг баривчлах захирамжийг хүчингүй болгох П.Цагааны хүсэлтийг Дүүргийн Эрүү, Иргэний хэргийн хялбар ажиллагааны анхан шатны тойргийн шүүх хүлээн авч шийдвэрлэсэн удаатай.

Монголд ирснийх нь дараахан, АТГ дуудлаа гэх сургаар Ц.Элбэгдорж хэвлэлийнхнийг дуудагдсан ч өмнөх жилүүдэд шалгагдсан хэргээр нь биш тэс өөр асуудлаар тодруулга авсан гэх тайлбар зориуд хийчихнэ лээ.

Яг энэ л үед хуулийн сайд С.Амарсайханы ээлжит популист шийдвэрүүд ар араасаа хөвөрч, улс төрийн томоохон хэрэгт нэр холбогдон шалгагдаж, эрэн сурвалжуулж байсан этгээдүүд нь Монголдоо ирчхээд байхад үл ажрав.

Хуулийн сайд олон нийтэд харагдах дүрдээ л анхаарч суугаа нь Хотын даргын имижээ одоог хэр орхиогүй, ямар салбарыг удирдаж байгаагаа нэг л ойлгоогүй гэж харагдана.

Аль эсвэл түүнд Д.Эрдэнэбилэг, Ц.Элбэгдорж "томдож", С.Молор-Эрдэнэ, Г.Солонго л яг санаанд нь багтсан ч байж болно.

Т.ГЭРЭЛТ-ИРЭЭДҮЙ

Өөрийн сэтгэгдлээ илэрхийл

Share Tweet