Ерөнхийлөгчийн суудал мөрөөдсөн У.Хүрэлсүхийн найзууд дотооддоо ингэж салцгаажээ

МАН-аас 2027 онд Ерөнхийлөгчийн сонгуульд нэр дэвших хэн болов чиг өнөөгийн төрийн тэргүүн У.Хүрэлсүхийн бүрэн ивээл дор, түүний зөвшөөрлөөр мандатаа өвөрлөх нь нэгэнт тодорхой логик.

У.Хүрэлсүх өргөн дэлгэр хүрээлэлтэй мэт харагддаг ч яг багцалбал маш цэгцтэй цөөн хүрээллээр урагш явсан дүр. Энэ хүрээлэл дундаас нь 2027 оны Ерөнхийлөгчид нэр дэвших хувилбар хамгийн бодитой яригдаж буй.Тэр хэрээр тэд нэг саван дотор бөөндөө сууж, ганцхан дүр дээр нэгдэх боломжгүй. Тэдний өнөөгийн дотоод нөхцөл байдал Ерөнхийлөгчийн сонгуулийн марафонд доорх байдлаар хуваагджээ. Дэлгэрүүлбэл,

Нэг. Г.Занданшатар хамгийн рейтинг өндөртэй ч одоогийн төрийн тэргүүний багийн дэмжлэг байхгүй тул ИЗНН-аас дэвших хувилбарыг давхар хөнджээ

МАН-аас Ерөнхийлөгчийн сонгуульд өрсөлдөхөө тодорхой илэрхийлж, олон нийтийн ажлаа тасралтгүй, ил тод хийсээр яваа дүр бол Г.Занданшатар. Ерөнхий сайд байхаасаа л Ерөнхийлөгчийн суудлын төлөөх алхмуудаа хэдийнэ өрөөд эхэлсэн нь харагддаг.

Г.Занданшатарын талд МАН-ын лидерүүдээс төдийлөн онцлох хүн одоогоор байхгүй. Тэрбээр Ц.Анандбазар, П.Цэрэнпунцаг нарын дэмжлэгээр олон нийтийн гол ажлуудаа амжуулж буй. Ерөнхийлөгчийн багаас ойр хүн түүнд одоогоор алга байгаа ч горилогчдоос судалгаагаар хамгийн өндөр магадлалтай хүнээр Г.Занданшатар нэрлэгдсэн нь анхаарал татав.

Нэгэнт Ерөнхийлөгчийн сонгуульд нэр дэвшихээр шулуудсан тул намаасаа шахагдсан тохиолдолд ИЗНН-аас нэр дэвших хувилбараар уулзалтууд хийсэн гэгдэж буй. Нэг ёсондоо Г.Занданшатар МАН-аас биш ч өөр улс төрийн намаас нэр дэвшихээр ажиллах нь тодорхой болжээ.

Хоёр. У.Отгонбаяр, Н.Ганибал тэргүүтэй Сүхбаатарынхан Б.Жавхланг дэмжинэ

Ерөнхийлөгч У.Хүрэлсүхийн зүгээс Сүхбаатар аймгийн МАН-аас Б.Жавхланг, АН-аас Ж.Батсуурийг дэмжих магадлал хамгийн өндөр. Сангийн сайд асан Б.Жавхлантай ямагт ойр харилцаатай явж ирсэн У.Хүрэлсүхийн хувьд өнгөрсөн зуны Хөвсгөл аймгийг тойрсон уулзалтад нь тэр багтсан байв.

Ерөнхийлөгчийн төрсөн дүү У.Отгонбаяр Сүхбаатар аймгийн МАН-д нөлөөгөө тэлж, энэ хүрээллээсээ Б.Жавхланг дэмжихээр ажиллаж буй аж. Сүхбаатар аймаг Баянхонгор, Увсыг бодвол нэгдэхээ хүрвэл нэгддэг онцлогтой. Тэр ч утгаараа нэгэн үес намаасаа Ерөнхийлөгчид нэр дэвших боломж мөрөөдөж явсан Ж.Батсуурийг орхиж, АН-аас Н.Ганибал ч Б.Жавхланг дэмжиж байгаа аж.

Б.Жавхлангийн хувьд Сангийн сайдаар хамгийн удаан ажиллаж, өнгөрсөн хавар нутгийн ахаасаа Гавьяат эдийн засагч нууцханаар хүртээд, хаврын чуулганыг өндөрлүүлсэн. Ерөнхийлөгчийн сонгуульд нэр эс дэвшлээ гэхэд Н.Учралын оронд Засгийн газрын тэргүүнээр ажиллах хувилбарт хамгийн их нэрлэгдэж буй дүр юм.

Гурав. Ж.Энхбаярыг Я.Содбаатараас гадна Х.Хэрлэн, Н.Дэлгэрнаран, Г.Ёндон нарын ТӨХК, агентлагаас мөнгө босгогчид дэмжинэ

ЖДҮХС-гийн зээлийн муу нэр холбогдохоосоо өмнө Ж.Энхбаяр "УИХ-ын дарга болох, Ерөнхийлөгч болох" хэдхэн мөрөөдөлтэй байв.

Гэвчиг ЖДҮ хэргээс хойш түүнийг олон нийт алга ташиж хүлээж авахаа болиод асар удав. Гадаад харилцааны голлох бодлогыг зангиддаг гэж өөрийгөө тодотгодог Ж.Энхбаяр саях ШХАБ-аар хойт хөршийнхөнд ил цагаан мадлуулж, элдэвчлүүлсээр ирсэн гэгдэж буй. Гэсэн ч тэр хэзээд Ерөнхийлөгч болох амбицаас ухарч байсангүй.

Энэ удаад түүнийг нэгэн цагт жагсаалтынх нь өмнөх дэсийг гуйж явсан Я.Содбаатар намаас нь дэмжихээр байгаа аж. Я.Содбаатар гэвчиг МАН-ын генсекийн хувиар Ерөнхийлөгчийн сонгуульд оруулахаасаа өмнө хөөгдөхөөр эгзэгтэй дүр. Ямартай ч Ж.Энхбарт Я.Содбаатараас гадна "Эрдэнэт үйлдвэр"-ийн дарга Г.Ёндон, ГЕГ-ын дарга П.Дэлгэрнаран, УБТЗ ХНН-ийн дарга Х.Хэрлэн нарын ТӨХК, агентлагаас мөнгө босгогчид байгаа аж.

Мөн саяхан эх орондоо ирээд буй ХХБ-ны ТУЗ-ийн дарга Д.Эрдэнэбилэг хамаг бооцоогоо Ж.Энхбаярт тавьж, "Эрдэнэт үйлдвэр"-ийн 49 хувийг шилжүүлэн авах Засгийн газрын ажлын хэсгийн ахлахын байр суурь түүнд шилжээд буй. Улмаар Д.Эрдэнэбилэгийн багийн зүтгүүлсэн Ноён уулын тусгай хамгаалалттай цэгээс нэг хэсгийг тасдаж авах алтны хуулийн төслийг ч Ж.Энхбаяр сугавчилж яваа юм.

Ерөнхийдөө У.Хүрэлсүхийн найзуудаас энэ хугацаанд Ж.Энхбаяр хамгийн их мөнгөтэй хэсгүүдийг өөртөө татаж авсан нь энэ.

Дөрөв. Хуучин Миеэ фракц С.Бямбацогтыг дэмжих, эсвэл ухрах хувилбар

"Би УИХ-ын дарга болвоос Ерөнхийлөгчид нэр дэвшихгүй" гэж ам шүд алдан байж спикер болсон хүн бол С.Бямбацогт. УИХ-ын дарга болсноосоо хойш Я.Содбаатар Хархорумд ээлжит бус чуулган хуралдуулна гэхэд ч сөрсөнгүй. Н.Учралыг өөрт ирэх галаа түүн рүү хэдэнтэй шилгээхэд ч ил цагаан эсэргүүцсэнгүй.

"Ерөнхийлөгчийн ойрын хүмүүсийн дургүйг хүргээд яахав" гэх жимээр яваа түүнд Ерөнхийлөгчид нэр дэвших мөрөөдөл нь хэвээр байгаа юу гэвэл байгаа. С.Бямбацогтыг Ерөнхийлөгчийн хүрээллээс нутаг нэгт Сангийн сайд С.Мэндсайхан, Увсаас Б.Чойжилсүрэн, MCS төлөөллөөс Л.Энх-Амгалан тэргүүтнүүд дэмжиж буй аж.

Ерөнхийчилбөл, хуучин М.Энхболдын фракцын суурь С.Бямбацогтыг дэмжиж байгаа логик юм. Тэд басхүү ухраад У.Хүрэлсүхийн "гэм зэмгүй" ангилалд нэрлээд буй Н.Энхболд, Ө.Энхтүвшин нарыг ч дэмжчихэж болно. Гэхдээ аль ч тохиолдолд ялах магадлал магад хамгийн бага хэсэг энэ бөөгнөрөл болж байна.

Өөрийн сэтгэгдлээ илэрхийл

Share Tweet