Н.Учралын ичгүүрээ гээх цаг, С.Амарсайханы засгийн танхимд үлдэх эсэхээ дэнслэх долоо хоног

Өнгөрөгч долоо хоногт төсвийн тодотголын задаргаанд Ерөнхий сайд Н.Учралын ээжийн "Их засаг Кинг" сургуульд 3.5 тэрбумын тоног төхөөрөмжийн дэмжлэг суусан нь үндсэндээ тодорхой болсон. УИХ-ын гишүүдэд ирсэн эксел файлыг Боловсролын сайд Л.Энх-Амгалан "гүтгэлэг" хэмээн онцолж, Сангийн сайд З.Мэндсайхан "Нарийвчилсан задаргааг хараагүй" гэж гүрийсэн. Харин Ерөнхий сайд Н.Учрал "нэг муу эксел файл" гэж тодотгосон юм.

Ингээд баасан гаригт нь байнгын хороодын ирцийг зориудаар бүрдүүлэхгүй барьж, зэрэгцүүлээд сошиалд Булнай гэх удганы гэрт Цагдаагийн байгууллагын ажилтан очиж, "С.Амарсайхан миний ярьсан хүчирхийллийн дүр биш" гэх утгаар мэдэгдэл гаргахыг тулгасан бичлэг цацагдав. Ерөөс сенсацыг сенсациар дарах төгс өрнөл энэ л дээ. Зэрэгцээд Ерөнхийлөгч Баян-Өлгий аймагт ажиллах болсонтой холбогдуулан, казак иргэдийн асуудал ихээр хөндөгдөв. Энэ нь Н.Учралд зол болсон.

Гэхдээ өнөөг хүртэл Ерөнхий сайд Н.Учрал "нэг муу эксле файл"-аа зохиомол гэдгээр нь олон нийтэд баталсангүй. Бодвол, Боловсрол, Сангийн яамаар нэг цам харайж, эксел файлын буруутныг олж тогтоогоод, хөшигний ард өнөөх ажилтнаа цовдлоо биз ээ. Ил бол тайлагнахад хэтэрхий ичмээр, үл итгэмээр кэйс хэвээрээ л үлдэх юм. Ядахад, Засгийн газрын тэргүүн АТГ-ын даргыг нэрлэж, УИХ-ын чуулган руу оруулдаг зохицуулалтаа мартаж, тэндээ үсэргэж очин шалгуулах хүсэлтээ өгсөн.

Өнөөдрөөс, З.Дашдаваа томилдог субьектээ хэрхэн шалгаж байгаа асуудлаар олон нийтэд ам өчиг өгөх шаардлага үүсчхээд байна. Харин энэ бүх процесс дунд огт ичдэггүйгээрээ Н.Учрал "С.Амарсайханыг хэрэг наймаалцахаар завдлаа" гэж өчигдөр сошиалд пост оруулсан юм. Тэр иймэрхүү байдлаар Х.Нямбаатараар хэдэн удаа нүүр хуудастаа пост өлгөөд л, аваад шидчихсэн. Оронд нь Ерөнхийлөгчийн экс хүргэн очсон.

Энэ удаа ч тэр Н.Учралын нүүр хуудсан дахь С.Амарсайханд зориулсан текстийг Б.Энхбаяр хуваалцаж байгаа нь төрийн тэргүүний дэмжлэгийг тэд ерөнхийдөө авчихсаныг, зургаа зурчихсныг харуулав.

С.Амарсайханыг танхимаасаа хөөж, оронд нь Ерөнхийлөгчийн бүр ойрын хүн ч ирэх нигуртай. Орных нь хүнийг тэд аль эрт өрчихсөн ч байж болно, өмнөх өрнөлүүд ер нь л ингэсэн. Гэхдээ С.Амарсайхан бас зүв зүгээр сууж байгаад хонгон дээрээ алгадуулаад байх дүр биш.

Өнгөрөгч хавар МАН-ын 30 талынхан 38-ын хэсэгтэйгээ хэлцэл хийхэд тэр хамгийн нугаршгүй дүр нь байж, "Ярилцаад үр дүнд хүрэхгүй бол тэмцье" гэдгээ ил хэлсэн цор ганц дүр нь гэгддэг. Энэ удаа МАН-ын 30 талынхан С.Амарсайханд хэрхэн хандахаас улс төрийн намжмал байдлаа эргүүлэх эсэхээ шийднэ гэсэн үг.

Тэгэхээр энэ долоо хоногийн эхээр Н.Учрал Ерөнхий сайдын суудлаа хамгаалахын тулд ичгүүрээ бүр мөсөн гээж, С.Амарсайхан харин гэр бүлийн агуулгадаа тайлбар хийх, цаашлаад улс төрчийн хувьд ямар шийдвэр гаргах нь уу гэдэг нь сонирхол татах нь ээ. Өнөөдрөөр төсвийн тодотголоо баталж, маргаашдаа намрын чуулганаа нээнэ.

Намрын улс төр ээлжит бус чуулган дамнаад л эхэлчихлээ. "Жоомоо алах гэж байгаад гэрээ шатаах"-ын үлгэрээр С.Амарсайханыг Н.Учрал танхимаасаа хөөвөл буцаад өөрөө унах эрсдэл үүснэ. Энэ удаагийн засгийн газар унаснаар МАН-ын бүлэг дэх 38 буюу У.Хүрэлсүхийн тал дараачийн танхимыг бүрдүүлэх гэж яарах уу. Сунжирсаар 45 хоноход л Засгийн газраа бүрдүүлж чадаагүй үндэслэлээр парламент тарж, ээлжит бус сонгууль яригдана. Улс орноо ийм төвөгтэй, эрсдэлтэй улс төрийн хэрүүлд МАН-ынхан зоочхоод байгаа нь энэ. Нөгөө талд арайхийж нэг улс төрийн намын дөрөө авч яваа АН шинэ Засгийн газарт хамтарвал 2028 оны сонгуулийн дүнд бүр ч өөр эффект үзүүлчихнэ. Энэ мэтээр олон нийтийн төдийлөн таамаглаагүй өрнөлүүд ч явчхаж мэдэхээр...

Өөрийн сэтгэгдлээ илэрхийл

Share Tweet