Гэмт хэрэг үйлдсэн УИХ-ын гишүүнийг эгүүлэн татах заалтын талаар ҮХЦ маргаан үүсгэлээ
Үндсэн хуулийн цэц Улсын Их Хурлын гишүүнийг гэмт хэрэг үйлдсэн үндэслэлээр эгүүлэн татах журмын талаар маргаан үүсгэн шалгаж байна.
Монгол Улсын Их Хурал 2024 оны 5 дугаар сарын 16-нд Улсын Их Хурлын тухай хуулийн шинэчилсэн найруулгыг баталсан. Уг хуулийн 7.3-т гишүүний бүрэн эрхийн хугацааг дөрвөн жил гэж заасан. Мөн хуулийн 9.1.5-д гишүүн гэмт хэрэг үйлдсэн нь хуулийн хүчин төгөлдөр болсон шүүхийн шийдвэрээр тогтоогдсон бол бүрэн эрх нь хугацаанаас өмнө дуусгавар болно гэжээ. 9.2-т энэ тохиолдолд Улсын Их Хурал эгүүлэн татах тогтоол гаргана гэж зохицуулсан байна.
Нэр бүхий иргэдийн мэдээллээр маргаан үүссэн заалт нь хуулийн 9.4 юм. Энэ заалтаар гишүүнийг эгүүлэн татах асуудлыг Төрийн байгуулалтын байнгын хорооны санал, дүгнэлтийг үндэслэн нэгдсэн хуралдаанаар хэлэлцэнэ. 9.1.5-д заасан асуудлаар гишүүд саналаа илээр гаргах бөгөөд хуралдаанд оролцсон гишүүдийн олонх дэмжвэл тогтоол батлагдсанд тооцно.
Цэц энэ заалт Үндсэн хуулийн дараах заалтуудыг зөрчсөн эсэхийг шалгаж байна:
- Нэгдүгээр зүйлийн 2
- Хорин есдүгээр зүйлийн 3
- Дөчин долдугаар зүйлийн 1
- Тавьдугаар зүйлийн 2
- Далдугаар зүйлийн 1
Үндсэн хуульд заасан зүйл
- Нэгдүгээр зүйлийн 2-т ардчилсан ёс, шударга ёс, эрх чөлөө, тэгш байдал, үндэсний эв нэгдлийг хангах, хууль дээдлэх нь төрийн үйл ажиллагааны үндсэн зарчим гэжээ.
- Хорин есдүгээр зүйлийн 3-т гишүүн тангаргаасаа няцаж Үндсэн хууль зөрчвөл эгүүлэн татах үндэслэл болно гэсэн. Мөн гишүүн гэмт хэрэгт холбогдсон асуудлыг чуулганаар хэлэлцэж, бүрэн эрхийг нь түдгэлзүүлэх эсэхийг шийдвэрлэх бөгөөд шүүх гэмт хэрэг үйлдсэн гэж тогтоовол Улсын Их Хурал түүнийг эгүүлэн татна гэж заасан.
- Дөчин долдугаар зүйлийн 1-т шүүх эрх мэдлийг гагцхүү шүүх хэрэгжүүлнэ гэжээ.
- Тавьдугаар зүйлийн 2-т Улсын дээд шүүхийн шийдвэр эцсийн шийдвэр байх бөгөөд бүх шүүх, бусад этгээд заавал биелүүлнэ гэсэн. Хэрэв шийдвэр хуульд харшилбал Улсын дээд шүүх өөрөө хүчингүй болгоно гэж заасан.
- Далдугаар зүйлийн 1-т хууль, зарлиг, төрийн байгууллагын бусад шийдвэр, нийт байгууллага, иргэний үйл ажиллагаа Үндсэн хуульд нийцсэн байвал зохино гэжээ.
Маргаан үүсгэсэн Цэц уг заалтыг Үндсэн хуультай харьцуулан шалгаж, дүгнэлт гаргах юм.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.