БАРИМТ: Ц.Цогзолмаагийн будлианаар АШУҮИС-ийн эмнэлэг хаалгаа барихад хүрэв үү

-ЯПОНЫ АРД ТҮМНИЙ ТАТВАРЫН МӨНГӨӨР СҮНДЭРЛЭСЭН ЭМНЭЛЭГ НӨГӨӨДӨР ХААЛГАА БАРИНА-

АШУҮИС-ийн сургалтын эмнэлэг 2020 оны гуравдугаар сарын 20-нд хаалгаа барихаа зарлалаа. Уг нь нээлтээ хийгээд жил гаруйн нүүрийг үзэж байгаа юм л даа уг эмнэлэг. Японы ард түмний татвараар буюу 210 тэрбум төгрөгөөр АШУҮИС гэх сургалтын эмнэлэгийн барилгын ажил 2016 онд эхэлж, 2019 онд сүндэрлэсэн. Түүгээр ч зогсохгүй эмнэлгийн ажилтнуудыг сургаж, үйлчилгээний япон стандартыг нутагшуулахын тулд сор болсон эмч, эрдэмтдийнхээ зөвлөх багийг Монголд 50 удаа илгээж сургалт явуулсан билээ.

-СУРГУУЛИЙН ЭМНЭЛЭГТ ЗАРЦУУЛАГДАХ 14.1 ТЭРБУМ ТӨГРӨГ 2018 ОНЫ САЙДЫН БАГЦАД СУУСАН Ч...-

Ашиглалтад ороход бэлэн болгоод бариад өгсөн эмнэлгийн үйл ажиллагааг эхлүүлэхэд Монголын талаас АРВАН ХЭДЭН ТЭРБУМ төгрөгийн төсөв шаардлагатай болсон. Уг хөрөнгийг 2018 оны Улсын төсөвт БСШУС-ийн сайдын багцад 14.1 тэрбум төгрөг суулгажээ. Үүнээс 5 тэрбумыг нь 2018 онд, 9.1 тэрбумыг 2019 онд санхүүжүүлэхээр төсөвт суужээ.

Эл мөнгөө зүй зохистой, зориулалтаар нь ашигласан бол АШУИС-ийн эмнэлэг бүрэн ашиглалтад ороод зогсохгүй, хаалгаа барихад хүрэхгүй байсан гэх. Гэвч 2018 онд тухайн үеийн БСШУС-ын сайдаар ажиллаж байсан Ц.Цогзолмаа будлиантуулан замхруулсан гэх мэдээлэл ил болоод далдаар баахан хөвөрсөн байдаг.

-ЭМНЭЛГИЙН БАРИЛГЫГ, СУРГУУЛИЙН БАРИЛГА ХЭМЭЭН ЗАСАЖ ТӨСВИЙН ТУХАЙ ХУУЛЬ ЗӨРЧИВ-

НЭГДҮГЭЭРТ, Тухайн үед боловсролын сайдаар Ц.Цогзолмаа ажиллаж байх үед буюу 2018 долдугаар сарын 16-нд Төсвийн тухай хуулийг өөрчилж, хууль зөрчжээ.

Тодорхой хэлбэл, 2018 оны Төсвийн тухай хуульд “Япон Улсын Засгийн газрын хөнгөлөлттэй зээлийн хөрөнгөөр хэрэгжиж байгаа Анагаахын шинжлэх ухааны үндэсний их сургуулийн ЭМНЭЛГИЙН барилга төслийн монголын талын хөрөнгө /Улаанбаатар/” хэмээн тусгажээ.

Гэвч эл нэршлийг БСШУС-ын сайдын 2018 оны тавдугаар сарын 05-ны өдрийн А/299 тоот “Жагсаалт батлах тухай” тушаал гарган ...Анагаахын шинжлэх ухааны үндэсний их СУРГУУЛИЙН барилга хэмээн нэрийг нь өөрчилжээ. 

БСШУС-ын сайд өөрийн тушаалаар ийнхүү нэрийг нь өөрчилсөн хэрнээ тендер зарлахдаа төслийг хуулийнх нь нэршлээр буюу “Япон Улсын Засгийн газрын хөнгөлөлттэй зээлийн хөрөнгөөр хэрэгжиж байгаа Анагаахын шинжлэх ухааны үндэсний их сургуулийн ЭМНЭЛГИЙН барилга төслийн монголын талын хөрөнгө /Улаанбаатар/” хэмээн зарлажээ.

Барилгын нэрийг маш хурдан өөрчлөнгүүтээ яаран шууд тендер зарлуулжээ. 

-ТЕНДЕРТ ЯМАР Ч ӨРСӨЛДӨГЧГҮЙГЭЭР НАЙЗЫНХ НЬ КОМПАНИ ШАЛГАРСАН НЬ-

ХОЁРДУГААРТ,

Санхүүжилт нь төсөвт суучихсан барилгын ийм том төслийн тендерт Монгол Улсын барилгын компаниудаас “Эрдэнэт Орчлон” хэмээх ганц л компани саналаа ирүүлж, өрсөлдөгчгүйгээр сонгогджээ.  

Эл компани түүний найзын компани гэгддэг яриа бий. 12.9 сая төгрөгийг тэрбумын дүн бүхий тендерт шалгарсан компани эхний ээлжинд 856 сая төгрөг авсныг баримт харуулдаг.

-НАЙЗЫНХАА КОМПАНИД ТЕНДЕР ӨГӨӨД ЗОГСОХГҮЙ, ХҮҮГ НЬ ЯАМАНД АЖИЛД ОРУУЛСАН ГЭХ-

Сайд асан Ц.Цогзолмаа нь “Эрдэнэт-Орчлон” ХХК-ийн захирал найз Б.Султаны хүү С.Тогтохыг яаманд оруулж байсан тухай мэдээлэл баримттайгаа хөвөрдөг.

Тогтох гэгчийг Гадаадын төсөл, хөтөлбөрийн төсвийн төлөвлөлт, олон улсын байгууллагын уялдаа, зохицуулалт хариуцсан мэргэжилтэн”-ий албан тушаалд 2018 оны наймдугаар сарын 21-ний өдөр хууль зөрчин томилуулж С.Тогтохыг төрийн албанд анх орох иргэний мэргэшлийн шалгалт өгөөгүйг төрийн албаны зөвлөл шалган тогтоосон байдаг аж.

-ГАНЦААРАА ШАЛГАРСАН ЭРДЭНЭТ-ОРЧЛОН ЯМАР КОМПАНИ БЭ-

Хуулийн этгээдийн улсын бүртгэлийн мэдээллийн санд 2866099 регистрийн дугаартай эл компанийг 2006 оны зургадугаар сарын 21-нд Султан овогтой Хосцэцэг үүсгэн байгуулж байжээ.

Хамтран эзэмшигчээр Гончиг овогтой Баярцэцэг гэх иргэний нэр бүртгэлтэй байдаг аж. Баярцэцэг нь Хосцэцэгийн ээж юм. Компанийн хаяг нь Орхон аймгийнх.

-ЯМАР Ч ТӨСӨВГҮЙ ЭМНЭЛГИЙГ Д.САРАНГЭРЭЛ САЙД ЯАМАНДАА АВАХААС ТАТГАЛСАН НЬ-

Ямартай ч дээрх 14.1 тэрбумын будлиан намжсаны дараа 2020 оны улсын төсөвт дахин хөрөнгө тусгуулжээ.

Тус сургуулийн удирдлагууд 2020 онд шаардлагатай 17.9 тэрбум төгрөгийн урсгал зардлын төсвийг хугацаандаа ЭМЯ-нд өгсөн ч  төслийн санал нь ЭМЯ, Сангийн яам, Засгийн газраар дамжаад УИХ-аар Улсын төсөв хэлэлцэх явцад дөрөв дахин танагдаж, 4.5 тэрбум төгрөг болж батлагджээ.

Гэвч энэ 4.5 тэрбум төгрөг хаанаа ч хүрэхгүй дуусахын цагт өдгөө эмнэлэг хаалгаа барих асуудал дахин хурцдаж байгаа нь энэ.

Асуудал бишдээд ирэхийн цагт АШУҮИС-ийг ЭМЯ-ны харъяа болгох гэж түлхэж үзжээ. Гэвч ямар ч төсөв мөнгөгүй хүндхэн болгосон эмнэлгийг Д.Сарангэрэл сайд өөрөөсөө түлхсэн гэдэг. Ямартай л дүүргийн эмнэлэг болгоно, MCS компани авах гэж байна гэх мэдээлэл нийгэмд хөврөх.

-САЙД АСАН Ц.ЦОГЗОЛМАА АТГ-Т ШАЛГАГДАЖ БАЙГААД ХЭРЭГ НЬ ХААГДЖЭЭ-

Эл хэргээр будлианы эзэн гэгдээд буй сайд асан Ц.Цогзолмаа АТГ-т шалгагдаж байсан тухай мэдээлэл бидэнд олдсон юм.

Энэ дагуу бид АТГ-аас тодруулахад: УИХ-ын гишүүн Ц.Цогзолмаа шалгагдаж байсан нь үнэн. Гэхдээ хэрэг бүртгэлтийн хэрэг хаагдсан гэх мэдээллийг бидэнд өгсөн юм.

Чухам ямар үндэслэлээр хэрэг хаагдсан нь тодорхойгүй ч эмнэлгийн барилгын хөрөнгийн хэргээр АТГ-ын үүдийг татаж байсан нь батлагдав.

-Ц.ЦОГЗОЛМАА: НАМАЙГ АЖЛАА ӨГСНИЙ ДАРААХ ПРОЦЕСС, НАДТАЙ ЯМАР Ч ХОЛБООГҮЙ-

Дээрх бүх мэдээлэлд тал бүрийн байр суурьтай, тэнцвэртэй хандах үүднээс бид БСШУС-ын сайд Ц.Цогзолмаатай өөртэй нь холбогдож тодруулсан юм.

Гэвч тэрээр, “Намайг ажлаа өгсний дараа шийдэгдсэн. Надтай ямар ч холбоогүй асуудал. Найзынхаа компанид тендер өгсөн гэдэг худлаа” хэмээх хариултыг өгөөд утсаа салгасан юм.

Түүний хувьд 2019 оны хоёрдугаар сарын 01-нд БСШУС-ын сайдын албан тушаалаас нь огцруулсан билээ. Тэгвэл 2018 онд ялангуяа наймдугаар сард сайдаар ажиллаж байсан нь тов тодорхой.

-Ж.ЦОЛМОН: ЗАСГИЙН ГАЗРААС ШИЙДВЭР ГАРСНЫ ДАРАА ТАЙЛБАР ӨГНӨ-

АШУҮИС-ийн захирал Анагаах ухааны доктор, профессор Ж.Цолмон Ц.Цогзолмааг сайд байхад эл албан тушаалдаа томилогдсон хүн. Сургуулийн сургалтын эмнэлгийн гацалт, үүд барилтыг яах аргагүй мэдэх учиртай. Тиймээс бид сургуулийн эмнэлэг хэрхэн, яагаад үүдээ барихад хүрсэн талаар тодруулахыг оролдсон юм.

Гэвч тэрээр, өчигдөр /2020.03.15/ Сангийн сайд Ч.Хүрэлбаатар энэ талаар тодорхой хариулт өгснийг сонсоогүй юу. Маргаашийн /2020.03.18/ Засгийн газарын хуралдаанаар энэ асуудлыг хэлэлцэнэ. Тодорхой шийдвэр гарсны дараа хариулт өгнө гэж хэлээд утсаа салгасан юм.

-ӨНӨӨДӨР ЗАСГИЙН ГАЗАР ШИЙДВЭР ГАРГАНА-

Будлиантай эмнэлгийн асуудлаар эмч, багш нар тэмцсээр төрд бичгээ хүргэжээ. Энэ дагуу өнөөдрийн хуралдаанаараа Засгийн газар хэлэлцэж, шийдвэр гаргах сурагтай.

ДҮГНЭЛТ:

Дэлхийн эмч бэлддэг сургуулиуд хажуудаа сургалтын эмнэлэгтэй байдаг. Монголчуудын биелэшгүй мөрөөдөл Японы татварын мөнгөөр сүндэрлэсэн гэдгийг дахин тодотгоё. Гэвч ганц хоёрхон хүний шуналын эрх ашиг бүхэл бүтэн төслийг гацааж, ард түмнээ яаж басамжилж, хөрөнгө оруулагчаа хэрхэн гомдоож болдог гэдгийг тодоор харуулж байна.

Энэ мэдээнд өгөх таны үнэлгээ

Хуваалцаарай Жиргээрэй