ВИДЕО: Ээж нь гялс бараагаа хүргэчхээд, "гого" аваад ирье

Саажилттай хүүхдээ харахын хажуугаар өрхийн үйлдвэрлэл эрхлэгч Д.Хандмааг онцолж байна. Тэрбээр охиныгоо төрүүлэхээс өмнө оёдлын цех, үйлдвэрүүдэд ажиллаж байжээ. Ийнхүү туршлага, мэдрэмж нь түүнд өнөөдөр өрхийн үйлдвэрлэл эрхлэх хүч өгчээ.

Юу, юу оёдог вэ гэж үү?

-2019 онд бизнес санаагаа даавуун торноос олж байсан. Тухайн үед хүмүүс ч даавуун тор сонирхож, би ч өнгө өнгийн даавуун тор хийн 1500-2000 төгрөгөөр зардаг болов. Захиалагч ч нэмэгдэж, түүний хэрээр урам зориг төрнө. Гэвч тухайн үед надтай адил даавуун тор зарж буй хүн олширсон. Иймд би хүүхдийн баривч оёж эхэлсэн. Эхлээд фэйсбүүкийн найзууд, тэдний найзууд захиалга өгдөг байсан. Харин одоо бол хүмүүс намайг дэмжээд захиалга их өгч байна.

Хүүхдээ харахын хажуугаар өдөрт таван баривч оёчихдог. Цагаа сунгаад оёх юм бол таваас илүүг оёно. Өнөөдрийн байдлаар "Эх хүүхдийн эрүүл мэндийн үндэсний төв"-өөс 10 баривч хийлгэх захиалга ирсэн. Ингээд нийтдээ 30 гаруй захиалга авчихсан байгаа. Материалын тухайд, будаг гарахгүй, даавуун солонгос материал.

Үнийн мэдээлэл

• 0-2 насны хүүхдийн баривч: 28000
• 0-2 насны хүүхдийн баривч, өмд 35000.
• 0-2 насны хүүхдийн баривч, өмд, малгай 40000
• 3-10 насны хүүхдийн баривч, өмд, малгайг хэмжээг нь өгөөд хийлгэж болно. Хэмжээнээсээ хамаараад үнэ нь харилцан адилгүй.
• Энгэрэвч 5000 (Хулдаасан материалтай. Арыг нь өлгийний үстэй даавуугаар хийсэн)

Захиалга өгөх иргэд 88646035 утсаар холбогдоорой.

Оёдлын машины түүх

-Тархины саажилттай хүүхэдтэй нэгэн ээж "Улаан загалмайн нийгэмлэг"-т төслөө өгөхийг зөвлөсөн. Өмнө нь хороондоо төсөл бичиж өгөөд шалгарч байгаагүй юм. Тэр утгаараа итгэл муутай байсан юм. Гэхдээ юмыг яаж мэдэх билээ гээд явууллаа. Тэгсэн төсөл маань шалгарчихжээ. Ингэж л "Улаан загалмайн нийгэмлэг"-ээ 3 сая төгрөгийн тоног төхөөрөмж манайд ирсэн юм. Энэ тоног төхөөрөмжөөр л амьдралаа аваад явж байна, охин бид хоёр.

Гого!

-Охин маань 12 настай. Дөрвөн мөчний чангаралтай. Байнгын эмчилгээ хийлгэдэг. Охины аав найман сартай байхад нь хаяад явчихсан. Одоо ямар ч холбоогүй байдаг. Хүүхдийн тэтгэмж өгч байгаад 2021 оны наймдугаар сараас хойш тэтгэмжээ өгөхгүй байгаа. Саажилттай хүүхэдтэй хүнд ажил олддоггүй. Гэрээрээ юм хийхгүй л бол ганц асаргаагаар хүрэлцдэггүй. Охин таталтын эм ууна. Тархины цусан хангамжийн тариа тариулдаг. Дээрээс нь живх хэрэглэдэг. Хэрэглээ жаахан өндөртэй. Дээрээс нь тог, нүүрс гээд ахуйн хэрэглээний зардал гарна. Бид асаргааны 411 мянга, хүүхдийн 100 мянган төгрөгөөрөө болгоод л байна. Хадгаламжид бол одоохондоо хийж чадахгүй байгаа.

Нөхөртөө эхэндээ гомддог байсан бол одоо ч гомдохоо больсон доо. Хүүхдээ ганцаараа өсгөж буй тул шантрах үе гарна. Гэхдээ тэр үеийг тэвчээд гарна даа. Шүд зуугаад өнгөрнө. Охиныгоо, баяр баяслыг нь хараад өөдрөг болно. Захиалга өгөөд дэмжиж байгаа хүмүүсээс маш их урам зориг авдаг. Охиноо асрахад хүртэл урам зоригтой болчихдог.

Миний хувьд бүтээгдэхүүнээ өөрөө хүргэж өгдөг. Тиймээс захиалагч нартаа 1-2 хоногийн дотор хийнэ гэж хэлдэг. Захиалгуудаа хүргэж өгөхөөр гарахдаа охинтойгоо сайн ярилцаж байж гардаг. Ээж нь гялс юмаа хүргэж өгөөд, "гого" аваад ирье гэхээр бөөн баяр болдог. Миний охины "гого" юм нь тараг, зөв аарцны ундаа хоёр. Тэр хоёрыг нь авчирч ирж өгдөг.

Асуудал

-Охин маань аравдугаар цэцэрлэгт 6 нас хүртлээ явж байгаад 70 дугаар тусгай сургуульд орсон. Одоо тэндээ бүртгэлтэй цахимаар хичээлдээ явж байгаа. Сургууль руу зөөхөд хүндрэлтэй. 70 дугаар сургууль Модны 2-т, манайх Нарангийн голд. Гэрээс ойр саажилттай, 12 настай хүүхэд авах сургууль, төв байхгүй. Уг нь би өөрөө ч гэсэн нийгэмтэй ойр, хүүхдээ ч гэсэн нийгэмтэй ойр байлгахыг хүсдэг. Тэр ч утгаараа заавал тусгай сургуульд биш гэрт ойрхон энгийн сургуульд өгөх гэж үзсэн. Манай хүүхдэд арай хүнд байна. Бас мэргэшсэн багш байхгүй гээд аваагүй. Уг нь бол эрдэм сургахдаа гол нь биш хүүхдүүдийн дунд нийгэмшүүлэх л чухал байгаа юм.

Видео ярилцлагын төгсгөлд тэрбээр "Саажилттай хүүхдээ хараад гэрт удаан суухаар жаахан бухимдах гээд байдаг. Тиймээс өөрийгөө завгүй байлгаж, гоё юм, ер нь бол ирээдүйгээ бодох хэрэгтэй" хэмээн ээж, аавуудад дэм хайрлалаа.

Мөн таны мөрөөдөл юу вэ хэмээн асуухад "Охин минь л эрүүл болоосой гэж боддог. Тийм л мөрөөдөлтэй" хэмээсэн юм.

Энэ мэдээнд өгөх таны үнэлгээ

Хуваалцаарай Жиргээрэй