Эцэст нь Л.Оюун-Эрдэнэ Д.Амарбаясгалангийн намын, танхимын "босс" боллоо. Одоо хэрхэх вэ

Зүй тогтол: Л.Оюун-Эрдэнэ Д.Амарбаясгалангийн намын ба танхимын дарга боллоо

МАН-ын генсекийн өрөөнд сайд нар, УИХ-ын байнгын хороодын дарга нар очиж ажлаа тайлагнадаг. Түүнээс үүрэг чиглэл авдаг. Үүнийг Д.Амарбаясгалан ч өөрөө үгүйсгэдэггүй байсан.

Ордноос Л.Оюун-Эрдэнийн өрөөнөөс гараад, МАН руу Д.Амарбаясгалан руу орогсдын хөдөлгөөнийг эцэст нь нэг юм хязгаарлалаа. Ингэхдээ Д.Амарбаясгаланг ордон руу авчрах арга замыг хэрэглэв.

Гол оносон зүйл нь, Л.Оюун-Эрдэнэ намаа даргалж, Ерөнхий сайдаа хийж буйн хувьд Д.Амарбаясгаланг өөрийн "дор", удирдлагадаа авав. Хоёр парламент, нэг Ерөнхийлөгчийн сонгуульд дамнуулан, МАН-ыг ялалтад хүргэсэн гэгддэг Д.Амарбаясгалан ингэж Л.Оюун-Эрдэнийхээ захиргаанд ирэв.

Дүрэм: Д.Амарбаясгалан зайлшгүй ажлаа өгөх дараачийн томилгоог Л.Оюун-Эрдэнэ мэднэ

Утгачилбал, МАН ба Засаг, тэгээд парламент гэсэн гурван нэгж нь нэг захиргаанд орох боломж арай өсөв. Үүнд мэдээж цаг хугацаа орно. Бас МАН-ын генсекийг хэнд шилжүүлэхээс ихээхэн хамаарна.

Одоогийн дүрмийн 29.2-т, Ерөнхий нарийн бичгийн дарга орон тооны байх бөгөөд өөр ажил, АЛБАН ТУШААЛ эрхлэхийг хориглоно хэмээжээ. Тэгэхээр дүрмээ баримталбал ЗГХЭГ-ын даргын АЛБАН ТУШААЛ авсан Д.Амарбаясгалан МАН-ын генсекийн ажлаа өгөхөөр байна.

Генсекийг сонгох эрх нь, дүрмийнхээ 24.2.3-т зааснаар Монгол Ардын Намын дарга нь бүрэн эрхийнхээ хүрээнд Бага хуралд оруулах зохицуулалттай.

Логик: Л.Оюун-Эрдэнэ одоо У.Хүрэлсүхийн, Д.Амарбаясгалангийн хүнийг сонговол өөрөө 2024 онд жинхэнэ эвгүйднэ

Нэг. Я.Содбаатар, Б.Энхбаатар гэх У.Хүрэлсүхийн хүмүүс

Түүний оронд ЕТГ-ын дарга Я.Содбаатар, У.Хүрэлсүхийн хуурай дүү Б.Энхбаатар нар санаархлаа илэрхийлсэн гэх. Сүүлийн жилүүдэд Ерөнхийлөгчид хамгийн өндөр нөлөөг Ж.Энхбаяр, Я.Содбаатар нар үзүүлж буй. Саях засагт Ерөнхийлөгч нь таван сайдын суудал авахаар "чичирсээр" ҮХНӨ-ийг ёсчлохоор тээг хийж, тохирсон.

Тэгэхээр Я.Содбаатарыг МАН-ын генсек болгох аваас 2024 оны сонгуулийн санаачлагад У.Хүрэлсүхийн нөлөө өндөр хэвээр байна. Өөрөөр хэлбэл, Л.Оюун-Эрдэнэ мандатын хуваарилалтаа 2024 онд У.Хүрэлсүхтэй хамт хийнэ гэсэн үг.

Үүнээс л аль болох хурдан зугтахын тулд яагаад ч Л.Оюун-Эрдэнэ Я.Содбаатарын нэрийг Бага хурал руу оруулахгүй юм. ийм нөхцөлд Б.Энхбаатарын логик мөн адил билээ.

Хоёр. Ц.Бат-Энх, А.Ариунзаяа тэргүүтэй Д.Амарбаясгалангийн хүмүүс

Д.Амарбаясгалан өмнө нь Л.Оюун-Эрдэнийг танхимаа бүрдүүлэхэд нь орж ирээгүй. Энэ удаа хөшигний ард "хүчээр"сайдаар ирсэн гэж яригдаж буй. Түүнийг Төрийн ордонд тухалсны дараа МАН-ын генсекээр Ц.Бат-Энх, А.Ариунзаяа нар яригдсан.

Эдгээрийг мөн л Л.Оюун-Эрдэнэ дэмжих боломжгүй гэж харагдаж буй. Маш эрүүл ухаанаар бодоход ч тэр Д.Амарбаясгалангийн нам дээрх нөлөөллийг сааруулахаар түүнийг ордонд авчирчхаад, өөрийнх нь хүмүүсийг дэмжинэ гэдэг нь байх боломжгүй логик.

Одоо: Л.Оюун-Эрдэнийн сойх битүү морь хэн байх вэ

Дээрх тайлбарламжууд явсаар "За, л.Оюун-Эрдэнэ ямар ч байсан өөрийнхөө хүнийг л генсекээр томилуулах санал оруулах юм байна. Генсекээр хэн томилогдохоос түүний улс төрийн амьдрал ихээхэн хамаарах аж" гэсэн логикийг танд уншуулахыг зорив.

Цаг зуурын тэр, энэ генсек болно гэсэн мэдээлэлд автахгүй. Голчоор харвал ийм байгаа.

Тэгэхээр Л.Оюун-Эрдэнэ яг өөрийн үгээр, түүний зургаар, бодсоноор нь алхах хүнийг генсекээр "томилуулна" гэсэн үг. Хөшигний ард 4-5 залуу жагсааж үзээд,"Миний үгэнд орох, гэхдээ өөрийн гэсэн дүр үүсгэсэн хүнийг сонгоно" гэж дуугарсан гэх. Эдгээрээс харахад нэг тийм ирээдүйд холхон давхичих боломжтой, МАН-ын дарга нартаа толгойгоо дайгсад бус битүү морь гаргаж ирэх болов уу гэсэн таамаг байна.

Энэ мэдээнд өгөх таны үнэлгээ

Хуваалцаарай Жиргээрэй