MCS-ийн "Цаг нь ирлээ" реклам: Монголчуудын сэтгэлгээг 2017 онд гацсанд тооцож, Х.Баттулгад зориулсан мэт ёжлол

Автобусны буудлуудад МCS групп "Цаг нь ирлээ" гэсэн бичиг бүхий М банкныхаа зурагт хуудсыг битүү байршуулжээ.

Санах ой сайтай хэн бүхэнд энэ үг аль 2017 онд банк байгуулах хүсэлтээ Монголбанканд гаргаж, тэр нь явсаар 2022 оны намартай золгосон түүхийг санагдуулна.

Хэрвээ 2017 онд МCS шуудхан зөвшөөрлөө авчхаж чадсан бол гудманд яг өнөөдрийнх шигээ "Цаг нь ирлээ" гэх үгтэй самбараа хадах байсан уу.

Технологийн хөгжил өдөр хоногоор өсөж, гайхамшигт шийдлүүд хүний оролцоогүйгээр бүтсээр байна. Тийн байхад аль 2017 онд монголчуудад ямар үйлчилгээ үзүүлэхээ тодорхойлчихсон байсан банк эдүгээ 2022 онд "Цаг ирлээ" гэх үгийг ашиглах.

"Тэр үед сэтгэж төлөвлөснөө таван жилийн дараа ч монголчуудад санал болгоход шинэ хэвээр тусна. Яг л И-мартын нээлтэд олноороо очиж, СU, GS25 нэвтрэнгүүтээ хүнсний дэлгүүрийн эмээгийн хаалгыг хаасан шиг. Монголчууд соёлд ийм гэнэнээр даган баясдаг. Тиймээс л ийм үг ашиглаж болно".

Ингэж МCS-ийнхэн тооцсон тооцоолол эндээс үнэртэнэ. Энд бас эрхгүй нийтийг ийм хөнгөнөөр харж, урхидаж буй хүйтэн бизнес аргыг үл таашах мэдрэмж төрнө.

Нөгөө талд МCS группийн Ерөнхийлөгч Ж.Оджаргалын "Женко хаагаад байсан ч бид банкаа байгуулж чадлаа. Бидний цаг ирлээ" гэж хөхиүнээр бодсон байж болох логик ч харагдана.

Дээрх агуулгуудыг тайлбарлахын тулд уншигчдадаа хэдэн огноо ба хөшигний ар дахь нюансууд хэлье.

Он цагийн хэлхээс: 2016 онд М банк байгуулах бэлтгэлээ хангав

• 2016 оноос М төслийг эхлүүлж, Монголын анхны интернет банкийг байгуулах бэлтгэлээ хангасан байв.
• 2017.08.17-нд МCS групп М банк байгуулах хүсэлтээ Монгол банканд гаргасан.
• 2018.10.11-нд МCS групп Монголбанкны тавьсан бүх шаардлагыг бүрэн хангасан. Үүнд, банкны соёл, системийн хөгжүүлэлт, хүний нөөц, төлөвлөлт багтаж байв.
• 2019 оны дөрөвдүгээр сард Монголбанкнаас тэдний банк байгуулах хүсэлтийг түдгэлзүүлсэн.
• 2019 оны 6-12-р сарын хугацаанд МCS групп Монголбанкийг гурван шатны шүүхээр ялж, Дээд шүүхийн шийдвэрийг Төв банк биелүүлэх үүрэг хүлээв.
• 2022 оны намар М банкны зөвшөөрлийг өгсөн гэдгээ Монголбанкны Ерөнхийлөгч мэдэгдэж, МCS идэвхжүүлэлтээ ил эхлүүлээд байна.

Хөшигний ард: Х.Баттулга саатуулж, Л.Энх-Амгалан хөөцөлдөж явсан үе

• Өмнөх парламентын үед Л.Энх-Амгалан М банкийг бүртгүүлэх асуудлаар идэвхтэй хөөцөлдөж байв.
• Ерөнхийлөгч асан Х.Баттулга МCS-ийн банк байгуулах шийдвэрийг хөшигний ард дэмжихгүй байх тулгалтыг Төв банкны Ерөнхийлөгчөөс шаардсаар байв.
• Энэ шалтгаанаар Төв банкийг харьцангуй технократ түвшинд удирдана гэсэн хүлээлттэй байсан Х.Баяртсайханы албан тушаалыг Ерөнхийлөгчийн шахалтаар өгүүлж байв. Тэрбээр "М банк байгуулахад татгалзах зүйлгүй" гэх утгыг ил, далд илэрхийлж байсан нэгэн юм.
• Дараачийн Төв банкны удирдлага Б.Лхагвасүрэнг анх томилох үеэр М банкийг бүртгэхгүй байх тулгалтыг хөшигний ард хийсэн гэгддэг яриа нь 2019 онд Дээд шүүхээс шийдвэр гарсан ч зөвшөөрөл нь 2022 онтой золгосон хөтлөмжөөр харагддаг.
• Х.Баттулга Ерөнхийлөгчийн хувиар МАН-ын 32/33-ын бүлгээс Л.Энх-Амгалан сайд болох хувилбарыг удаа дараа буцааж байв.
• Улмаар Л.Энх-Амгалан Л.Оюун-Эрдэнийн танхимд сайд болж, Ерөнхийлөгч Х.Баттулгатай уулзахдаа "Би улс төржихөө больсоон" гэж босохдоо ёсолсон нь өмнө нь 2-3 удаа буцаагдсан айдастай холбоотой гэх логик харагддаг.
• Л.Энх-Амгалан эдүгээ сайдаар улиран сонгогдов, улс төржилтөө улам идэвхжүүлэв.

Тайлбарламж: Бүр 2016 оноос төслийн нэгжээ эхэлж, Монголын арилжааны банкуудаас шилдэг боловсон хүчнүүдийг сайн цалин хангамжаар авч, БНСУ-аас хөрөнгө оруулалтаа татаж, ажлын байраа хүртэл нээлттэй зарлаж эхлээд асар удчихсан төсөл энэ онд "амь" орж байна.

Өөрөөр хэлбэл, 5-6 жилийн өмнө М банк Монголд ямар соёл түгэхээ хэдийнэ тодорхойлчхоод байсан ч улс төрийн хувьд баахан адармаатай замыг туулжээ. Тийн атлаа тэр үеийн сэтгэмжээ эдүгээд огт хувиргалгүй "Цаг нь ирлээ" гэх эмблемээр шуудхан зах зээлд танилцуулчхаж байна.

Мэдээж шинэ төрлийн соёлд И-мартын нээлтэд хотынхон зорьж очсон шигээ дугаарлах нь тодорхой. Тийм гэнэн, шууд автамхай хэрэглэгчдийг МCS хэдэн жилийн өмнөх планаараа хөтлөхдөө ихийг бодох шаардлагагүй гэж тооцсон мэт.

Энэ мэдээнд өгөх таны үнэлгээ

Хуваалцаарай Жиргээрэй