Хэргийн мөрөөр: Ах дүү хоёрын нэг нь Дарханы зам, нөгөө нь Капитал банкны зээлтэй холбогдохын учир

Аравдугаар сарын 5-ны шөнийн 12.00 цагт ХХААХҮ-ийн Дэд сайд Ж.Бат-Эрдэнийг АТГ-аас 48 цагийн хугацаатай дайчлан баривчилсан.

Аравдугаар сарын 6-ний шөнө Ж.Батзанданг АТГ-аас прокурорын зөвшөөрлөөр 48 цагийн хугацаатайгаар мөн л дайчлан баривчилсан.

Ж.Бат-Эрдэнийг Дарханы замын тендертэй холбоотойгоор найман албан тушаалтныг яллагдагчаар татсаны нэг нь хэмээн АТГ-аас тайлбарлаж буй.

Ж.Батзанданг өөрийн туслахаараа дамжуулан "Хөгжлийн банк"-ны дамжуулан зээлдэгч "Капитал банк"-наас 12.6 тэрбум төгрөгийг зээлж аваад эргэн төлөөгүй хэрэгт буруутгаж буй.

Ах дүү хоёрын Ерөнхийлөгчтэй холбогдох учир ба баривчлагдсан он цаг

Аравдугаар сарын 5-ний өдрийн 12.00 цагт Ж.Батзандан Ерөнхийлөгчид таван анхааруулга, завлөмж бүхий лайв хийсэн. 15.00 цагт Ерөнхийлөгч У.Хүрэлсүхээс Ж.Батзанданд анхааруулга бүхий вайбар ирсэн. Түүний дараа АТГ-аас "Ахыг чинь Ерөнхийлөгчийн чиглэлээр баривчлах гэж байна" гэх хов ирсэн. Шөнийн 12000 цагт ах Ж.Бат-Эрдэнийг нь баривчилсан. Эл логикийг Ж.Батзандан өөрөө хэлсэн байдаг.

Шөнийн 12.00 цагт Ерөнхийлөгчтэй чаталсан чат олон нийтэд ил болсон. Аравдугаар сарын 6-ны өдрийн 14.30 цагт ШИНЭ намын байранд Ж.Батзандан хэвлэлийн хурал хийж, мэдээлэл өгсөн.

Нэг. Ж.Бат-Эрдэнэ ба Дарханы замын тендер

Ерөнхийлөгч рүү дайрснаас болж ахыг нь буюу найзыгаа сүрдүүлэн баривчилсан гэх логик. Гэхдээ ах нь наймдугаар сараас хойш Дарханы замын асуудлаар АТГ-т шалгагдаж эхэлсэн НАЙМАН хүний нэг болж таарсан.

Ж.Батзандан ахыгаа өмөөрч хэвлэлийн хурал хийх үеэрээ "Манай ах Дарханы замын тендертэй холбоогүй. Тендер зарлагдах үеэр У.Хүрэлсүхийн зөвлөхөөр ажиллаж байсан. Хэрэв холбоотой болж таарч байвал У.Хүрэлсүхтэй нь хамт шалгагдах ёстой" хэмээсэн билээ.

Гэхдээ Дарханы зам дээр НЭГ биш ДОЛООН удаа тендер зарлагдсан байдаг. Харин Ж.Бат-Эрдэнэ ЗХЯ-нд ганц жил завсарласныг эс тооцвол долоон жил ЗТХЯ-нд албан тушаал хашсан байгаа юм.

Дарханы замын тендер зарлалтын бараг бүх үед тэр эл яаманд байж таарсан гэсэн үг.

ЗТХЯ-нд алба хашилтын он цагийг хөөж үзвэл: 2015 онд ЗТХЯ-ны ТНБД-аар томилогдон ажиллаж эхэлсэн. Улмаар яаманд нь хүн амины ноцтой хэрэг гарсантай холбоотойгоор хариуцлага хүлээн 2018 оны наймдугаар сарын 12-нд сайд нартайгаа хамт огцорч байв. Улмаар 2019 оноос Ерөнхий сайд У.Хүрэлсүхийн орон тооны бус зөвлөхөөр ажиллаж байгаад 2020 оны долдугаар сарын 16-нд Зам тээврийн хөгжлийн Дэд сайдаар томилогдсон. 2022 оны есдүгээр сард яам сэлгэн ХХААХҮ-ийн Дэд сайд болоод байсан билээ.

Дэд сайд Ж.Бат-Эрдэнээр ахлуулсан ажлын хэсэг Дарханы замыг дуустал тэндээ амьдрах үүрэг авцгаасан хэмээн чухам сүржигнэж нэг сар гаруй хугацаанд Дарханд амьдарсан байдаг. Тухайн үеэрээ 1.4 саяыг ХООЛОНД, 4.6 саяыг БАЙРАНД зарцуулсан 30 хоногийн томилолтын эцэст ХХААХҮ-ийн яам руу сэлгэн томилогдоод яваад өгсөн билээ.

Улаанбаатар-Дархан чиглэлийн 204 км автозамыг тав хувааж, тус бүрд нь тендер зарладаг БНХАУ-ын дөрвөн компани шалгарч байв. Манай Засгийн газар, Азийн хөгжлийн банктай хамтран “Бүс нутгийн авто зам хөгжүүлэх зам засвар, арчлалтын төсөл”-ийг хэрэгжүүлэхээр тус бүр 60.0 сая ам.доллар, нийт 120.0 сая ам.долларын дүн бүхий МОН-3679, МОН-3786 дугаартай зээлийн гэрээг 2018 оны долдугаар сарын 23, 2019 оны аравдугаар сарын 2-нд тус тус байгуулж байв. “Бүс нутгийн авто зам хөгжүүлэх зам засвар, арчлалтын төсөл” гэдэг нь Улаанбаатар-Дархан чиглэлийн 204 км авто замыг сэргээн засварлах, шинэчлэх төсөл юм. Ийнхүү санхүүжилтийн гэрээ хийгдсэний дараа ЗТХЯ-ны Төрийн нарийн бичгийн даргын тушаалаар тендерийн Үнэлгээний түр хороог байгуулж, өнөөг хүртэл хэл ам дагуулж буй дөрвөн Хятад компанийн сонгон шалгаруулсан. Ингэж анх эхэлсэн.

Хоёр. Ж.Батзандан ба Капитал банкны 12.6 тэрбум

Капитал банк "Хөгжлийн банк"-нд 57 тэрбум төгрөгийн өртэй. Эл банк Хөгжлийн банкны зээлээ төлж чадахгүй өрөнд баригдаж дампуурсан гэх процесс. Харин Капитал банкны хамгийн том зээлдэгч нь “Азийн бамбар” ХХК, “Элит цамхаг” ХХК-иуд. 12.6 тэрбумыг зээлсэн эл компаниуд ШИНЭ намын Г.Аюулгүйнх.

Гэвч Улсын бүртгэлийн мэдээллийн санд өөрийнх нь нэр дээр бүртгэгдэж байсан компаниудаа Г.Аюулгүй "дампууруулах шүүхийн шийдвэр" гаргуулаад зээлээс бултаж өдий хүрч иржээ.

Г.Аюулгүй Ж.Батзандан нарын холбоо хамаарал: Ж.Батзандан 2004 онд “Эрүүл нийгэм-Иргэний хөдөлгөөн”-ийг байгуулж, төв талбайд жагсаж явах үед арын албанд Г.Аюулгүй хүчин зүтгэснээс тэдний харилцаа эхэлжээ. 2012 онд Ж.Батзанданг УИХ-ын гишүүн болоход туслах, зөвлөхөөр нь ажиллаж эхэлжээ. ШИНЭ намыг байгуулж, 2019 оны зургадугаар сарын 6-нд Төрийн ордонд анхдугаар их хурлаа хийхэд Намын байгуулалт хариуцсан дэд даргаар нь томилогдон ажиллажээ.

Тэд 2004 оноос салшгүйгээр хамт явж ирсэн тэдний харилцаа ийм. Туслах, ШИНЭ намын дэд дарга, басхүү бизнесийн хамтрагч.

Тиймээс хуулийн байгууллагынхан Г.Аюулгүйн зээлийн ард түүний дарга Ж.Батзанданг байгаа гэх сэжмээр шалгаж эхэлсэн бололтой.

Энэ мэдээнд өгөх таны үнэлгээ

Хуваалцаарай Жиргээрэй