АН-ын толхилцоон: С.Эрдэнэ нэр дэвшихээр зүтгэж, Х.Баттулга сөрөг шахалт үзүүлж, "нялх сэнгүм"-үүд амбицлаж эхэлжээ

Ардчилсан нам эхлээд даргатай боллоо. Дараа нь гэрчилгээтэй боллоо. Тэгээд тамгатай боллоо. Эцэст нь бүтэн боллоо. Эвдрэл нь эвлэрлээ. Ингэж бодох хүмүүс олон байх. Гэвч харамсалтай нь тийм биш аж. Тус намын дотоодод зодоон үүсгэх шинэ сэдэв гарч иржээ. Тэр нь намын жагсаалтаар сонгуульд нэр дэвших квот.

Сонгууль дөхсөн энэ цаг үед Л.Гантөмөр шиг үнэ цэнтэй хүн АН-д одоогоор алга. Учир нь түүний гарт намын жагсаалтаар нэр дэвшүүлэх эсэх эрх бий.

-АН-ын бүлэг жагсаалтаар нэр дэвших квотоо булаацалдсанаар хагарлын ан цав үүсжээ-

Энэ квотын улмаас ялангуяа намын бүлэг ойрд эв түнжин тун тааруу байгаа аж. Тэдний толхилцоон намын жагсаалтаар нэр дэвших квот дээр тохирч чадаагүйгээс үүдэж эхэлжээ.

Эхний ээлжинд одоогийн УИХ-ын гишүүдийнхээ ихэнхийг нь жагсаалтаар шууд оруулах тухай яригдсан байна. Гэвч заримыг нь оруулахгүй гэдэг бодлыг намын дарга нь өвөртөлж яваа. Чухам үүний улмаас бүлгийн гишүүдийн ирц тааруухан, идэвх сул, хурлаа дөнгөн данган хийсээр энэ долоо хоногийн ҮХНӨ-ийн сурталчилгаатай золгожээ.

Намын жагсаалтын квотоос үүдээд Д.Ганбат дахин Бүлгийн дарга болно гэх санаархлаа С.Эрдэнээр дамжуулан хийлгэж эхэлсэн гэгдэж буй юм.

-С.Эрдэнэ ч залуустайгаа жагсаалтаар орно гэж хүсэж, Х.Баттулга түүнийг хяхах шахаасыг Л.Гантөмөрт үзүүлжээ-

Төр нийгмийн нэрт зүтгэлтэн С.Зориг агсны төрсөн өдрөөр тамгаа аваад Л.Гантөмөр дээр хүрээд ирсэн С.Эрдэнийн эцсийн хүсэл бас л сонгуульд нэр дэвших эрх.

Тэрбээр хэд хэдэн залуусынхаа хамтаар намын жагсаалтаар орох хүслээ илэрхийлж суугаа аж.

Гэхдээ нөгөө талд экс Ерөнхийлөгч Х.Баттулга С.Эрдэнэ ба түүний нөхдөд “жагсаалт өгөхгүй байх” шахаасыг Л.Гантөмөрт үзүүлж буй. Мөн С.Баярцогтыг намаас хөөх шахалтыг ч давхар үзүүлжээ.

С.Эрдэнэ, Х.Баттулга, С.Баярцогт нарын хажуугаар З.Нарантуяа ч бас намын жагсаалтаар орж ирнэ гэдэгтээ итгэл төгс суугаа аж.

С.Эрдэнийн хүсэл, АН-ын дотоод асуудал хоёр үүгээр дуусахгүй. АН Дэд дарга, НБД-ын суудал асуудалтай байна. Тодруулбал, Эл хоёр суудлыг С.Эрдэнэ авна гэж анхнаасаа тохирсон гэх мэдээлэл хөвөрсөн. Энэ ёсоороо АН-ын дэд даргаар Д.Эрдэнэсувд, нарийн бичгийн даргаар Ц.Уртнасангаа оруулж ирнэ гэж зөрүүдэл суугаа аж.

-Жагсаалтаар нэр дэвшихийг хүсэгч АН-ын “нялх сэнгүм”-үүдийн хэрс хөвөрч эхлэв-

Томчуулынхаа толхилцооны зай сиймхийгээр эл намын “нялх сэнгүм”-үүд нэр дэвшихээр горилж суугаа гэх мэдээлэл бий.

Тухайлбал, "Фортуна" Н.Батбаярын охин Б.Жаргалмаа, Ардчилсан залуучуудын холбооны ерөнхийлөгч С.Эрдэнэболд, АН-ын Үндэсний бодлогын хорооны гишүүн М.Чимэддорж нарын залуус "нэр дэвшинэ, тэр тусмаа жагсаалтаар" гэдгээ их бага хэмжээгээр цухалзуулаад, гүйж яваа аж.

Сэтгүүлчийн тэмдэглэл: Олон нийт одоо л нэг сөрөг хүчинтэй болох нь, эрх баригчдын эсрэг дуугарах нь хэмээн магнай хагарч суугаа. Ялангуяа энэ намын гишүүд, үнэнч дэмжигчид. АН-ыг эвлэлдсэн нэгдсэн гэгдэж буй боловч дотоод нөхцөл байдал яг ийм л байна. Ялангуяа сонгуулиас үүдсэн толхилцоон ид өрнөөд эхэлчихсэн байгаа юм. Энэ байдлаараа 2024 оны сонгууль давах уу, үгүй юу гэдгээ ч зарим нь илэрхийлж ч суугаа аж. Намаа нэгтгэсэн хүн нь Л.Гантөмөр. Одоо эвдрүүлэх хүн нь Л.Гантөмөр болох вий гэдэг айдас байна. Энэ нь чухам түүний гарт байх намын жагсаалтаар нэр дэвших квотоос улбаалж болзошгүй нөхцөл байдал үүссэн гэхэд хилсдэхээргүй байна. Тиймээс цөөхөн хэдэн квотоо С.Эрдэнэ, Х.Баттулга талынхныг яаж гомдоохгүйхэн шиг хуваарилах вэ гэдэг бодлогоос эхлэх бололтой.

Өөрийн сэтгэгдлээ илэрхийл

Share Tweet