БНСУ-д ажилладаг Х: “Архи ууж гадуур явахгүй, асуудал үүсгэхгүй л бол гайгүй” гэсэн

БНСУ-ын Хууль зүйн яамнаас зургаадугаар сарын 12-ноос долоодугаар сарын 31-нийг хүртэл 50 хоногийн турш хараар ажиллагсдыг шалгаж, баривчилгаа явуулж эхлээд байгаа билээ. Энэ тухайгаа зургаадугаар сарын 8-нд мэдэгдэл гаргаж байв. Үүнтэй холбоотойгоор “харь нутагт визгүй, “хараар”хөдөлмөр эрхэлж байгаа монголчууд нэгнээ барьж өгөх нь элбэг байна” гэж бичицгээж буй. Иймд бид БНСУ-д Хөдөлмөрийн гэрээгээр дөрөв дэх жилдээ ажиллаж буй Х-тай холбогдож, нөхцөл байдлыг талаар товч тодрууллаа.

-Сайн байна уу, ажил амьдрал нь тавлаг уу. Эх орноо санаж байна уу?

-Сайн. Сайн байна уу. Ажил болоод амьдрал дажгүй сайхан байна. Эх орноо саналгүй яахав, их санаж байна.

-БНСУ-д очоод хэчнээн жил болж байна вэ. Одоо ямар ажил эрхэлж байна вэ?

-Миний хувьд одоогоос бүр дөрвөн жилийн өмнө БНСУ-д анх ирж байлаа. Анх янз бүрийн л ажил хөдөлмөр эрхэлж байсан бол одоо төмрийн үйлдвэрт хөдөлмөрийн гэрээт ажилтнаар ажиллаж байна даа.

-БНСУ-ын Хууль зүйн яамнаас гадаадын хууль бус ажилчдыг баривчлах ажиллагаа явуулж байгаа. Нөхцөл байдал хэр байна вэ, монголчууд баривчлагдаж байна уу?

-Томоохон үйлчилгээний газрууд, автобус болон автобусны буудал, метронуудад байнга шалгалтын ажиллагаа хийж байгаа харагддаг.

-Монгол Улсаас "хараар" гэж нэрлэгддэг хууль бусаар ажил хөдөлмөр эрхлэгчид хэр их баривчлагдаж, нутаг буцаж байна вэ?

-Бусад улс орноос ирж ажиллаж байгаа хүмүүстэй харьцуулахад харин ч харьцангуй бага баригдаж байгаа гэж сонссон шүү. Баривчилгаатай холбоотойгоор визгүй, “хараар” ажиллаж байгаа найз нар маань хэлэхдээ “Архи дарс ууж гадуур явахгүй, өөрөө л асуудал үүсгэхгүй л бол гайгүй" гэж байсан.

-Солонгосчууд гэхээсээ илүү элэг нэгтнүүд нэгнийгээ барьж өгөх нь их байгаа тухай мэдээллүүд дуулдаж байна л даа. Энэ хэр бодитой мэдээлэл вэ?

-Баривчилгаа эхлэхээс өмнө ийм тохиолдол мэр сэр гардаг байсан гэж сонссон. Сүүлийн үед чухам яг ямархуу байгааг би сайн мэдэхгүй л байна. Ер нь бол хүн чанарын л асуудал гэж боддог.

-“Хараар” ажиллахад ямар зовлон бэрхшээлүүд тулгарч байна вэ. Энэ тухай хамт ажилладаг найз нөхөд нь хуваалцаж хэлж байна уу. Визтэй ч гэсэн бэрхшээл тулгарч байна уу?

-"Хараар" ажилладаг эргэн тойрны хүмүүсээс харахад, сонсоход "хамгийн хэцүү зүйл нь эрүүл мэндийн тусламж үйлчилгээ авах асар өндөр үнэтэй" гэж хэлж байна лээ. Учир нь тэдгээр хүмүүс эрүүл мэндийн даатгалгүй. Тиймээс эмнэлгийн байгууллагын ямар нэгэн хөнгөлөлт эдлэх боломжгүй гэсэн үг юм. Энэ утгаараа бие хаа нь өвдлөө ч эмнэлэг явах нь ховор харагддаг. Өөрөө л өвчнөө давах гэж хичээцгээдэг юм шиг санагддаг. Баривчилгаа эхэлснээс хойш тэдгээр хүмүүс гадуур чөлөөтэй явах нь эрс багассан.

Ямар нэгэн байдлаар хүнтэй маргалдаад бэртэж гэмтсэн тохиолдолд цагдаа ч дуудах боломжгүй, эмнэлгийн ч тусламж үйлчилгээ авж чадахгүй үнэхээр хэцүү байдаг.

“Хараар амьдардаг гээд үл тоодог, яаж ч чадахгүй юм чинь” гэсэн хандлагатай хүмүүс мэр сэр байдаг. Бас үр хүүхэд, хань ижилтэйгээ хүссэн үедээ ч уулзаж чадахгүй, гэр бүл, эцэг эх, эх орноо санах, ганцаардах тохиолдол их байдаг гэж анзаарсан.

-Ярилцаж, мэдээлэл өгсөнд баярлалаа.

Өөрийн сэтгэгдлээ илэрхийл

Share Tweet