Төрийн наадмаа ганц үрээтэй зорьж ирсэн аав, хүү хоёрын гомдол

Дундговь аймгийн Луус сумаас төрийн наадамд ганц морь уралдуулахаар авч ирсэн аймгийн алдарт уяач Э.Улаанхүү.

Түүний хар үрээг 9 настай У.Алтангадас хүү нь унаж уралдсан. Уралдаад зөв талаар барианы зурхайд түрүүлж орсон нь бичлэгээс харагдаж буй. Хүү нь "Түрүүлчихсэн шүү дээ, аав аа” гэсэн бол уяач эр "Би хөдөөний хүн болохоор гайхаад л байна. Олон хүн хар үрээг минь түрүүлчихлээ" гэсэн дээ гэж зогсох.

Хар үрээг морь бариач хашиж, барианд оруулсан үрээ нь ХХААХҮ-ийн сайд асан З.Мэндсайханы хурдан хүлэг юм. Уяач өөрөө ч "Том сайд хүний морь юм гэнэ лээ, тэгэхээр бид нар шийдчихгүй байх аа" гэж ярьжээ.

Тэгвэл хуулинд,

Барианы үеийн зохион байгуулалт, морьдыг барих:

25.6.Уралдах морийг зурхайд урьдчилан аваачих, замаас оруулах, хөөх, саад хийх, уралдаж байгаа морьдыг тосон цулбуурдаж хөтлөхийг хориглоно. Ийм тохиолдол гарсан үед тухайн морьдыг уралдаанаас хасна.

26.2. Түрүү, айргийн таван морийг морь бариач барианы зурхай хойш пайзаар, хойших морьдыг уралдаанч хүүхдэд олгосон дугаараар, дуу дүрс бичлэгийн техник хэрэгсэл ашиглан цуваа дуудаж барина.

26.3. Барианд зэрэгцэж ирсэн морьдоос аль нэгнийх нь хушуу илүү гарсан бол тэр морийг урд нь барих ба хушуу илүү гараагүй бол зөв талын морийг эхэлж барина. Олон улсад хэрэглэгдэж байгаа дэвшилтэт технологи ашиглан дарааллыг тогтооно хэмээн тус тус заажээ.

Наадамчин олон үрээний уралдаан дээр шударга шийдвэр гаргахыг шаардсаар байна. Ямартай ч төрийн их наадамдаа ганц насыг зориулан уяж зорьж ирсэн унаач хүү, уяач аавын гомдлыг нэхэн хэлэлцэх биз ээ.

Б.БАЯРТ

Өөрийн сэтгэгдлээ илэрхийл

Share Tweet