ЭЦА-нд нэгжүүлсэн “Эрдэм транс” ХХК-ийнхан улсаас жил бүр 2.4 тэрбумыг авдаг

-Я.Эрдэмбилэг, Д.Хатанбаатар нарын өрөөг ЭЦА-ныхан нэгжжээ-

Уржигдар буюу есдүгээр сарын 12-ны өдөр “Эрдэм транс” ХХК-ны захирал Я.Эрдэмбилэг, гүйцэтгэх захирал Д.Хатанбаатар нарын албан өрөөнд ЭЦА-наас нэгжлэг хийжээ.

Тэднийг оруулж ирсэн автобусуудынхаа арлын дугаар болон оныг сольж, хуурамчаар бичиг баримт бүрдүүлсэн гэх хэрэгт сэжиглэн шалгасан байна.

Шалгалтын хүрээнд автобусуудын бичиг баримтыг хуурамчаар үйлдэж, хуучин автобусуудыг шинэ мэтээр Авто тээврийн үндэсний төв болон нийтийн тээврийн газарт бүртгүүлсэн болохыг тогтоосон гэгдэж буй юм.

-ТООЦООЛОЛ: Жилд 60 автобусны парк шинэчлэлээр 2.4 тэрбумыг улсаас авдаг-

Нийтийн тээврийн парк шинэчлэлтийн хүрээнд үйлчилгээнд явах 189 автобус оруулж иржээ. Үүний 135 автобусыг “Эрдэм транс” ХХК нь БНСУ-аас оруулж ирэн, улсаас санхүүжилт авсан. Гэвч БНСУ-д үйлдвэрлэгдсэн “Хьюндай” маркийн 135 автобусандаа хуурамч бичиг баримт бүрдүүлж, арлын дугаар, оныг нь засварлажээ. Ингэхдээ “Шинэ автобус оруулж ирсэн” гэж улсын төсвөөс санхүүжилт авч байжээ.

Сануулахад, одоогоос таван сарын өмнө буюу дөрөвдүгээр сард “Эрдэм транс” ХХК-ийн үйлчилгээнд гарч буй автобусуудын 50-60 хувь нь он засчихсан байдаг гэх шүүмжлэл гарч байв. 2019 оны байдлаар гэхэд 160 автобусныхаа 120-ыг нь үйлдвэрлэсэн оныг засч арлын дугаарыг өөрчилсөн байсан гэх.

ТООЦООЛОЛ: “Эрдэм транс” ХХК жилд 60 автобус парк шинэчлэх ёстой. Нэг автобусны парк шинэчлэлд 40 сая төгрөг зарцуулагддаг. Жилд ойролцоогоор 2.4 тэрбум төгрөг зарцуулах ёстой гэсэн. Гэтэл үйлдвэрлэсэн оныг нь хамгийн багадаа дөрвөн жилээр хойшлуулж арлын дугаарыг нь өөрчилбөл 9.6 тэрбум төгрөг хууль бус үйлдлээрээ олж болох тооцоолол гарч байгаа аж.

-“Эрдэм транс” ХХК-ийн эзэмшигчээр Я.Эрдэмбилэг ганцаараа бүртгүүлжээ-

Тус компани 2005 оны зургаадугаар сарын 20-нд үүсгэн байгуулсан гэж улсын бүртгэлийн нээлттэй мэдээллийн санд бүртгүүлжээ. Хувьцаа эзэмшигч, удирдах албан тушаалтан, эцсийн өмчлөгчөөр Ямааранзын Эрдэмбилэг ганцаараа бүртгэлтэй байдаг аж.

Харин компанийнх нь танилцуулгад:

• 2001 оноос Улаанбаатар хотын нийтийн зорчигч тээврийн үйлчилгээг эрхлэн ажиллаж,
• 2007 оноос Хот хоорондын зорчигч тээврийн үйлчилгээнд,
• 2015 оноос Улс хоорондын зорчигч тээврийн үйлчилгээнд явж эхэлсэн гэжээ.

-“Эрдэм транс” ХХК-ийн эзэмшлийн орон нутагт тээврийн үйлчилгээ эрхэлдэг охин компаниуд-

Нээлттэй мэдээллийн opendatalab.mn сайтад Эрдэм транс ХХК нь дөрвөн охин компанитай тухай мэдээлэл байна. Тэдгээрээс гурвынх нь хувь эзэмшигчээр бүртгэлтэй байгаа бол нэгээс нь хасагджээ.

Эрдэм-Өрнөх ХХК: Хувь эзэмшигчээр Эрдэмтранс бүртгэлтэй байж байгаад 2009 онд хасагджээ. Удирдах албан тушаалтан Гомбосүрэнгийн Мөнхбаяр бүртгүүлжээ. Гадаад худалдааны чиглэлээр үйл ажиллагаа явуулдаг.

Өрнөх Транс ХХК: Удирдах албан тушаалтан Ямааранзын Эрдэмбилэг бүртгэлтэй байна.

Хүслэнт-Ажнай ХХК: Эл компанийн хаяг Дорноговь аймгийн Сайншандад бүртгэлтэй байна. Хот хоорондын зорчигч тээврийн үйлчилгээ эрхэлдэг. Удирдах албан тушаалтанаар Цолмонгийн Эрдэнэ, эцсийн өмчлөгчөөр Ямааранзын Эрдэмбилэг нар бүртгэлтэй байна. Хувь эзэмшигчдээр Доржийн Алтангэрэл, Доржийн Алтансүх, Энхбаатарын Эрхэмбаяр, Эрдэмтранс нар бүртгэлтэй байж байгаад 2018 онд хасагджээ. 2019 онд Эрдэмтранс дахин бүртгүүлжээ.

Дорноговь аймагт ББСБ-ын үйл ажиллагаа эрхэлдэг,

Эрдэм авто транс ХХК: Компанийн хаяг Хэнтий аймгийн Хэрлэн суманд бүртгэлтэй байна. Хот хоорондын зорчигч тээврийн үйлчилгээ эрхэлдэг. Удирдах албан тушаалтанаар Дорждавгын Хатанбаатар бүртгүүлжээ.

Сэтгүүлчийн тэмдэглэл: Нийслэлийн авто замын түгжрэлийг бууруулах ажлын хүрээнд нийтийн тээврийг үе шаттай шинэчлэх ажлууд хийгдээд олон жил болж байгаа. Гэвч нийтийн тээврийн нөхцөл байдал дээрдэхгүй байгаа билээ. Ялангуяа энэ жил үйлчилгээнд явж байхдаа олон ч автобус шатсан байдаг.

Энэ мэдээнд өгөх таны үнэлгээ

Хуваалцаарай Жиргээрэй