Тойм: Томчууд суудлаа, гишүүд өрөөгөө, намууд ашиг сонирхлоо нэгтгэж, В.Путинд Ерөнхийлөгч эрс хариулав

-УИХ-ын 126 гишүүн тангараг өргөв-

Үндсэн хуулийн өөрчлөлт, сонгуулийн холимог тогтолцооны үр дүнгээр парламентад нэг эвсэл дөрвөн намын төлөөллийн 126 гишүүнтэй болов. Шинээр сонгогдсон 126 гишүүн тангараг өргөж, сандал ширээгээ олж, өрөөтэй болж учраа олох гэж хэсэг бужигнацгаав.

Эрх баригч МАН дотор эрх мэдлийн эвтэй, найртай хуваарилалт явагдав.

• УИХ-ын даргаар Д.Амарбаясгалан сонгогдож,
• Ерөнхий сайдаар Л.Оюун-Эрдэнэ улирч,
• ЕТГ-ын даргаар Г.Занданшатар сууж,
• УИХ-ын дэд даргаар Х.Булгантуяа, Б.Пүрэвдорж нар сууж,
• Л.Мөнхбаатар МАН-ын бүлгийн, О.Цогтгэрэл АН-ын бүлгийн даргаар улирав.
• МАН-ын генсекээр Я.Содбаатар суулаа.

Өөрөөр хэлбэл МАН-ын томчууд суудлаа олж сууцгаав.

-Хамтарсан Засгийн газар байгуулагдахаар болов-

Эрх баригч МАН хамтарсан Засгийн газар байгуулах саналаа АН болон ХҮН намын удирдлагуудад хүргүүлсэн.

АН 2024.07.04-ний орой Төрийн ордонд хуралдаж байгаад хүлээгээд авчихсан. Тус намд 6-7 сайдын суудал өгөх тохироотой. Л.Гантөмөр шадар сайд болох тодорхой байгаа юм. Харин ХҮН намын Төлөөлөх зөвлөл Засгийн газарт хамтрах МАН-ын саналыг өчигдөр шөнө хүлээгээд авчихсан. Тус намд өгөх сайдын нэг суудлыг Т.Доржханд эдэлж, Эдийн засаг, хөгжлийн сайд болно гэх мэдээлэл хөвөрч байгаа.

Ямартай ч энэ амралтын өдрүүдэд МАН, АН, ХҮН намаас хэн, хэн сайд болох тохироо хийгдэнэ. Ирэх даваа гарагаас буюу наадмаас өмнө Засгийн газар эмхлэн байгуулагдах юм.

-В.Путин атомын ЦС барьж өгөхөөр амласан ч манай улс ажиглагчаар үлдэнэ гэдгээ илэрхийлэв-

Казахстан улсын Астана хотод Шанхайн хамтын ажиллагааны байгууллага (ШХАБ)-ын гишүүн орнуудын Төрийн тэргүүн нарын зөвлөлийн өргөтгөсөн хуралдаан боллоо. Тус хуралдаанд манай улсын Ерөнхийлөгч У.Хүрэлсүх оролцсон.

Казахстанд манай Ерөнхийлөгч У.Хүрэлсүх ОХУ-ын Ерөнхийлөгч В.Путинтэй уулзсаныг онцлох үйл явдал байв. Товчхондоо, В.Путин атомын ЦС барьж өгөхөөр амласан ч манай улс ажиглагчаар үлдэнэ гэдгээ ойлгомжтой илэрхийлсэн явдал. Үүнээс хойд хөрш өөрсдийн гадаад бодлогыг бидэнд тодорхой хөшүүргээр тулгаж буйг харж болох юм. Өөрөөр хэлбэл, атомын цахилгаан станц барих санал тавьж, гол нээнтгээ болгож ирсэн шатахууны асуудалд санаа зоволтгүй гэж хэлэнгээ ШХАБ дахь статусыг хөндсөн хэрэг. Энэ нь ойрын хугацаанд "Бодож үзээрэй" гэсэн мессеж болж ойлгогдсон.

ШХАБ-ын уулзалтад оролцохдоо түнш орнуудтай хоёр болон олон талт форматын хүрээнд дээд, өндөр түвшний харилцан айлчлал, яриа хэлэлцээг тасралтгүй хийж ирснийг тэмдэглэж өгсөн. Мөн цаашид ч ШХАБ-ын оролцогч нийт улс оронтой худалдаа, хөрөнгө оруулалт, хүнс, хөдөө аж ахуй, уул уурхай, эрчим хүч, аж үйлдвэржилт, тээвэр ложистик, боомтын дэд бүтэц, байгаль орчин, ногоон хөгжил, аялал жуулчлал, мэдээллийн технологи болон хүмүүнлэгийн салбарт харилцан ашигтай хамтын ажиллагааг өргөжүүлэн хөгжүүлэхийг зорьж байгаа хэмээн мэдэгдсэн юм. Энэ нь манай улс байр сууриа ШХАБ-ын өмнө хамгаалсан явдал.

Өөрийн сэтгэгдлээ илэрхийл

Share Tweet