Газрын ховор элементийн амбиц: Мартагдсан "Монголросцветмет"-ийг өөрчлөн хөгжүүлнэ

Газрын ховор элементийн хайгуул, судалгааг эрчимжүүлнэ гэдгээ Засгийн газар өчигдөр шийдвэрлэсэн нэг асуудлаар илэрхийллээ. Энэ бол "Монголросцветмет" ТӨҮГ-ын нэр болон дүрмийг өөрчилсөн явдал.

"Монголросцветмет" бол жонш, алт, төмрийн хүдэр зэрэг цөөн хэдэн метал дээр ажиллаж ирсэн. Харин одоо нэрийг нь "Эрдэнэс критикал минералс" болгож өөрчлөв. Critical Minerals бол газрын ховор элементийн нэршил. Энэ утгаар хуучнаар "Монголросцветмет" ТӨҮГ-ыг бүхэлд нь өөрчилж, ГХЭ рүү чиглүүлэх нь.

Харин суурь байгууллагынх нь түүх ямар вэ?

“Монголросцветмет” Төрийн өмчит үйлдвэрийн газар нь БНМАУ, ЗСБНХУ-ын (хуучин нэрээр) Засгийн газар хоорондын хэлэлцээрийн дагуу 1973 онд Монгол-Оросын хамтарсан “Монголросцветмет” нэгдэл нэртэйгээр Монгол Улсын нутаг дэвсгэр дээр хайлуур жонш, үнэт металл болон бусад төрлийн ашигт малтмалыг олборлон баяжуулах, нөөцийг өсгөх зорилготой байгуулагдсан.

Харин 2007 оноос хязгаарлагдмал хариуцлагатай компани, 2019 оноос Төрийн өмчит үйлдвэрийн газар болж өөрчлөгдсөн.

1973 оноос 2016 он хүртэл Үйлдвэрийн газрын Дүрмийн сангийн 51% Монгол Улсын, 49% нь ОХУ-ын өмчлөлд байсан. 2016 оноос Монгол Улсын 100% төрийн өмчийн эзэмшилд шилжсэн.

Одоогийн байдлаар,

            - Хайлуур жоншны хүдэр олборлолт, баяжуулалт

            - Төмрийн хүдрийн олборлолт, баяжуулалт

            - Алт олборлолт, баяжуулалт

            - Хайрга, дайрга, элс үйлдвэрлэл

            - Геологи хайгуулын ажлын чиглэлээр тус тус үйл ажиллагаагаа явуулж байна.

Жилд 550-600 мянган тонн хайлуур жоншны хүдэр, 2.4 сая тонн төмрийн хүдэр олборлон, 320-400 мянган тонн төмрийн хүдрийн баяжмал боловсруулж, 110-120 мянган тонн жоншны баяжмал үйлдвэрлэн, 2.0 сая тонн алт агуулсан элс угааж нийт 1550 гаруй хүнийг ажлын байраар тогтмол ханган ажилладаг хэмээн сайтдаа дурджээ.

Харин "Монголросцветмет"-ийн үйлдвэрийн газар нь Улаанбаатар хот дахь захиргаанаас гадна Хэнтий аймгийн Бор-Өндөр суманд орших “Бор-Өндөр” уулын баяжуулах үйлдвэр, Төв аймгийн Заамар сумын нутагт орших “Шижир алт” алтны үйлдвэр гэсэн бүрэлдэхүүнтэй байна.

Тэгэхээр энд ихээхэн өөрчлөлт хийнэ. Бүтэц өөрчилнө, магадгүй даргыг нь солино. Шинэ компани байгуулахаас илүү энд суурилсан нь оновчтой байхыг үгүйсгэхгүй. Үр ашиггүй ТӨК-иудыг цөөлнө, нээлттэй болгоно гэдэг бодлогоо Засгийн газар илэрхийлээд байгаа. "Монголросцветмет"-ийн хувьд социализмын үеэс дархлагдан үлдсэн болохоос шинэ, шинэлэг хөрөнгө оруулалтын чиглэлд ахиагүй байгууллага юм.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй