УИХ-ын Ерөнхий нарийн бичгийн дарга Б.Баасандорж өчигдөр АНУ-ын Техас мужийн тойргийн шүүхийн шүүгч, профессор Мэтью Райт, Чарлез Вановер тэргүүтэй тус мужийн “Spurlock Judicial Fund” сангийн төлөөгчдийг хүлээн авч уулзлаа.
Тус сан Монголын өмгөөлөгчдийн холбоо, “Өмгөөлөгчдийн үйл ажиллагааг дэмжих төв” ТББ болон АНУ дахь “Ганзориг консалтинг” хуулийн фирмтэй хамтран эрүүгийн хэргийг тохиролцоогоор буюу хялбаршуулах шийдвэрлэх ажиллагааны талаар сургалт, судалгааны ажлыг явуулдаг байна.
Профессор Мэтью Райт хамтын ажиллагааны хүрээнд эрүүгийн хэргийг тохиролцоогоор шийдвэрлэх ажиллагааны талаарх сургалтыг АНУ болон Монгол Улсад тус бүр 3-4 удаа зохион байгуулаад байгааг танилцуулж, харилцан шүүгч, өмгөөлөгч, хуульчдыг солилцон, бодит туршлагыг судлуулах практик сургалт ихээхэн үр дүнтэй болж буйг онцолсон юм.
Хоёр улсын хуулийн зохицуулалт харилцан адилгүй байгаагаас шалтгаалж тус улсын шүүхэд эрүүгийн хэргийг хялбараар шийдвэрлэж буй сайн туршлагыг Монгол Улсын шүүхийн хэрэглээнд нэвтрүүлэхэд зарим хүндрэл учирдаг тул уг асуудлаар иж бүрэн, цогц судалгаа хийж, санал боловсруулахаар ажиллаж байгааг өгүүлж, үүнд дэмжлэг үзүүлэхийг хүсжээ.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.