Хэргийн мөрөөр: О.Тэмүүлэн аав болон Б.Баатарын хамт орлогоо нотолсон ч бөгжний үнэ тогтоохоор 30 хоног сунгажээ

Хураангуй:

• Орлогоо нотлуулахаар Б.Баатар, Л.Оюун-Эрдэнэ, О.Тэмүүлэн нар мэдүүлэг өгсөн.
• О.Тэмүүлэнгийн орлогын эх үүсвэр нотлогдсон
• Орлого нотлох шалгалтын ажиллагааны дүнг АТГ баяр наадмаас өмнө танилцуулна.

Дэлгэрэнгүй:

Ерөнхий сайд асан Л.Оюун-Эрдэнийн хүүгийн тансаг хэрэглээний асуудал газар авч, төв талбайд залуус “Огцрох амархан” уриатай жагсаалыг 20 гаруй хоногийн турш зохион байгуулсан. Түүнийг орлогоо нотлохыг шаардсан хэсэг ч байсан юм.

Улмаар Л.Оюун-Эрдэнийн Засгийн газар огцорсон. Ингэж жагсагчдын уриалга үр дүнд хүрсэн ч орлого нотлох асуудал нь үргэлжилж байна. Энэ бол хуулийн байгууллагаас шалтгаалах асуудал.

Иймд Ерөнхий сайд асан Л.Оюун-Эрдэнийн хүүгийн орлогоо нотлох асуудлыг эргэн сануулж, шалгалтын ажиллагаа хэрхэж буй талаарх мэдээллийг олон талын эх сурвалжаас зэрэгцүүлэн тодрууллаа.

-Өмнөх үйл явдлыг сануулах нь-

Найз охиндоо брэнд цүнх, бөгж авч өгснөөр аавыгаа Ерөнхий сайдын суудлаас буухад томоохон нөлөө үзүүлсэн О.Тэмүүлэн орлогоо нотлуулахаар сарын өмнө Лондон хотоос Монголд ирсэн. Мэдүүлгээ ч өгсөн.

Тодруулбал, Л.Оюун-Эрдэнийг хүү болон хадмуудын хамт шалгах, орлогыг нь нотлох хүсэлтийг иргэн Ц.Лут-Очир АТГ-т өнгөрсөн тавдугаар сарын 13-нд ирлүүлсэн байдаг. Улмаар холбогдох хүмүүсийг шалгаж эхэлсэн.

Тиймээс О.Тэмүүлэн өнгөрсөн сарын 21-нд Монгол Улсад ирж, АТГ-т мэдүүлэг өгөөд байгаа. Мөн бусад холбогдох хүмүүсээс баримт материалуудыг гаргуулан авч, байцааж, Ерөнхий сайд асан Л.Оюун-эрдэнийн хөрөнгө орлогын мэдүүлгийг шалгаж эхэлсэн.

Эдгээр шалгалтаар нотлогдсон зүйлсийг АТГ хуулийн дагуу сунгасан 30 хоногтоо багтаан мэдээлэх ёстой. Энэ хугацаа нь ирэх сарын дунд үеэр дуусах чигтэй байна.

-Орлого нотлох шалгалтын ажиллагаа юу болов-

АТГ шалгалтыг албан ёсоор өнгөрсөн тавдугаар сарын 23-наас эхэлж шалгасан.

Бидэнд олдсон мэдээллээр, орлого нотлохтой холбогдуулан Б.Баатар 12 удаа, О.Тэмүүлэн зургаан удаа биечилж, Л.Оюун-Эрдэнэ нэг удаа утсаар мэдүүлэг өгчээ. Мөн А.Амундра нарын бусад хүмүүс ч мэдүүлэг өгсөн гэх мэдээлэл байна.

Үүгээр О.Тэмүүлэн нь “Хэро энтертаймент” компанитай хамтарч, өөрийн компаниар орлого олсон нь нотлогдсон гэгдэж буй аж. Б.Баатарын хувьд зургаан жилийн турш 6.8 тэрбум төгрөгийн орлого олсноо бүрэн нотолжээ.

Гэвч АТГ шалгалтын ажиллагааг 30 хоногоор сунгаад байгаа.

Үүнийг О.Тэмүүлэнгийн найз охиндоо авсан бөгжний үнэ тогтоох машиныг гаднаас ирүүлж, шалгахаар болсонтой холбон тайлбарлаж байгаа аж. Угтаа О.Тэмүүлэн сүйн бөгжөө монголоос авсан бөгөөд үнийг дэлгүүр нь нотолж болох байжээ.

Нэг талаас бөгжний үнийг нотлох гэж байгаа ч шинэ Ерөнхий сайд танхимаа бүрдүүлж байхтай зэрэгцэн "Л.Оюун-Эрдэнэ орлогоо нотолж чадлаа" гэж мэдэгдэх нь утгагүй байдал үүсгэнэ. Иймд улс төрийн шалтгаанаар шалгалтын ажиллагааг 30 хоног сунгасан гэж мэдээлэх хэсэг ч байгаа юм.

Мөн Соёлын яамнаас хэрэгжүүлсэн "Go mongolia" хөтөлбөрийн хүрээнд сайд асан Ч.Номинг О.Тэмүүлэнгийн контент үйлдвэрлэдэг компанид давуу байдал олгосон гэх мэдээлэл түгээд буй.

Тэгвэл шалгалтын явцад сайд асан Ч.Номин болон "Go Mongolia"-тай холбоотой сэжүүр гараагүй. Тиймд АТГ уг асуудлаар Ч.Номин сайдаас мэдүүлэг аваагүй байна.

-О.Тэмүүлэнгийн орлогын эх үүсвэр-

Шалгалтаар О.Тэмүүлэн өөрөө энтертайнмент чиглэлээр үйл ажиллагаа явуулдаг компанитай. Тэрбээр өөрийн компаниар аав Л.Оюун-Эрдэнийнх нь 50 хувь эзэмшдэг “Хэро энтертайнмент”-тай хамтарч ажилладаг гэдгээ нотлуулж буй аж.

Тэгэхээр түүний орлогын эх үүсвэр нь өөрийн байгуулсан компаниараа “Хэро энтертайнмент”-тай хамтран хийсэн төслөөс улбаатай болж таарах бололтой.

Ерөнхий сайд асан Л.Оюун-Эрдэнийн ХОМ-д "Хүлэг контент" гэх компани бий. “Хүлэг контент” нь 2016 онд байгуулагдсан. Бизнесийн чиглэлээр зөвлөгөө өгөх зөвшөөрөлтэй компани бөгөөд захирлаар нь түүний гэргий Б.Туул ажилладаг.

Мөн Л.Оюун-Эрдэнэ "Миний том хүү студийн чиглэлээр үйл ажиллагаа явуулах сонирхолтой, тэр чиглэлээр юм хийдэг" гэж мэдэгдэж байсан. Энэ хүрээнд opendata нээлттэй мэдээллийн сангаас хайж үзэхэд, хүү О.Тэмүүлэнгийнх нь нэр дээр "Хүлэг контент энтертайнмент" гэх компани бүртгэлтэй байдаг.

Тус компани нь,

• Уран сайхны болон баримтат кино хийх
• Гэрэл зураг авах үйлчилгээ
• Дуу, дүрс, бичлэг хийх зэрэг хэд хэдэн чиглэлээр үйл ажиллагаа явуулдаг байна.

О.Тэмүүлэнгийн хувьд, 2021 онд Шинэ Эрин олон улсын сургуулийг төгссөн ч дотоодын их сургуульд суралцаагүй. Өнгөрсөн өвлөөс АНУ-ын Харвардын их сургуулийн хэлний бэлтгэлд хамрагдан суралцаж буй. Харин энэ зуурт буюу 2024 оны зунаас энтертайнмент салбарт хүч үзэж, хувиараа гэрэл зургийн студи ажиллуулдаг залуустай ч танил болжээ. Тус салбарынхан О.Тэмүүлэнг 2024 оны есдүгээр сараас мэддэг болсон байна.

Энэ мэдээнд өгөх таны үнэлгээ

Хуваалцаарай Жиргээрэй