Европын холбоо ОХУ-ын царцаасан хөрөнгөөр Украинд олон тэрбум ам.долларын тусламж өгч буй асуудлаар Унгарын засгийн газар шүүхэд өгсөн байна. Унгарын засгийн газар ОХУ-тай найрсаг харилцаатай, дайн эхэлснээс хойш Европын холбооноос Украинд үзүүлэх гэсэн тусламж болон Москвад тавих хоригт саад үзүүлсээр ирсэн. Үүний улмаас Будапешт болон Европын холбооны хэд хэдэн орны харилцаа муудсан юм.
Европын энх тайвны байгууллагыг (EPF) эсэргүүцсэн тэрхүү заргыг анх Европын холбооны шүүхэд мэдүүлсэн ч хэрэг одоо Ерөнхий шүүх рүү шилжсэн байна. Европын зөвлөл ОХУ-ын царцаасан хөрөнгөөс үүссэн хүүгийн орлогын 99.7 хувийг “EPF”-ээр дамжуулж Украинд илгээх шийдвэр өнгөрсөн жил гаргаж байсан юм.
Украин “EPF”-ээр дамжуулж 3-5 тэрбум еврогийн тусламж хүлээн авдаг билээ. Одоогийн байдлаар “EPF” Украинд 11 тэрбум еврогийн цэргийн тусламж үзүүлсэн байгаа.
Ерөнхий сайд Виктор Орбанаар ахлуулсан Унгар улсын засгийн газар уг арга хэмжээг эсэргүүцсэн заргыг анх тавдугаар сард мэдүүлсэн. Европын холбооны шүүх тус заргыг даваа гарагт /2025.08.27/ албан ёсоор хүлээн авч, Европын холбооны албан ёсны сэтгүүлд нийтэлсэн байна.
Тус улс нь хувь нэмрээ оруулдаггүй гишүүн гэсэн шалтгаанаар “EPF” Унгарын тавьсан хоригийг хэрэгсээгүйгээрээ Европын холбооны хуулийг зөрчсөн гэж Орбаны засгийн газар үзэж буй.
Шүүхэд мэдүүлсэн баримт бичиг дээр “Иймд гишүүн улсуудын тэгш эрхийн зарчим болон Европын Холбооны ардчилсан үйл ажиллагааны зарчим зөрчигдсөн байна. Учир нь нэг гишүүн улс хууль зүйн үндэслэлгүйгээр, зөвтгөх шалтгаангүйгээр санал өгөх эрхээсээ хасагдсан” гэж бичжээ.
Унгарын хэвлэлүүд тус хэргийн талаар мэдээлэхдээ энэхүү зарга нь гишүүн орны хориг тавих эрхийг хамгаалах жишгийг тогтоож магадгүй гэсэн юм. Гэхдээ Европын холбооны Ерөнхий шүүх тус хэрэг дээр шийдвэр гаргахын тулд олон жил шаардагдаж магадгүй.
Украины дайн эхэлснээс хойш АНУ болон түүний холбоотнууд ОХУ-ын эзэмшлийн 300 тэрбум ам.доллар бүхий хөрөнгийг царцаасан, хурааж аваагүй. Хөрөнгийн ихэнх нь Европын орнуудад байгаа бол АНУ-д 5 тэрбум гаруй ам.долларын хөрөнгө царцаагдсан байгаа юм.
Царцаасан хөрөнгийг ашиглан Украиныг сэргээн босголт болон зэвсэгт хүчинд нь санхүүжилт болгон өгөх талаар барууны орнууд өнгөрсөн жилээс эрчимтэй хэлэлцэж эхэлсэн. Өнгөрсөн жил АНУ-ын Ерөнхийлөгч Жо Байден ОХУ-ын царцаасан хөрөнгийг хураан авч, Киевт туслах зорилгоор ашиглах эрх үүсгэсэн хуульд гарын үсэг зурсан билээ.
Эх сурвалж: Euro News
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.