Их эзэн Чингис хааны мэндэлсний 863 жилийн ой, “Монгол бахархлын өдөр”-т зориулсан "Чингис хаан цом"-ын төлөөх, Улс, аймгийн алдар цолтой шилдэг 128 бөхийн барилдаан өнөөдөр 12.00 цагаас Монгол бөхийн өргөөнд болно. Тус барилдааны баруун, зүүн талыг Дархан аварга Н.Батсуурь, аварга О.Хангай нар магнайлан барилдана. Өнгөрсөн жилээс Монгол бахархлын өдрийн барилдааны түрүү бөхөд “Чингис хаан” цомыг олгож эхэлсэн. Тэгвэл энэ жил хоёр аварга, таван арслан, долоон заан барилдах бөгөөд чансаатай аймаг цэргийн арслангууд цолны эрэмбээр багтаж чадалгүй хасагдсан.
Чансаагаараа Улсын наадам, Цагаан сарын бөхийн барилдаануудын дараа орох тус барилдааны өнгөрсөн жилийн түрүү бөх Улсын харцага Э.Даш барилдахаар бүртгүүлжээ. Түүнчлэн өнгөрсөн жилийн үзүүр бөх улсын арслан Ц.Бямба-Отгон дутуугаа гүйцээхээр барилдана. Тэрбээр бөхийн өргөөнд зохиогдож буй "Алтан цом"-ын төлөөх барилдаанд 10 барилдаан хийж есөн даваа аваад буй.
Бөх сонирхогчдын тааварт зүй ёсоор нэрлэгдэх бөхчүүд бол Улсын арслан Б.Орхонбаяр, Э.Батмагнай нар. Б.Орхонбаярын тухайд энэ жилийн барилдаанд бүртгүүлээгүй юм. Тэрбээр Монгол, Солонгос улсын "Соёлын элч" болж, фенүүдтэйгээ уулзахаар БНСУ-ыг зорьсон гэх мэдээлэл байна. Харин Э.Батмагнайн хувьд бөхийн өргөөнд болсон "Алтан цом"-ын төлөөх барилдаан 10 барилдаж 10 даваа аваад буй. Ер нь унах тун дургүй байгаа юм. Залуу арслангийн хувьд өнгөрсөн жил тус барилдааны хоёрын даваанд Увс аймгийн арслан Б.Нямсамбууд өвдөг шороодсон байдаг. Энэ жил түрүүлэх өндөр магадлалтай гэж бөх сонирхогчид харж байгаа аж.
Мэдээж том барилдаанд том цолтнууд үлддэг. Яахын араггүй дархан аварга Н.Батсуурь, аварга О.Хангай нар түрүү бөхийн тааварт яригдана. Мөн заанууд дээшээ барилдах нь тодорхой. Түүнчлэн Б.Бат-Өлзий, М.Лхагвагэрэл болон залуу заан С.Сүхбат нар тааварт зүй ёсоор нэрлэгдэж байна. Харцагуудаас Б.Зоригтбаатар бүртгүүлээгүй бөгөөд Н.Золбоо, Т.Баасанхүү тэргүүтэй 12 харцага цолтон барилдана. Улсын начин цолтой 21 бөх хүч үзнэ.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.