АНУ-ын зүгээс Персийн буланд Америкийн цэргийн нисдэг тэрэг сөнөөгдсөний хариуд Ираны цэргийн болон тагнуулын ажиглалтын байгууламжуудад хэд хэдэн цохилт өгсөн гэж мэдэгдлээ.
АНУ-ын Цэргийн төв командлалын мэдээлснээр, Ормузын хоолойн ойролцоо байрлах агаарын довтолгооноос хамгаалах системүүд, газрын удирдлагын станцууд болон радарын байгууламжуудыг онилсон байна.
Үүний хариуд Ираны Исламын хувьсгалын хамгаалагчдын байгууллага бүс нутаг дахь АНУ-ын цэргийн баазуудын 21 бай руу цохилт өгсөн гэж мэдэгдэв. Эдгээрийн нэг нь Бахрейнд, нөгөө нь Йорданд байрлаж байсан бөгөөд Кувейтийн арми мөн халдлагыг саатуулж байгаа тухайгаа мэдээлжээ. АНУ өөрийн хийсэн цохилтуудыг даваа гарагт болсон нисдэг тэрэг сөнөөсний хариуд тохирсон хариу арга хэмжээ гэж тодорхойлсон бол IRGC уг халдлагуудыг харгис үйлдэл гэж нэрлэв.
АНУ-ын Ерөнхийлөгч Дональд Трамп өмнө нь Ираныг нисдэг тэргийг буудаж унагасан гэж буруутгаад, АНУ зайлшгүй шаардлагын улмаас хариу өгөх болсон гэж мэдэгдсэн. Нисдэг тэргэнд байсан багийн хоёр гишүүн амьд үлдэж, Америкийн тэнгисийн дроноор аврагджээ.
АНУ-ын албаны хүмүүсийн мэдээлснээр, Иран нисдэг тэрэг рүү довтлоход дрон ашигласан байна. Гэхдээ Ираны дрон санаатайгаар довтолсон эсэх нь тодорхойгүй гэж нэрээ нууцалсан АНУ-ын нэг албан тушаалтан BBC-гийн АНУ дахь түнш CBS News-т ярьжээ. Харин Ираны Mehr News агентлагийн мэдээлснээр, Иран уг нисдэг тэргийг унагасан гэдгээ хүлээн зөвшөөрөөгүй байна.
АНУ-ын албаны хүмүүс баазууд руу халдсан гэх мэдээлэлд одоогоор тайлбар өгөөгүй бөгөөд ямар нэгэн хохирол учирсан эсэх нь тодорхойгүй байна. Гэсэн хэдий ч Бахрейнд агаарын довтолгооны түгшүүр зарласан бөгөөд орон нутгийн эрх баригчид Ираны довтолгоонуудад хариу арга хэмжээ авсан гэв.
Т.БАТСҮРЭН
Эх сурвалж: BBC
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.
Байлдаж байгаа юм бол нисдэг тэрэг унах энүүхэнд.Хүн үхнэ,эд хөрөнгө сүйдэнэ зөндөө л юм болно.Эзэнт гүрнүүд 200-300 жил орчим насалдаг.Эхлээд бага сагаар задарч эхэлдэг.Энэ зовлон УНА улсад тохиолдохыг үгүйсгэхгүй.