Б.Пүрэвдагва Н.Учралын шийдвэрийг тэрсэж эхэллээ

Шинэ хотын дарга Б.Пүрэвдагва бол аль ч талд гал алдахгүй дундын бүсийн тоглогч.

МАН 30|38-аараа, У.Хүрэлсүхийн болон Л.Оюун-Эрдэнийн гэсэн хоёр бүлэглэлд хуваагдсан. Тэгвэл Б.Пүрэвдагвын замналаас “хоёр төрийн үед” нүүртэй нэгэн гэдэг нь харагдана.

У.Хүрэлсүх 2008-2012 онд МАН-ын генсек байх үед түүний улс төрийн карьер эхэлж, нөмөрт нь явжээ. 2010-2011 онд бүсийн зохицуулагч байснаа генсекийн туслах хийв. 2012 оны сонгуулиар УИХ-ын гишүүн болмогц үргэлжлүүлэн туслахаар нь ажиллажээ. 2017-2021 онд У.Хүрэлсүх Монгол Улсын Ерөнхий сайд байсан. Тэр үед эл залуу намынхаа генсекийн зөвлөхөөр хоёр жил болсон аж. Д.Амарбаясгаланг ерөнхий нарийн бичгийн дарга байх үед гэсэн үг. Ингээд 2018-2020 онд МАН-ын орон нутаг, хөгжлийн хэлтсийн дарга, 2020-2021 онд НАМЗХ-ны ерөнхий нарийн бичгийн дарга, 2021 онд намын байгуулалтын газрын дарга хэмээн өгсжээ. Энэ хугацаанд мөн У.Хүрэлсүхийн охинтой хамтран амьдарч, дундаасаа хүүхэдтэй болсон байдаг.

Харин 2020 оны сонгуулиар Баянзүрх дүүргээс нийслэлийн ИТХ-д төлөөлөгчөөр сонгогдон ажиллажээ. 2024 оны есдүгээр сараас хойш тэрбээр НАМЗХ-г тэргүүлж буй. Түүний нэрийг уг албан тушаалд тухайн үеийн дарга Л.Оюун-Эрдэнэ дэвшүүлж байлаа. Тиймээс тэр дундын бүсийн тоглогчоор тодорч, одоогийн суудалдаа тухалсан.

Хотын даргаар томилогдсоныхоо дараа Б.Пүрэвдагва, Н.Учрал нарын харилцаа тун сайн байв. Ажвал, Б.Пүрэвдагва мэдэгдэл гаргах, хэвлэлд тодруулга өгөх үеэрээ Н.Учралын хэрэглэдэг үгсийг давтаж, бодлогын хувьд нэг байгаагаа илэрхийлж байсан. Бүх ЗГ-ын хэвлэлийн алба шинэ хотын даргын пэйж хөгжүүлэлтийг дэмнэх хэмжээнд тэд сүжирч байсан юм. Харин сүүлд Н.Учралын шийдвэрийн өөдөөс Б.Пүрэвдагва тэрсэж эхэллээ.

Нэг. Х.Нямбаатарын цээжээрээ хамгаалж байсан "Туулын хурдны зам"-ыг Н.Учрал түр зогсоосон. Одоогоор төсөвт нь хуулийн байгууллагаас шалгалт хийж буй. Н.Учрал шалгалт дуусмагц ажлыг үргэлжлүүлнэ хэмээж байсан ч сүүлд "2.3 их наядаар Туулын хурдны замыг барьж байснаас 2.3 их наядыг Боловсролын яаманд шилжүүлчихвэл сургуулийн хүртээмжийн асуудлыг шийдчих юм байна гэж ойлгосон" гэж боловсролын салбарынхантай уулзах үеэрээ ярив. Харин Б.Пүрэвдагва "Туулын хурдны зам төслийн гэрээг БНХАУ-ын компанитай нийслэлээс төлөөлөөд гарын үсэг зурсан. Гэрээний дагуу хэрэгжилт, хүлээх үүрэг нийслэлд бий. Уг замын трасст өөрчлөлт оруулахаар төлөвлөж байгаа. Байгаль экологийг сүйтгэхгүй хадгалж үлдэх, татварын мөнгө буюу төсвийн хөрөнгийг үр ашигтай зарцуулах байдлаар төслийг үргэлжлүүлэх байр суурийг илэрхийлж байгаа. Хууль хяналтын байгууллагаас шалгаж дууссаны дараа асуудлыг шийдвэрлэнэ" хэмээсэн билээ.

Хоёр. "Би ганцаараа л ТҮЦ-тэй тэмцсэн. Иргэдийн 90 хувь нь ТҮЦ болохгүй байна, хугацаа нь дууссан бүтээгдэхүүн борлуулдаг хэмээсэн. Ерөнхий сайдын "Чөлөөлье" аяны хүрээнд Нийслэлээс олгодог мэдэгдлийн шинжтэй 100 гаруй үйлчилгээг чөлөөлсөн болохыг би өөрийнхөө цахим хуудаст байршуулсан. Тэнд ТҮЦ гэж нэг ч үг, өгүүлбэр байхгүй" энэ бол Х.Нямбаатарын үг. Гэтэл Н.Учралын "Чөлөөлье" аяных нь хүрээнд ТҮЦ-нүүд мухлагийн зөвшөөрөлд хавчуулагдан хоёр сарын өмнөөс эргэн байршиж эхэлсэн байдаг. Тэгвэл шинэ Хотын дарга Б.Пүрэвдагва зөвшөөрөлгүй байрлуулсан ТҮЦ-үүдийг нүүлгэн шилжүүлэх зэрэг үүргийг холбогдох албаныханд өглөө.

Г.МИШЭЭЛ

Өөрийн сэтгэгдлээ илэрхийл

Share Tweet