ЯРИЛЦЛАГА

СУРВАЛЖИЛГА: Жуулчид хамгийн ихээр таалагдсан гурван зүйлээ нэрлэлээ

Үндэсний их баяр наадам Төв цэнгэлдэхийн эргэн тойронд хөл хөдөлгөөн үргэлжилсээр. Монгол наадмаа үзэн яваа монгол наадамчдынхаа сэтгэгдлийг сонирхохын зэрэгцээ гадны жуулчидтай товчхон хөөрөлдөх нь зүйн хэрэг байв. Дэлхийн өнцөг булан бүрээс бидний Монгол улсыг зорин ирсэн тэднээс, монгол улсаас хамгийн их таалагдсан гурван зүйлээ нэрлэхийг хүслээ.

АНУ: Монгол наадам маш их таалагдаж байна. Үнэхээр сонирхолтой уламжлалтай ард түмэн юм. Хуушуур нь маш их махтай, үнэхээр сайхан амттай байлаа. Монгол орон төсөөлж байсан шиг уудам тал нутагтай, хүмүүс нь найрсаг сайхан сэтгэлтэй юм. Мөн үндэсний өв соёлоо дээдэлдэг нь маш их сэтгэл хөдөлгөлөө. Хамтдаа маш олноор цугларч, үндэсний хэмжээний наадмыг гайхалтай зохиож, оролцож чадаж байна. Монгол улсаас хамгийн их таалагдсан зүйлс бол, нэгдүгээрт зан заншлаа дээдэлдэг ард түмэн юм. Хоёрдугаарт баяр баясгалантайгаар баяр наадмаа тэмдэглэж байгаа нь миний сэтгэлд их хүрлээ.

БНСУ: 43 хүний бүрэлдэхүүнтэй гурван шөнө, дөрвөн өдрийн аяллын хөтөлбөртэйгөөр ирсэн. Монголд анх удаа ирж, наадам үзэж байна. Сэтгэл их хөдөлж, цаашид олон зүйл үзнэ хэмээн догдолж байна. Түүхээ авч үлдэж чадсан цөөхөн хэдэн үндэстний нэг яахын аргагүй мөн. Монголчуудаар, мөн түүх судраар нь бахархаж бас биширч байна. Монголын ард олноос сэтгэлд үлдсэн, гайхалтай санагдсан зүйл бол монгол гэр, уудам тал, хорхог байв.

Герман: Монголд анх удаа ирж байна. Монголд онгоцноос буугаад өдийг хүртэл нэг ч зүйл нь муухай санагдаагүй, маш гайхалтай, үзэх зүйл олонтой үндэстэн юм байна. Германд ийм бүх ард түмнээрээ баярлаж, цэнгэдэг том баяр байдаггүй.

Монгол улсыг наадам үзэхийн тулд зорьж ирсэн. Наадмын нээлт үзэхэд үнэхээр супер, үгээр илэрхийлэмгүй гайхалтай байсан. Бидний сэтгэл хөдөлж, зарим маань бүр уйлсан шүү. Ард түмэн нь өөрийгөө монгол үндэстэн гэдгээр бахархаж байгаа нь мэдрэгдэж, омогшил төрүүлж байсан нь гайхалтай. Монголд ирээд бахархсан зүйлсийг дурдаад барахгүй олон байна. Байгалийн олон янзын тогтоц, баяр болохоор бага насны хүүхдүүдтэйгээ хамт тэмдэглэдэг заншил нь маш их сэтгэлд хүрлээ. Мөн бид гэрт хоносон нь сайхан байсан. Монголын өргөн тал нутгаар морь унаж давхих мөрөөдөлтэй байсан, түүнийгээ биелүүлсэндээ маш их баяртай байна.

Голланд: Ирээд гурав хонож байна. Наадмын нээлт үзэхэд Монголчууд эх орондоо маш их хайртай нь мэдрэгдсэн. Монголд ирээд хамгийн их таалагдсан бөгөөд сэтгэлд үлдсэн зүйл бол ард түмэн, байгалийн үзэсгэлэн нь юм. Сурын харвааны тухайд Бутанд үзэж байснаас үнэхээр өөр байлаа. Ялангуяа уртын дуу дуулж байгаа нь таалагдлаа. Би монголд хайртай.

БНСУ: Монголд оюутан солилцоогоор зургаадугаар сарын 15-нд ирсэн. Үндэсний их баяр наадмыг үзэхэд сайхан байлаа. Идэх зүйлээс хуушуур их таалагдсан. Мөн морин уралдаан болон тэмээ унах үнэхээр гайхалтай бас зугаатай байлаа. Бага  насны хүүхдүүдийг хурдан морь унаж байхыг хараад их гайхсан.

Өмнөд Австрали: Монголд анх удаа зочилж байгаа. Наадмын сэтгэгдэл маш өндөр, сайхан байна. Хуушуур нь үнэхээр их махтай бас дахин давтагдашгүй амттай байлаа. Хамгийн ихээр таалагдсан зүйл бол нум сум харвах, бөх барилдах, шинэ хүмүүстэй танилцах байв. Монголчууд бөхөө дээдэлдэг, мэддэг нь мөн үндэсний хувцас нь гээд нэрлээд байвал олон зүйл сайхан байлаа.

Д.ЦЭРЭНЧИМЭГ

М.ТЭНГИС

Таг

Холбоотой мэдээ

Хариулт үлдээх

АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Back to top button
Close