Ширхэг шүдэнз ч үлдээгээгүй бол АЯЛАЖ СУРСАН гэсэн үг

Хоггүй газар руу л аялая гэдэг үг аялагчдын амны уншлага болжээ. Гэвч хүний мөр хүрсэн л бол хоггүй газар гэж үгүй болсон бололтой.

Үндэсний их баяр наадмын өдрүүдэд иргэд тав хоног үргэлжлэн амрахдаа эх орныхоо аль өнгөтэй, өөдтэй газрыг зорьж, дотоодын аялал жуулчлалдаа үнэтэй хувь нэмэр оруулав. Нөгөөтэйгүүр, дотоодын аялал жуулчлалын суурь сайн тавигдаагүйгээс иргэд хогоо хоносон, буудалласан газрууддаа үлдээж байгаль орчинд нөхөж баршгүй гарз тохиов. Нэг талаар аялал жуулчлалын дэд бүтэц сайн хөгжөөгүйг шүүмжилж иргэдийг ингэж өмөөрч болно. Бие засах `00` байхгүй тул иргэд хүссэн газраа хөнгөрч, хүндэрч хэрэглэсэн ариун цэврийн цаас, хэрэглэлүүдийг “бүдүүхэн” модны ард нуусхийгээд орхидог нь нууц биш. Уртын амралтын дараа Хөвсгөл далай орчмын байгаль хамгаалагч, орчны цэвэрлэгээ хариуцсан ажилтнууд портерын ачаа дүүрэн нолийн цаас, ариун цэврийн хэрэглэл түүдэг гэдэг ч худал биш. Хоноглоход гарсан хогоо түүж уутлаад бас л модны дор шомбойлгож тавьчихаад, хогоо цэвэрлэсэн гээд санаа амар явна..Аргагүй шүү дээ, ойрхон том хэмжээний хогийн цэг, хогийн сав байдаг бол хүний ухаанд шууд л тэр бодогдохоос, орхиод явчихъя гэж бодогдохгүй нь мэдээж. Хумьж, цуглуулсан хогных нь хоолны үлдэгдэл сэлтийг удалгүй нохой шувуу онгичоод буцаагаад л тараагаад хаячихна.

Харин нөгөө талаар дэд бүтцийн хөгжлийг хүлээлгүй, хоггүй аялаж сурах шаардлага бидэнд бий. Очсон газартаа нэг шүдэнзний мод үлдээхгүй авч явдаг сэтгэлтэй болсон бол одоо та аялаж сурчээ гэсэн үг. Ганцхан шүдэнд хаяхад дараагийн хүн `Болдог л юм байна, ганц шүдэнз яав л гэж` гэсээр ахин нэг шүдэнз, дараагийн хүн дахиад ганцхан шүдэнз гэсээр олон шүдэнзний дэргэд нэг тамхины иш, бас нэг тамхины иш гэж нэмэгдсээр л хогийн цэг үүсдэг.

Хоггүй газар руу аялах гэж байгаа бол өөртөө ганц ч шүдэнз үлдээлгүй, хоггүй аялана гэж ам өгөх, бусдадаа шаардлага тавих хэмжээнд сэтгэлгээндээ өөрчлөлт хийх хэрэгтэй. Ирэх жил энэ нутагт ирэх нүүртэй байх хэрэгтэй. Аялаж зугаална гэдэг амарч, баярлахын нэр мөн ч хогоо аваад сурчихвал аялаж сурлаа гэсэн үг. Жинхэнэ аялагч бол үнэтэй машин, ганган аяллын хувцас, тансаг хүнс, банк дүүрэн бензин бодохоос урьтаж, машиндаа хогоо ачиж ирэх бэлтгэлээ базаадаг нэгнийг хэлэх биз.

Т.САНТ

Энэ мэдээнд өгөх таны үнэлгээ

Хуваалцаарай Жиргээрэй