Дүү явж, ах нь ирлээ

Өчигдрийн /2020.07.16/ ЗГ-ийн хуралдаанаар дэд сайдууд томилогдлоо. Тэдний дунд нэгэн содон томилгоо болов. Тэр нь Зам тээврийн хөгжлийн дэд сайдаар Ж.Бат-Эрдэнийг томилсон явдал. Түүнийг УИХ-ын гишүүн асан Ж.Батзандангийн төрсөн ах гэдгээр нь илүү таних ч салбартаа бол мэргэжлийн хүн гэх тодотголтой нэгэн аж.

Хамгийн сүүлд 2014-2018 онд ЗТЯ-ны Төрийн нарийн бичгийн даргаар ажилласан. Дараа нь Ерөнхий сайд У.Хүрэлсүхийн орон тооны бус зөвлөхөөр ажиллах болсон юм.

Боловсрол: Сүхбаатар аймгийн Баруун-Урт сумын 1 дүгээр дунд сургуулийг 1987 онд, Оросын Холбооны Улсын Новосибирск хотын Техникийн Улсын Их Сургуулийг “Системийн инженер” мэргэжлээр, ХБНГУ-ын Дортмунд хотын Мэдээллийн технологийн институтийг Мэдээллийн технологийн зөвлөх, удирдлагын ухааны арга зүйч мэргэжлээр, мөн АНУ-д мэдээллийн аюулгүй байдлын шинжээчээр тус тус суралцаж төгссөн. Шинжлэх ухаан технологийн их сургуулийн докторант.

Гадаад хэл: Орос, Англи, Герман

Ажилласан байдал: Дэд бүтцийн хөгжлийн яамны Эдийн Засаг хамтын ажиллагааны газарт Мэдээлэл, хяналт, шинжилгээ, үнэлгээний газарт мэргэжилтэн, Холбооны газарт мэргэжилтэн, ахлах мэргэжилтэн, Дэд бүтцийн яамны Зам тээвэр, мэдээлэл, холбоо, аялал жуулчлалын бодлого зохицуулалтын газарт мэдээллийн технологийн бодлого, зохицуулалт хариуцсан ахлах мэргэжилтнээр, 2003 оноос Мэдээлэл, холбооны технологийн бодлого зохицуулалтын газрын даргаар, 2004-2012 онд Засгийн газрын тохируулагч агентлаг - Мэдээлэл, харилцаа холбоо, технологийн газарт орлогч дарга, даргаар, 2012-2014 “Монголын цахилгаан холбоо” Хувьцаат компаний Гүйцэтгэх захирлаар, 2015-2018, Зам, тээврийн яамны Төрийн нарийн бичгийн даргаар, 2019 оноос Монгол Улсын Ерөнхий сайдын зөвлөхөөр тус тус ажиллаж байсан.

Түүнийг улстөрд дүү Ж.Батзандан нь чирж оруулж ирлээ, энд тэнд даргын албан тушаалд томилууллаа гэж хэвлэлүүд шүүмжилдэг. Угтаа 2000-аад онд буюу дүү Ж.Батзанданг “оюутан бацаан” явах үед МУ-ын Дэд бүтцийн яаманд газрын дарга хүртэлээ мерит зарчмаар ахин ажиллаж, төрийн албыг мэргэжилтнээс авхуулан Төрийн нарийн бичгийн дарга хүртэлх түвшин хүртлээ ажиллаж иржээ.

Тиймдээ ч тухайн үед Ерөнхий сайд Н.Энхбаяр, Дэд бүтцийн сайд Б.Жигжид нарт тоогдсон мэдээлэл, харилцаа холбооны чиглэлээр Орос, Герман, Америкт боловсрол эзэмшсэн аж. Улмаар МАН-ын ирээдүйн удирдагчдын нэг болох залуу гэгддэг байв. Харин дүү Ж.Батзандан гудамжинд гарч ирэн улс төрийн энтертайнмент үзүүлдэг болсноор түүний карьер чимээгүй дарагдсан гэж шууд хэлж болно. Ямартаа л “төрд шургалсан Ж.Батзандангийн ах дүүсийн ургийн мод”-ны танилцуулгатай нэр зургаар нилээд цоллуулж, дүүгийнхээ буянаар гэх үү, балагаар гэх үү олны амны бай болсоор өдий хүрсэн.

Хамгийн сүүлд 2014-2018 онд ЗТЯ-ны Төрийн нарийн бичгийн даргаар ажилласан. Тухайн үед “улс төрийн соёл” харуулж хариуцлага хүлээнэ удирдлуудтай цуг ажлаа өгсөн байдаг. Дараа нь Ерөнхий сайд У.Хүрэлсүхийн орон тооны бус зөвлөхөөр ажиллах болсон. Тэднийг нэг нутгийн, дотны найз нөхөд ч гэдэг. УИХ-ын сонгуулиар нэр дэвшихээр зэхэж байгаад гэнэт дэвшээгүй. Энэ нь Засгийн газрын танхимд орж ажиллах нь гэсэн хар дагуулсан. Энтертайнмент дүүгийнхээ балагаар хасагдсан байж мэдэх. Харин ЗГ-ын танхимд “дэд сайд”-аар ирж улс төрийн карьераа эхлүүлэв. Тэгэхээр ямартай ч дүү явж, ах ирэв бололтой.

Энэ мэдээнд өгөх таны үнэлгээ

Хуваалцаарай Жиргээрэй