У.Хүрэлсүхээс даалгавар авч, ТЕГ-ын удирдлагаар очих эрхэм хэн байх вэ

ТЕГ-ын даргаар ажиллаж байсан Б.Гэрэл /2020.08.25/ өөрийн хүсэлтээр үүрэг ажлаа хүлээлгэн өгсөн. Үүнтэй холбогдуулан, ТЕГ-ын  даргаар хэн томилогдох вэ гэсэн асуулт улс төрийн хүрээнд хүчтэй яригдсаар байна. Холбогдох хуулиараа ТЕГ-ын даргаар томилох хүн Ерөнхий сайд, Засгийн газрын хүрээний  бүрэн эрхэд хамаардаг.

Одоогоор Ерөнхийлөгч, ЗГХЭГ-ын дарга, Ерөнхий сайдын зүгээс дэмжигдэх магадлалтай, ТЕГ-ын даргад зүтгүүлж буй хэд хэдэн эрхэм бий. Эдгээрээс эцсийн мөчид Ерөнхий сайд У.Хүрэлсүх хэнийг ТЕГ-ын даргаар нэрлэх үү.  Тэр Ерөнхийлөгч Х.Баттулгатай дундын шугам дээр тохироо хийх үү, эсвэл дангаараа шийдэж, бүрэн эрхээ эдлэх үү гэсэн асуултууд анхаарал татаж буй юм.

ТЕГ-ын даргад яригдаж буй эрхмүүд тэдний улстөрийн хамааралтай холбогдох мэдээллийг багцлан хүргэж байна.

Ж.ЭНХБАЯРЫГ ЕРӨНХИЙЛӨГЧ ДЭМЖИНЭ ГЭДГЭЭ ИЛЭРХИЙЛЖЭЭ. Гэхдээ яагаад?

Засгийн газрын харьяа сангуудаас их хэмжээний зээл авсан асуудал нь Ж.Энхбаярыг улстөрийн карьераас арчих шахсан. Гэвч тэр угийн сэргэлэн зангаараа зай самбаа олж, УИХ-ын сонгуульд өрсөлдөхгүй өнжих шийдлийг олсон билээ. Сонгуулийн дараа Хотын дарга, “Эрдэнэт үйлдвэр”, “Эрдэнэс Монгол”-ын захирлын суудлуудад яригдсан.

Сонгуулиас хойших МАН доторх толхилцоонд тэр У.Хүрэлсүхийг түшиж, Ахлах зөвлөхийн албан тушаалд томилогдоод буй. Ерөнхий сайдын ажлын албаны ахлах зөвлөхийн албан тушаал бол түүнтэй өдөр тутам уулзаж байдаг аж ахуйн дарга. Тэр утгаараа том улс төр ярьж, өөрийгөө стратегич хэмээн тодорхойлж явсан Ж.Энхбаярт уг алба хэт ахуйн шинжтэй байж болох. Нөгөө талд УИХ-ын гишүүдийн Ерөнхий сайдтай харилцах харилцааг зангидах гэдэг утгаараа том мест байж болох.

Тэрбээр ТЕГ-ын дарга асан Б.Гэрэлийг ажлаас чөлөөлөх Ерөнхий сайдын захирамжийг гардуулахаар очсноосоо хойш тус газрыг удирдана гэх мэдээлэлд дарагдсан. Хамгийн сонирхолтой нь, хэвлэл дээр уг мэдээлэл  цацагдсаны дараа Ерөнхийлөгч дуудаж, “Чамайг энэ албан тушаалд очвол  би дэмжинэ” гэж хэлсэн гэх.

Мөнхүү Ерөнхий сайд У.Хүрэлсүх ч татгалзах зүйлгүй гэсэн байр суурьтай байгаа гэх. ТЕГ дээр Ерөнхийлөгч У.Хүрэлсүхтэй тохиролцохыг чухалчлах нь тодорхой. Харин нөгөө талд У.Хүрэлсүх ганцаарчилсан тоглолт хийж, өөрийн дураар шийдвэл ашигтай тусч мэдэх. Түүнчлэн Ерөнхийлөгчийн сонгуулиар У.Хүрэлсүх өрсөлдвөл “Я.Содбаатар, Ж.Энхбаяр нарыг өндөр албан тушаалд томилсон” гэх өнцгөөр Х.Баттулгын баг түүнийг муухай харагдуулах ажлаа хийх нь тодорхой.

Энэ логикоор бол Ж.Энхбаяр ТЕГ-ын дарга болох хамгийн өндөр магадлалтай эсвэл бүр өөр зүгт ч асуудал хөвөрч мэдэхээр харагдаж байна.

У.ХҮРЭЛСҮХ П.ОДОНБААТАРЫН МӨРӨӨДЛИЙГ БИЕЛҮҮЛЭХ ҮҮ

ТЕГ-ын даргаар томилогдох хамгийн өндөр амбицтай хүний нэг бол П.Одонбаатар. Тус газрын Тэргүүн дэр даргаар ажиллаж байгаад эдүгээ түр орлон гүйцэтгэгч статусаар тэднийхийг удирдаж байна. Хэдэн жилийн өмнөөс “ТЕГ-ын ирээдүйн дарга” гэгдсэн П.Одонбаатарыг Ерөнхийлөгчид ч, У.Хүрэлсүхэд ч хамаатуулж ярьдаг.

Эдүгээ “ЗГХЭГ-ын дарга Л.Оюун-Эрдэнийг тагнаж чагнасан эсэх асуудал дээр маш махруу ажиллаж байгаа. Өмнөх Б.Гэрэл даргатайгаа харилцаа тийм ч сайн байгаагүй. Нэлээд хожуу ЕТГ-ын дарга Б.Шижиртэй ойртох замаар Ерөнхийлөгчид дөхсөн” зэрэг битүү мэдээллүүд түүнийг дагадаг билээ.

Товч намтрынх нь тухайд,

-1996-1999 онд Дундговь аймгийн Засаг даргын дэргэдэх Цагдаагийн хэлтэст мөрдөн байцаагч;

-1999-2001 онд Улсын аюулгүй байдлыг хангах ерөнхий газрын Мөрдөн байцаах хэлтэст мөрдөн байцаагч;

-2001-2015 онд Тагнуулын ерөнхий газрын Мөрдөн байцаах хэлтэст ахлах мөрдөн байцаагч, тасгийн дарга, хэлтсийн орлогч дарга, хэлтсийн дарга;

-2018-2019 онд Тагнуулын ерөнхий газарт албаны дарга;

-2019 оноос Тагнуулын ерөнхий газрын Орон нутгийн газрын дарга;

-Монгол Улсын Засгийн газрын 2020 оны 8 дугаар сарын 12-ны өдрийн 55 дугаар тогтоолоор ТЕГ-ын тэргүүн дэд даргаар томилогдон ажиллаж байна.

Б.ЭНХСҮХ”ЖИЙГДСЭН”  ТУЛ Д.ЦОГТБААТАРЫГ ЗҮТГҮҮЛСЭН ҮҮ

ТЕГ-ын дарга асан Б.Хурцын эсрэг дуугарсан гэдгээрээ Д.Цогтбаатар алдартай. Тэрбээр ТЕГ-ын Сөрөх тагнуулын газрын даргаар ажиллаж байсан Д.Цогтбаатар хууль, шүүхийн байгууллагын хатуу хүтүүг туулсан намтартай. Тэрбээр өнгөрсөн жил УЕПГ-т ирж ажилласан нь олны анхаарлыг татсан томилгоо болсон.

Эдүгээ ТЕГ-ын даргаар очих магадлалтай эрхмүүдийн нэгээр нэрлэгдэж буй. ЗГХЭГ-ын дарга Л.Оюун-Эрдэнэ Т.Энхсүхийг ТЕГ-ын даргаар томилуулах лобби нурсны дараа Д.Цогтбаатарыг зүтгүүлж байгаа гэх яриа бий. Гэв улс төр талаасаа ч, ТЕГ-тай холбогдох намтар талаасаа ч Д.Цогтбаатар дэмжлэг хүлээх боломжгүй хувилбар гэж харагдаж байна.

Энэ мэдээнд өгөх таны үнэлгээ

Хуваалцаарай Жиргээрэй