А.Адъяасүрэнгийн 100 мянган ам.долларын авлига өгсөн гэх хэргийг Ерөнхийлөгч “ЦАРЦААЖЭЭ”

2020 оны есдүгээр сарын 9-ний огноот контентыг сэргээн нийтэлж байна.

285 САЯ ТӨГРӨГИЙН АВЛИГА ӨГСӨН ЭРХЭМ УИХ-Д НЭР ДЭВШИЖ, ЯЛЖЭЭ

Хөшигний ард шинэ парламентаас ЖДҮХС-гийн зээлийн асуудлаар ГУРАВ, бусад хэргүүдээс үүдэж ХОЁР УИХ-ын гишүүн ЭРГҮҮЛЭН ТАТАГДАНА гэх яриа хөвөрсөөр нэлээд удаж байна. Одоогоор ял эдэлж буй Ж.Эрдэнэбат гишүүнийг эс тооцвол шинэ парламент бүл бүтэн байгаа юм. Гэвч Эрүүгийн хэргийн зүйлчлэлээр ял авах нь тодорхой ч улстөрийн хамгаалалтад орсон гишүүн ч бий. Тэр бол Баянхонгороос сонгогдсон А.Адъяасүрэн гишүүн.

Тэрбээр, Чингэлтэй дүүргийн III хорооны нутаг, “Peace tower”-ын 804 тоот өрөөнд АТҮТ-ийн Тээвэр зохицуулалтын хэлтсийн дарга Г.Доржпаламд түүний хамаарал бүхий хүнээр дамжуулан, 100 мянган ам.долларын авлига өгсөн гэх хэргээр яллагдагчаар татагдан шалгагдаж буй. Уг хахуулийг БНХАУ-ын иргэнтэй хамтран эзэмшдэг “Сан тээвэр групп”, “Тэнгри транс групп”, “Ульгансар транс” ХХК-д нийт 680 автомашины улс хоорондын ачаа тээврийн С зөвшөөрлийн асуудлыг шийдвэрлүүлэхээр өгсөн гэх.

Авлигын хэрэг энэ оны гуравдугаар сард гарсан бөгөөд тухайн үед А.Адъяасүрэн нь Ерөнхийлөгчийн орон тооны бус зөвлөх гэсэн статустай байсан. Тэрбээр Баянхонгор аймагт нэр дэвших бэлтгэлээ хоёр жилийн өмнөөс базааж, сумдад мотоцикл бүхий азын сугалаа сугалуулах, сурах бичиг тараах зэргээр тойргоо “услах” ажлаа эрчимжүүлсэн байв. Тиймээс ч уг хэрэгт шалгагдаж эхэлсэн хэдий ч нэр дэвших алхмаасаа ухраагүй. Нөгөө талд илтэд авлигын хэрэгт шууд ял авчих гээд байсан тул парламентын танхим түүний хувьд хуулийн хамгаалалтаа бэхжүүлэх чухал орон зай байсан гэх.

А.Адъяасүрэнгийн АТҮТ-ийн Тээвэр зохицуулалтын хэлтсийн дарга асан Г.Доржпаламд өгсөн 100 мянган ам.доллар нь монгол мөнгөөр 285 сая төгрөгтэй дүйцэх юм.

ХУУЛИЙН ЗҮЙЛЧЛЭЛ: А.АДЪЯАСҮРЭН ГИШҮҮН ГУРВАН ЖИЛИЙН ЯЛ АВАХААР ЗҮЙЛЧЛЭГДЖЭЭ

УИХ-ын гишүүн А.Адъяасүрэнгийн яллагдагчаар татагдсан зүйл анги нь Эрүүгийн хуулийн тусгай зүйл ангийн 22.5.1 юм.

Эрүүгийн хуулийн 22.5 дугаар зүйл: Хахууль өгөх

1.Өөртөө, бусдад давуу байдал бий болгох зорилгоор бусдад албаны чиг үүрэг, бүрэн эрх, албан тушаалын байдалтай нь холбогдуулан эд зүйл өгсөн, эдийн бус баялаг, тэдгээрийг өмчлөх эрхийг шилжүүлсэн, төлбөргүй, эсхүл хөнгөлөлттэй үйлчилгээ үзүүлсэн, эсхүл эдгээрийг амласан, санал болгосон бол нийтийн албанд томилогдох эрхийг хоёр жилээс таван жил хүртэл хугацаагаар хасаж хоёр мянга долоон зуун нэгжээс арван дөрвөн мянган нэгжтэй тэнцэх хэмжээний төгрөгөөр торгох, эсхүл зургаан сараас гурван жил хүртэл хугацаагаар зорчих эрхийг хязгаарлах, эсхүл зургаан сараас гурван жил хүртэл хугацаагаар хорих ял шийтгэнэ.

Тодруулж хэлбэл, А.Адъяасүрэн гишүүн албан тушаалтанд хахууль өгсөн асуудлаараа ГУРВАН  жилийн хорих ял сонсох хуулийн зүйлчлэлтэй аж.

ЭХ СУРВАЛЖ: МӨРДӨН БАЙЦААЛТ УДААШИРЧ, ГОЛ НОТЛОХ БАРИМТ УСТСАН УУ

Уг хэрэгтэй холбоотой нэг хачирхалтай мэдээлэл байгаа нь, яг сонгуулийн сурталчилгааны үеэр А.Адъяасүрэнгийн албан тушаалтанд хахууль өгч буй бичлэгийг цацахаар бэлтгэсэн байсан гэх. Гэвч уг бичлэг цацагдаагүй дарагдаж өнгөрсөн гэгдэж буй.

Сонгуулийн дараа А.Адъяасүрэн гишүүн уг бичлэгийг устгах ажлыг зохион байгуулсан байх магадлалтай, мөрдөн шалгах ажиллагааг удаашруулж царцаах үйлдлийг Ерөнхийлөгчийн нөлөөллөөр хийлгэсэн байж болзошгүй гэх мэдээллийг эх сурвалжууд өгч байна. Төрийн тэргүүн АТГ-т өндөр нөлөөтэй байгаа нь өнөөдөр нууцлах сэдэв биш болсон. А.Адъяасүрэн гишүүний тухайд тангаргаа өргөхөөс өмнө Ерөнхийлөгчийн үүдэнд хэдэн өдөр дараалан суусан зэрэг хачин жигтэй логикууд энд харагдаж буй.

Тодорхой байгаа зүйл нь, А.Адъяасүрэн эдүгээ УИХ-ын гишүүний бүрэн эрх, Ерөнхийлөгчийн нөлөөллийг ашиглахгүй л бол ял авах нь цаг хугацааны  асуудал болчихсон нь үнэн.

А.АДЪЯАСҮРЭН ГИШҮҮН КОМПАНИУДЫНХАА БҮРТГЭЛЭЭС ӨӨРИЙНХӨӨ НЭРИЙГ ХАСУУЛЖЭЭ

2020 оны сонгуульд УИХ-д нэр дэвшигчдийн ХОМ-ийг зарлах үед тэрбээр таван тусгай зөвшөөрөл эзэмшдэг, тээврийн хэд хэдэн компанийн хувьцаатай гэдгээ мэдүүлсэн байв. Мэдүүлгийг ЭНД ДАРЖ  үзнэ үү. Түүний ХОМ дээрх “Сан тээвэр групп”, “Тэнгри транс групп”, “Ульгансар транс” ХХК-иудад хамаарах С зөвшөөрлийн асуудал яллагдагчаар татагдах үндсэн шалтгаан болсон юм.

Сонирхолтой нь, эдгээр компаниуд дээрх өөрийнхөө нэрийг 2020 оны наймдугаар сарын 3-нд дата бүртгэлээс “арилгуулсан” байна. Тодруулбал, төрсөн... Амгалангийн Аюуш гэх хүнд шилжүүлэн өгчээ. Ингэснээр “Сан тээвэр групп”, “Тэнгри транс групп”, “Ульгансар транс” ХХК-иуд эдүгээ дата бүртгэл дээр А.Адъяасүрэн гишүүнд хамааралгүй харагдаж байна.

Энэ нь хэл ам дагуулдаг компанийн түүхээ өөрөөсөө холдуулахаар хамаарал бүхий этгээддээ шилжүүлдэг улстөрчдийн тогтсон арга барилуудын нэг юм.

ДҮГНЭЛТИЙН ОРОНД: Бид хэргийн процессын талаар редакцийн дүгнэлт оруулахгүйгээр товч мэдээлэл хүргэлээ. Гэвч энэ хүрээд зогсох асуудал бас биш юм. Авлига өгсөн нь ил цагаан илчлэгдсэн гэх хэрэг АТГ дээр яагаад удаашрав. Цаашдаа авлига өгсөн энэ мэт эрхмүүд төрийн ордныг шоронгоос тусгаарлах боломж болгон ашигласаар байх уу. С зөвшөөрлийг АТҮТ-ийн албан тушаалтнууд хэдийнээс дамлан арилжсаар ирэв, тэдгээрийн нарийн сүлжээ зэрэг олон асуултууд хариултгүй үлдэж байна. Энэ бол хэвлэлийн хөндөх сэдэв билээ.

Ж.МЯДАГБАДАМ

Энэ мэдээнд өгөх таны үнэлгээ

Хуваалцаарай Жиргээрэй