ШӨХТГ-ыг “ЗАНАЛХИЙЛЭГЧ” болгож, ААН-үүдээ ДЭВСЛЭХ нь хэний даалгавар вэ, Б.Бат-Эрдэнэ дарга аа

УУЛЗАЛТЫН ЗАРДАА ХҮРТЭЛ ААН-ҮҮДИЙН ЛОГО АШИГЛАЖ “АЙЛГАДАГ” ХУРГАН ДАРГА

Нэг аймаар даргатай болов. Шууд торгодог. Бизнесийн нэр хүндэд зүгээр л халдчихдаг. Тэр өөрийгөө “супер тоглогч” гэж ойлгоод, бүр дүрдээ орчихсон. Тэрбээр өөрийн нүүр хуудсандаа “Сүү” компанийн “Сүү” бүтээгдэхүүний зургийг тавьж, сүүний үнэ нэмэгдсэн талаар судалж буйгаа зарлав. Хэрэглэгчдэд шууд очих мессэж нь “Сүү компани үнээ нэмээд, ШӨХТГ-ын дарга тэднийхийг будаа болгох нь дээ” гэх агуулга. Нэмэгдсэн эсэх нь тогтоогдоогүй байхад томоохон ажил олгогч, татвар төлөгч ААН-ээ нэг хурган дарга зүгээр л яллачихаж байгаа юм.

Тэгснээ ШТС-уудын баахан зураг эгнүүлж өрж байгаад, тэдэнтэй уулзах гэж байгаагаа бас зарлав.  Зүгээр л албан уулзалтын зар шиг мөртлөө баахан улаан анхаарлын тэмдэг энэ тэнд нь өлгөөд, айдас хүйдэс төрүүлэхүйц сүр оруулав.   Шууд л “За, шатахуун импортлогчид ШӨХТГ-т хяргуулах нь дээ” гэх мессэж өгөв. Тэгээд дараа нь хяргаж байгаа юм. ... Тэр, тэр ШТС-уудын шатахуун ус болон лав агуулсан байсан гээд нэрлэв.

Олон нийт баахан алга ташиж, “Хаа, торго, Монголоос зайлуул” гэж орилсны маргааш нь “Яг бол ус шууд холиогүй шүү. Андуураад байгаарай, та нар” гэх утгаар нүүр хуудсандаа дахин нэг сэтгэгдэл бичив. Логикоор харахад, тэр оройдоо баахан ШТС-уудын эздээр загнуулаад, тэд нь томчуулд ховлож өнөөх дарга нь буулт хийж байгаа гэх хардлага төрүүлнэ.

Бас болоогүй ээ, МАН-ын гишүүн Ц.Анандбазарын “Сод Монгол”, Ж.Оюунгэрэлийн “Петровис”-ийг асуудалтай гэж зарлахгүй үлдээв. АН-ын угшилтайгаараа “Шунхлай” муу нэрд өртөв. Аль таван сарын өмнө хийсэн шалгалтыг Б.Бат-Эрдэнэ зарлаж, өөртөө “кок” авахыг бодсон нь ч хачирхалтай.

-АМЬДРАЛГҮЙ, ААН-ҮҮДЭД ХАЛТАЙ ШИЙДВЭРҮҮДЭЭ БАХАРХАЛ БОЛГОН ЗАРЛАГЧ ШӨХТГ-

ШӨХТГ-ын дарга Б.Бат-Эрдэнийг албан өрөөндөө камер байршуулахад олон нийт алга ташсан. Хэт унтаа байсан ШӨХТГ энэ залуугийн нөлөөллөөр О.Магнай, Т.Аюурсайханы удирдаж байсан үе шиг хэвлэлийнхний хараанд оров. Бас л сайн үзүүлэлт. Ажил байдал нь олон нийтэд байнга мэдээлэгдэх боломж нээгдэж, залуу хүний эрч хүч энэ байгууллагаас үнэртэх болсон. Ийм  шинэ сэргэг дарга нар үгүйлэгдэж байгаа юу гэвэл үгүйлэгдэж байгаа.

Гэхдээ л юманд хэмжээ гэж бий. Өрсөлдөөний хууль, Хэрэглэгчийн эрх ашгийг хамгаалах чиглэлээ хэт хүндрүүлж, ААН-үүдийн эрх ашгийг уландаа гишгэх нь хэрээс хэтрэв. Амьдралгүй, агааргүй шийдвэрүүдийг шуудхан л гаргачихдаг боллоо. Тухайлахад “Зарагдсан бараа буцаахыг зөвшөөрөхгүй бол 5.000.000 төгрөгөөр торгоно” гэж зарлав. Монголд зарагдсан барааг буцааж авдаг үйлчилгээ төдийлөн түгээмэл хөгжөөгүй. Хэрэглэгчийн соёл нь  ч төлөвшөөгүй байгаа.

Одоо зах зээл дээр ямар нөхцөл байдал үүснэ гээч. Авсан бараагаа таалагдахгүй бол өмсөж, хэрэглэсэн ч байсан хамаагүй лангуун дээр нь авчирч шидээд “Мөнгөө авъя” гэж дуртай нэг нь шаардлана. Биелүүлэхгүй бол тэд шууд ШӨХТГ-т ховлож, худалдагч нь таван сая төгрөгөөр торгуулна. Ковид-19-ийн эмзэг үед лангуу түрээслэгчид, худалдаа эрхлэгчид хойд хормойгоороо урд хормойгоо нөхөж байгаа. Тэд нэг удаа 5 сая төгрөгийн торгууль төлөхөд л бизнес нь шууд зогсох эрсдэлтэй. Тэдний ингэж хямрах, хаалгаа барих бол ШӨХТГ-ын дарга Б.Бат-Эрдэнэд огт хамаагүй бололтой.

Дэлхийн агаарын тээврийн бүх авиа компани дампуурлын ирмэгт байхад манай бадрангуй дарга шууд хэвлэл дагуулж очоод л “МИАТ аа, тийзний үнээ буулга” гэж камерын өмнө шахаж байгаа юм. Тэднийх үнэтэй нислэгтэй, хэт монополи, зардал өндөртэй нь үнэн. Гэхдээ коронавирусийн үед Төрийн ганц авиа компани дээрээ агсам тавьж явна гэдэг бол яавч эрүүл бус үзэгдэл юм.

ЗАНАЛХИЙЛЭЛ: ТОРГОНО, ШАЛГАНА, ЧАНГАЛНА, АРГА ХЭМЖЭЭ АВНА

Ерөөсөө л ШӨХТГ-ын сүүлийн үед хэлдэг, хийдэг ажил нь “Торгоно, шалгана, чангална, арга хэмжээ авна” гэх ААН-үүд рүү чиглэсэн заналхийлэл. Ийм заналхийлэл доор хөшигний ард юу гаардаг гээч. Шантааж болон өшөө авалт. ААН-үүд эдүгээ “ШӨХТГ давхиад ирэх вий” гэсэн айдаст бүрэн автлаа. Айсан хүмүүс ямар ч хамаагүй аргаар  тэдний шалтгалтад орохгүй байхыг л чухалчилна. Хүмүүсээр зуучлуулж, Б.Бат-эрдэнийг элдэвчлэн гуйх нь тодорхой.

Нөгөө талд өрсөлдөгч ААН-үүд иргэний нэрээр ШӨХТГ-т гомдол гаргаад л нэгнээ намнуулаад байх боломж бүрдэв. ШӨХТГ гомдлыг шуурхай шалгаж, шийдвэрлэх ажил дээр маш сайн болсон. ШӨХТГ бол хэрэглэгчийн эрх ашгийг хамгаалахаас гадна өрсөлдөөний тэгш хэм хэмжээг хангах үндсэн чиг үүрэгтэй. Гэвч сошиалаар ажлаа явуулдаг залуусын хийрхлээр шалгасан ч, дуудаж уулзсан ч, очиж ажилласан ч хэвлэл дагуулан “үсэргэж” хайр найргүй байдлаар камерын өмнө ААН-үүдээ өдөр тутам дэвслэх болов.

Ерөнхий утгаар нь харахад өнөөдөр энэ их зөв. Эрх ашигаа зөрчүүлдэг хэрэглэгчдэд ч таалагдаж байгаа. Гэвч ААН-үүд бүрийн ард ажил олгогч, ажилтан, үр шимийг нь хүртэж ажил амьдралаа залгуулдаг олон иргэн бий. Эдгээр хүмүүсийн эрх ашгийг ШӨХТГ дуртай үедээ дэвсэлж, нухчин дарж болохгүй билээ.

Яг үнэндээ Б.Бат-Эрдэнэ даргын энэ үйлдлүүд Ерөнхий сайд У.Хүрэлсүхийн “Төрийн оролцоотой зах зээл хөгжүүлнэ” гэх үгийн нийгмийн уур амьсгалыг бэлдэж байгаа мэт харагдах болов. Төр засахгүй бол, хяналт тавихгүй бол ААН-үүд болохгүй юм байна гэсэн мессэжийг ч хангалалттай өгч буй. Залуу хүний хувиар хэт коммунист битгий байгаасай, ААН-үүдийн эрх ашгийг дээдлэн үзээсэй, чөлөөт зах зээлийн нийгмийн суурь ойлголтуудаа дахин хараасай гэсэндээ үүнийг бичив. Б.Бат-Эрдэнэ дарга аа, та бол заналхийлэгч биш эрх тэгш байдлыг хангах чиг үүрэгтэй хүн шүү. Ямар ч сонгон шалгаруулалтгүйгээр сайн ах нараараа крандуулж, агентлагийн дарга болчихоод, хэт дүрдээ орж, эрх хэмжээгээ томруулахаасаа ч ичих хэрэгтэй.

Энэ мэдээнд өгөх таны үнэлгээ

Хуваалцаарай Жиргээрэй