“Оймсчин” Н.Баярсайхан, Э.Аззаяа нарыг шүүж байх үеэр Ш.Раднаасэд ОЧСОНЫ УЧИР юу вэ

Авсан авлигаа оймсондоо хийтлээ төрийн албаныхан өмхийрч, авлигачдын толгойг илтлээ  Монголын хууль ялзарсны тод жишээг МХЕГ-ын хэлтсийн дарга нарын авлигын үйлдэл тод харуулсан. Оймсондоо 10 мянган ам.доллар нууж байгаад АТГ-ынханд “гардуулсан” МХЕГ-ын Хил хорио цээрийн хэлтсийн дарга асан Н.Баярсайхан, газрын дарга Э.Амарзаяа нарын хэрэг шүүхийн шатанд нилээдгүй сунжирч байгаад өчигдөр шийдэгдлээ.

Тодруулбал, Мэргэжлийн хяналтын Ерөнхий газрын хэлтсийн  дарга Н.Баярсайхан, газрын дарга Э.Амарзаяа болон бусад хүмүүст холбогдох шүүх хурал өчигдөр Чингэлтэй дүүргийн Эрүүгийн хэргийг анхан шатны шүүхэд боллоо. Өмнө нь болсон шүүх хурлаар тэднийг “хөөн хэлэлцэх хугацаа дууссан” үндэслэлээр хэрэгсэхгүй болгосон ч олон нийтийн шахалт шаардлагаар хэргийг дахин хэлэлцэхээр болсон билээ.

Энэ удаа шүүхээс Н.Баярсайханыг хясан боогдуулах замаар хахууль авсан гэж үзээд нийтийн албанд томилогдох эрхийг 5 жилээр хасч, 2,8 жилийн хугацаатай хорих ял оногдууллаа. Харин Э.Аззаяаг нийтийн албанд томилогдох эрхийг 5 жилээр хасч, 40 сая төгрөгөөр торгох ялаар, бусад байцаагчдыг торгох ялаар шийтгэв.

Н.Баярсайхан Э.Аззаяа нар хилээр түргэн муудах хүнсний бүтээгдэхүүн оруулж ирэх зөвшөөрөл олгохдоо  аж ахуйн нэгжүүдийн хясан боогдуулах замаар НЭГ ТЭРБУМ орчим төгрөгийн хахууль авсан нь тогтоогдсон нь энэ.

Тэдний хэн хэн нь УИХ-ын гишүүн Ш.Раднаасэдтэй нэр холбогддог. Гэтэл өчигдөр /2020.09.21/ тэдэнд холбогдох хэргийг Чингэлтэй дүүргийн анхан шатны шүүх хэлэлцэхтэй давхцан УИХ-ын гишүүн Ш.Раднаасэд УИХ-ын гишүүдийн хамт Чингэлтэй, Сүхбаатар дүүргийн анхан шатны шүүх, Шүүхийн Ерөнхий зөвлөлийн үйл ажиллагаатай очиж танилцжээ. Тэнд очиж шүүхийн тухай хууль, шүүгчийн орон тоо, ажлын ачаалал, шүүхийн баталгаа, байр савны хүрэлцээ, төсөв мөнгөний талаар ярилцсан сонин тохиолдол өрнөсөн аж.

Өөртэй нь нэр холбогддог хүмүүсийг шүүж байхад эрхэм гишүүн шүүхийн үйл ажиллагаатай танилцсан эл үйл явдал яалт ч үгүй анхаарал татам, хачирхалтай үйл явдал.

Учир нь тэрээр оймсчдын ард нуугдсан оймсчдын нэг гэх ХЭРГИЙН ЦААД ЭЗНЭЭР олон нийтийн дунд зарлагдсан хүн мөн. Тиймээс шүүх дээр очсон явдал нь сонирхол татах хэмжээнд хүрч буй хэрэг.

“Оймс” Н.Баярсайханы авлигын дуулиан ид дэгдэх үеэр “Тэрбээр албан тушаалаа ашиглаж авсан хахууль болгоноосоо Ааяад тэдэн төгрөг өгсөн гэж тэмдэглэлийн дэвтэртээ тэмдэглэдэг байсан. Ш.Раднаасэдийг Ааяа гэж дууддаг” гэх зэргээр батлагдсан. Мөн УИХ-ын гишүүн Ш.Раднаасэд Н.Баярсайханы их сургуулийн нэг ангийн найз, бөгөөд анх Мэргэжлийн хяналтад оруулахад нөлөөлсөн хүн нь гэдэг нь ил болсон.

Харин Э.Аззаяа нь Ш.Раднаасэдийн удирдлага дор ажиллаж байсан. Улмаар гуйлга гуйж очсон хүмүүсийг “Э.Аззаяатай уулз” хэмээн уулзуулдаг байсан бөгөөд гол холбоосыг нь Э.Аззаяа хийдэг байсан гэх яриа байдаг. 

Тэгвэл Н.Баярсайхан, Э.Аззаяа нарыг шүүх үеэр Ш.Раднаасэд тухайн шүүхэд санамрсаргүйгээр очиж таарсан уу, зорилготой байсан уу гэдэг нь эргэлзээ болон үлдэж байна.

У.УЯН

Энэ мэдээнд өгөх таны үнэлгээ

Хуваалцаарай Жиргээрэй