У.Хүрэлсүх ба М.Энхболд: Тэрсэгч, бясалгагч хоёроос ХИНШҮҮ ҮНЭРТЭХГҮЙ, ХЭРҮҮЛ ҮҮСЭХГҮЙ ч...

“Би хувь хүнийг нь өрөвдөж байна”. Энэ бол М.Энхболдынхоо аль мууг үзэж, Ерөнхий сайдын суудалд суух үеэрээ У.Хүрэлсүхийн хөшигний ард хүрлийж хэлсэн үг гэгддэг. Тэд өнгөн дээрээ аймшигтай чангаар хагарах жүжиг тавиагүй. Х.Баттулга, Ц.Элбэгдорж нарыг бодвол нэгнээ ихэд зөөлнөөр илэнгээ алгаддаг онцлогтой улс. Хэрсүү уншигчдадаа зориулсан өчигдрийн “Х.Баттулга ба Ц.Элбэгдорж: Халширч жийрхмээр хүч бүрдүүлж, АНД ГАРАГСАД” нийтлэлийн дараа өнөөдөр У.Хүрэлсүх, М.Энхболд нарыг тоймлож байна. Тэд эвлэрсэн бас огт эвлэрээгүй агуулгыг уншаарай.

ГАНЦААРДСАН У.ХҮРЭЛСҮХ БА ЕРӨНХИЙЛӨГЧИЙН СОНГУУЛИЙН ӨМНӨХ БА ХОЙНОХ ЭРСДЭЛ

Нэг. Дүрдээ хэт орж яваад, нэг хартал мөнгөгүй, бүлэглэлгүй хоцров

МАН-ыг МАХН байх цагаас залуучуудын байгууллага удирдаж, намын жигүүр үүсгэж, генсекийн эрэмбэд хүртлээ ахин, УИХ, Засгийн газарт орж тухалж яваад  гэнэт нэг өдөр 60 тэрбумд энхрий хайрт намаа эзлэгдснийг мэдсэн хүн бол У.Хүрэлсүх. Мэдэнгүүтээ л сүх бариад шууд дайрчихсан. Буруу булхайнуудтай тэмцэнэ гэдгээ илэрхийлж, авлигач, уул уурхайчидтай ч үзэлцэхээ ил зарласан. Өөртөө үүсгэсэн энэ товьёогоороо хэсэг явсан хойноо хэрэг бишидсэнийг бас л гэнэт харсан мэт аашлах болов.

Ер нь У.Хүрэлсүх хувь хүнийхээ хувьд гэнэтийн тэсрэлт ихтэй, нээх алс хэт харна гэхээсээ ойрын зайнд их буугаар буудаж тоглодог авиртай. Ахуйн шуналгүй, том дуугаар амлалт өгчихсөн учир хүчтэй байх энэ үедээ мөнгө огт хийгээгүй ч гэлцдэг. Нэг ёсондоо Х.Баттулгын эсрэг урсгалд У.Хүрэлсүх зогсож, хий орилсоор нөмөр нөөлөгтэй бүлэглэл ч үгүй, мөнгөгүй хоцорсон нь улам бүр ойлгогдож буй. Тиймээс ч тэр нэгэн цагийн анд, нэгнээ битүү ажиглаж, туньж, отож яваа М.Энхболдыг үе үехэн ултөрийн тогоонд орж кайф авахыг зөвшөөрсөн логик харагдах болов.

Хоёр. Ерөнхийлөгчийн сонгуулийн өмнөх ба хойнох У.Хүрэлсүхийн ирээдүйд нөмөр хэрэгтэй

Сүүлийн жилүүдийн огцом өсөлт, тойрон хүрээлэгчдийн нялуун үгс, хэт вакум байдал, УИХ-ын сонгуулийн ялалт зэрэг нь У.Хүрэлсүхийг биеэ тоох өвчинд бүр мөсөн нэрвүүлсэн. Энэ жилүүдэд тэр хувь хүнийхээ хувьд их ч зүйлийг үзэж туулж, хүмүүсийн элдэв ааш, хор хорчныг харахаараа нэг боллоо. Өөрөө энэ бүхэнд давхар чанагдаж, стратегич хэмжээ рүү нүүдэл хийх болсон нь ч үнэн. Сайнтай, муутай байдлаа ард олныхоо дунд ил асгаж яваа У.Хүрэлсүх Ерөнхийлөгчийн сонгуульд нэр дэвшихээс өөр гарцгүй болтлоо “өөртөө чанагдсан”.

Гэтэл яг гараад давшъя гэвээс хүч сэлбэх хөтөлгөө морьгүй тул хуучин МАНАН бүлэглэлээ бараадаж, М.Энхболдын хүчтэй суурийг ашиглахаас өөр аргагүйд тулав. Ингэхийн тулд мандат өгөхгүйгээр “Хуулийн асуудал дээр тань аргална” гэж тулгаад гаргасан луухгар хүнээ дахин дуудаж, Д.Хаянхярваа, нэгэн цагт Т.Бадамжунайн туслах явсан Ж.Батбаясгалан нарын томилгоог найр тавьж өглөө. Ерөнхийлөгчийн сонгуулиар ялагдаж гэмээнэ, нам ч үгүй, Ерөнхий сайдын суудал ч үгүй хаягдах тул ирээдүйд гарах хуулийн эрсдлүүдээ ч тэр бодолцсон биз ээ.

БЯСАЛГАГЧ СУУРИНААС ХОЁР ТАЛД ҮНЭД ОРОГЧ М.ЭНХБОЛД

Нэг. Асар өндрөөс бууж, агуйн бясалгалд шилжигч

Бас л түүнд туулаагүй үлдсэн өндөрлөг гэж бараг үгүй. Намын дарга, хотын дарга, УИХ-ын гишүүн, Ерөнхий сайд, УИХ-ын дарга. Эцэст нь бүр нэг шуналаа барьж дийлэхгүй Ерөнхийлөгчийн сонгуульд нийгмийн уур амьсгал сөрөн байж ороод, том алдсан. Ерөнхийлөгч Х.Баттулга, АН, намынх нь гишүүдийнх маш идэвхтэйгээр М.Энхболдын эсрэг хийсэн пи-ар нөлөөгөөр үнэндээ түүнийг масс хүлээж авахаасаа нэгэнт өнгөрсөн мэт. Үзэн ядсан уур амьсгалыг хүчээр бүрдүүлэхэд бас л түүний тойрон хүрээлэгчдээсээ өөрийг сонсдоггүй, хэт вакумжсан байдал асар их нөлөө үзүүлсэн.

Нэг тийм дув дуугүй, гөв гөлгөр байж байгаад л өндрөөс буусан хүн бол М.Энхболд. Унасан биш буусан шүү. Тэр спикерийн суудлаа өгч, ордонд аглаг буйдхан эгэл гишүүний өрөөнд хоёр жил суухдаа ч тэр, У.Хүрэлсүхээс мандат авч чадаагүй үедээ ч тэр, өмнөх жил нь уралдаж байсан хурдны адууг нь эрлийз гэж хасахад ч ганц үг ган хийгээгүй. Хүчээ ингэж хуримтлуулж, бодож, агуулгын хувьд ордонд сэтгүүлчид таараад, эрхгүй мэндэлдэг тийм “хүндэлмээр” улстөрч хэвээр үлдсэн юм. Мэдээж насаараа нийтийн нэрлэдгээр улстөрд хор найруулж явсан түүний дадал амархан бөхчихгүй, ад хор нь буцалсаар яваа нь тодорхой.

Хоёр. У.Хүрэлсүхэд ч Ц.Элбэгдоржид ч тэр үнэтэй

Тэр У.Хүрэлсүхийг чанга нудрахгүй. Бас намаасаа ч холдохгүй, урвахгүй. Ийм суурь зан нь өнөөгийн У.Хүрэлсүхэд хэрэг болж, өнөөх нь ч нээх айхтар цааргалж түлхэлгүйгээр хөшигний ард хүчээ нэгтгэх асуудлыг нь хүлээцтэй сонсож, зөрүүлээд саналаа ч хэлээд буй. Гэхдээ өндрөөс бууж ирээд, хоёр жилийн турш буланд шахагдаж, чимээгүй бясалгасан хүний хар хор бас У.Хүрэлсүхийг нэг сайхан инээхэд замхраад л, сэтгэл нь цэлэмчихгүй билээ. Тиймээс ч МАНАН бүлэглэлийн гол суурийг үүсгэгч Ц.Элбэгдоржийн АН дахь нүүдлийг тэр ажиж, магадгүй тохирч суугаа.

Нэг ёсондоо М.Энхболд У.Хүрэлсүхийг айхтар хударгагүй байдлаар тонгорчихгүй ч хоёр талд ажиллах өндөр магадлалтай дүр хэвээр гэсэн үг. Сүүлийн 20 жилийн турш Т.Бадамжунай, М.Энхболд нарын бүтээж ирсэн төрийн албаны сүлжээ үнэндээ төсөөлж чадахаас хэд дахин хүчтэй. Эл логикоор М.Энхболд нэг их илчтэй дөл атгаж суугаа хүн. Тэр илчит дөлдөө хэдэн хуурай мөчир хаяхад л хүссэнээр нь гал өрдөгдөх аюултай. Салхийг тэр хааш нь эргүүлж, галыг хэн рүү ч үлээлгэх эрсдэлтэй. Тэгэхээр намдаа хайртай, нөхдөө хаядаггүй суурь занд нь У.Хүрэлсүх итгэхээс аргагүй  болсон гэлтэй.

ДҮГНЭЛТИЙН ОРОНД: АН талдаа Х.Баттулга, Ц.Элбэгдорж нар ил гар барьж, араараа айхтар эвсэж аюултай их хүчээр Ерөнхийлөгчийн сонгуульд орох нь үндсэндээ тодорхой болсон. Тэдний эвсэл хэн хэнийх нь улс төр, ирээдүйд ихээхэн ашигтай. Тэгвэл У.Хүрэлсүх, М.Энхболд нарын нэгдэл хэн хэнд нь асар өндөр ашигтай байж чадах уу. Нэг нь унавал нөгөө нь хэрхэн аашлах уу гэдэг бас л сонин асуудал. У.Хүрэлсүх ч, М.Энхболд ч хаан заан шиг авирлаж, засаглаж явсан, яваа түүхээсээ холдохыг хүсэхгүй. Улстөрд мөнхийн дайсан, найз байдаггүйн үлгэрээр тэд гар барих нь тодорхой болжээ. Гол нь тэд хэр хүчтэй байх уу, яг жинхэнээсээ нэгдэх үү гэдэг нь л асуудал юм. Айхтар их жихүүцэм хүч гэхээсээ илүү тэдэнд МАН-ын нэг тийм нэгддэг цул хүч л гол түшиг болох биз ээ. Тэрсэгч, бясалгагч хоёроос хиншүү үнэртэхгүй, хэрүүл гарахгүй ч...

Өмнөх контент:

“Х.Баттулга ба Ц.Элбэгдорж: Халширч жийрхмээр хүч бүрдүүлж, АНД ГАРАГСАД” тоймыг ЭНД ДАРЖ уншаарай.

Энэ мэдээнд өгөх таны үнэлгээ

Хуваалцаарай Жиргээрэй