ТОДРУУЛГА: Гар ариутгагч авсан хүн СӨХ-өөс уучлал гуйжээ

Сүүлийн хоёр өдөр олон нийтийн сошиал сүлжээ, болон цахимаар лифтний гар ариутгагч авч буй иргэний бичлэг түгж, иргэдийг талцуулаад байна. Зарим хэсэг нь тухайн иргэнийг орцны жижүүр байсан гэх бөгөөд өөрийн байршуулсан гар ариутгагч шингэнээс тасдаж, хоосон саванд хувааж хийсэн гэх. Харин нөгөө хэсэгт нь гэрийнхээ хаалганы бариулыг ариутгахаар гар ариутгагчаас авсан нь дэлгэгдэж, СӨХ-өөс уучлал хүссэн гэх. Тухайн байрны оршин суугч М энэ тухай:

"Гар ариутгагчийг өөрөө байршуулсан, коридорт нэмсэн гээд байгаа нь бүгд худлаа. Энэ бичлэгийг анх тавьсан байрны групп-д би байдаг юм. Тухайн орой юу болсон бэ гэхээр тус оршин суугч СӨХ-өөс уучлал хүсэж, буруугаа хүлээсэн бичлэг оруулаад, хуучин бичлэгийг устгуулсан ч нэгэнт гадуур тарсан учир яах аргагүй байдалд орсон. Гэвч тухайн иргэний уучлал хүссэн бичлэгийг хэн ч тараагаагүй ийм л зүйл болсон. Уучлал хүссэн бичлэг нь ч төд удалгүй устсан” гэв.

Иймд бид Баянмонгол хорооллын СӨХ-тэй холбогдож зарим зүйлийг тодрууллаа.

-Танай хотхоны группд гар ариутгагч авч буй ахын бичлэг тавигдсан байсан. Интернэт орчинд буруу, зөрүү олон мэдээлэл яваад байх шиг байна?

-Харин тийм. Буруу л мэдээллүүд яваад байна.

-СӨХ анх энэ бичлэгийг задлав уу. Энэ ахыг орцны жижүүр байсан гэх юм?

-СӨХ-өөс задлаагүй. Одоо тэгээд бичлэг устах байлгүй дээ. Байр жижүүргүй. Үйлчлэгчид ээлжлээд л ажиллаж байна.

-Тухайн ахыг өөрийнхөө байршуулсан шингэнээс авч, орцонд хувааж хийсэн гэх мэдээлэл цацагдлаа?

-Хүн өөрийгөө өмгөөлвөл өмгөөлөөд л явна шүү дээ. Тухайн хүн уучлал гуйсан. Тиймээс нэг их ач холбогдол өгөх шаардлагагүй гэж бодож байна.

Энэ мэдээнд өгөх таны үнэлгээ

Хуваалцаарай Жиргээрэй