Б.Навчаа: Х.Нямбаатарын нэрийг фэйсбүүктээ дахиад бичвэл баривчилна, хорино гэж намайг сүрдүүлсэн

Жүжигчин Б.Навчаа Эрүүгийн хуулийн 12.5 дугаар заалтын талаар цахим хуудсандаа үзэл бодлоо илэрхийлснийх нь төлөө ХЗДХ-ийн сайд Х.Нямбаатар хуулийн байгууллагад гомдол гаргасан гэнэ.

Улмаар прокуророос өчигдөр түүнд яллах дүгнэлт үйлдсэн талаар Б.Навчаа цахим хуудсаараа дамжуулан мэдэгдсэн юм. Энэ талаар түүнээс  тодрууллаа.

БИ ХУУЛИЙН ТАЛААР Л БОДЛОО БИЧСЭН БОЛОХООС Х.НЯМБААТАРЫГ ШҮҮМЖЛЭЭГҮЙ

-Х.Нямбаатар сайд яг ямар үндэслэл, шалтгаанаар таныг шүүхэд өгч, шалгуулж байгаа вэ?

-Ер нь юу болсон талаар өнөөдөр би цахим хуудсандаа бичсэн. Тэндээс ерөнхий мэдээлэл авсан байх. Хуулийн байгууллагаас намайг “Илт худал мэдээлэл тараасан” гэсэн үндэслэлээр шалгаж байгаа. Би энэ талаар ямар нэгэн хэвлэл мэдээллийн хэрэгслээр яриагүй. Сонин, сайтад нийтлэл бичээгүй. Цахим хуудсандаа үзэл бодлоо л илэрхийлсэн төдий. Фэйсбүүк бол хүний хувийн орон зай. Монгол Улсын иргэн хүн үзэл, бодлоо чөлөөтэй илэрхийлэх эрхтэй. Би энэ эрхээ эдлэхдээ огт худал мэдээлэл бичиж, хүмүүст ташаа мэдээлэл тараагаагүй.

Х.Нямбаатар сайдын ахалсан ажлын хэсгийн баталсан Эрүүгийн хуулийн 12.5 заалтын талаар хүмүүс одоо ч шүүмжлэлтэй ханддаг. 14-16 насны охидод бэлгийн дарамт үзүүлсэн гэмт этгээд торгуулаад өнгөрөх боломж олгосон гэж хүмүүс шүүмжилдэг. Үүнтэй би санал нийлдэг. Насанд хүрээгүй охидыг хүчирхийлж болно гэж байгаатай агаар нэг санагдсан. Энэ бол миний бодол. Ингэж бодонгуутаа би фэйсбүүктээ шууд бичээгүй. Энэ хуулийн тухай, 12.5 дугаар заалтын тухай хэд хэдэн хуульчаас тодруулсан. Тэгж байгаад пост оруулсан юм шүү.

Ажлын хэсгийг нь Х.Нямбаатар ахлаад баталсан нь үнэн. Энэ хуулийг иргэд одоо ч эсэргүүцэж, шүүмжлэлтэй хандаж буй нь анзаарагддаг. Эсэргүүцсэн, өөрийнх нь талаар пост оруулсан хүн бүхнийг хуулийн байгууллагад шалгуулах юм уу, Х.Нямбаатар аа. Тэгээд ч би Эрүүгийн хуулийн 12.5 дугаар заалтад шүүмжлэлтэй хандаж буйгаа л илэрхийлсэн болохооС түүнийг шүүмжлээгүй. Үүнд Х.Нямбаатар яагаад эмзэглэж, гомдол гаргасныг нь гайхаж байна.

-Таны сая ярьснаас харахад гомдол гаргасан үндэслэл нь ойлгомжгүй, тодорхой бус санагдлаа. Тэгэхээр таныг яг ямар үндэслэлээр буруутгасан гэсэн үг вэ?

-Би худал мэдээлэл тараагаагүй юм чинь буруутгах шалтгаан хайх хэрэг гарна аа даа. “Илт худал мэдээлэл тараасан. Хуулиа судлаагүй” гэж намайг буруутгаж байна. Ямар ч тодорхой бус, бөөрөнхий үндэслэл байгаа биз. Тийм атал хуулийн байгууллагынхан “Хэрэг үүсгэх хангалттай нотолгоо, баримт бий” гэж байна. Би хуульч, сэтгүүлч хүн биш. “Би зөвхөн фэйсбүүктээ үзэл бодлоо илэрхийлсэн. Ямар ч худал мэдээлэл тарааж, Х.Нямбаатарын нэр хүндэд халдаагүй” гэж тайлбарлаад нэмэр болоогүй, огт хүлээж аваагүй.

Би охинтой хүн. Ийм хууль батлагдсан нь би эмзэглэсэн. Үүнийгээ цахим хуудсандаа илэрхийлснийхээ төлөө яагаад буруутан болж, дарамтлуулах ёстой гэж. Х.Нямбаатар намайг хуулийн байгууллагад өгснөөс нь хойш өнөөг хүртэл дарамтанд явна.

ЦАГДААГИЙН АХМАД Н.САЙНБАЯР САЙДАА ӨМӨӨРЧ, НАМАЙГ ДАРАМТАЛСАН

-Таныг яаж дарамталж байна бэ?

-“Нямбаатар сайдын нэрийг цахим хуудсандаа дахиад бичих л юм бол баривчилна, хорино. 461 дүгээр анги руу ачна” шүү гэж үргэлж сүрдүүлдэг.

-Хэн?

-Чингэлтэй дүүрэг дэх Цагдаагийн газрын нэгдүгээр хэлтсийн Мөрдөн байцаах тасгийн ахлагч, цагдаагийн ахмад Н.Сайнбаяр. Шууд тэгж хэлэхээр хүн айдаг юм билээ. “Нээрэн намайг баривчилбал, хорьбол яана аа” гэж айсан. Тэгээд л юу ч дуугаралгүй, чимээгүй явсаар өнөөдрийг хүрсэн юм шүү.

Хууль, прокурорын байгууллагынхан сайдыгаа өмөөрөхийн тулд ажилладаггүй байлтай. Хуулийг сахин биелүүлж, шударга, үнэнийг тогтоох нь тэдний үүрэг шүү дээ. Фэйсбүүктээ нийтлэсэн постыг үндэслэн буруутгачихаад, сайдыгаа өмөөрөхийн тулд жирийн иргэнийг сүрдүүлж суух нь шударга, ариун явдал биш байлтай.

ПРОКУРОРООС ХЭРЭГСЭХГҮЙ БОЛГОСОН Ч Х.НЯМБААТАР НАМАЙГ ДАХИН ШҮҮХЭД ӨГСӨН

-Энэ хэргийг прокуророос наймдугаар сард хэрэгсэхгүй болгосон юм билээ. Х.Нямбаатар сайд дахиад гомдол гаргасан юм уу?

-Тэгсэн. Өнгөрсөн наймдугаар сард Чимгээ гэдэг прокурор энэ хэргийг хэрэгсэхгүй болгосон. Угаасаа хэн нэгнийг гүтгээгүй, худал мэдээлэл тараагаагүй юм чинь тэгж шийдвэрлэхээс яах вэ дээ. Тэгэнгүүт Х.Нямбаатар намайг дахиад шүүхэд өгсөн. Буруу шалгасан байна гэсэн юм уу, яасан юм бэ, бүү мэд.

-Яллах дүгнэлтийг тань арваннэгдүгээр сарын 18-нд үйлдсэн байна лээ. Та яагаад өнөөдөр хүлээж авсан бэ?

-Өнгөрсөн сарын 18-нд үйлдсэн нь үнэн. Тухайн үед Монгол Улсад хөл хорио тогтоочихсон байсан. Хүлээж авах боломж надад байгаагүй. Тийм учраас хойшлуулаад, өнөөдөр хүлээж авлаа.

ЯЛЛАХ ДҮГНЭЛТИЙГ НЬ ӨНӨӨДӨР АВЛАА

-Та түрүүн “Х.Нямбаатар сайдын нэрийг фэйсбүүктээ дахин нийтэлбэл баривчилна, хорино” гэж сүрдүүлсэн” гэж хэлсэн. Өнөөдөр (өчигдөр) та энэ талаар цахим хуудсандаа нийтэлсэн нь танаас ихээхэн зориг шаардсан нь мэдээж. Гэнэт өнөөдөр (өчигдөр) ийм эрсдэлтэй алхам хийхэд юу нөлөөлөв?

-Яллах дүгнэлтээ авсны дараа “Буруу юм хийгээгүй байж би яагаад ингэж явах ёстой гэж” хэмээн бодогдсон. Тэгээд энэ талаар зоригтой бичлээ. Ийм асуудлаар намайг шалгаж байгаад хүмүүс их гайхаж, шүүмжилж байна лээ.

-Гэнэт ийм шийдвэр гаргахад нөлөөлсөн өөр хүчин зүйл бий юү?

-Байхгүй.

НАДАД ӨӨР ЯМАР НЭГЭН ЗОРИЛГО БАЙХГҮЙ

-Эрүүгийн хуульд жилийн өмнө нэмэлт өөрчлөлтөөр оруулсан 13.14 “Худал мэдээ тараах” заалтыг одоо дахин өөрчилж, 80 хүртэлх сая төгрөгийн торгуультай, 5 хүртэлх жилийн ялтай болгоод зогсохгүй фэйсбүүк, твиттер, бусад сүлжээнд иргэд шэйрлэсэн тохиолдолд бас буруудах хуулийн төслийг санаачлаад буй. Үүнд нийгэм даяар гайхан, Х.Нямбаатар сайдыг шүүмжилж буй. Яг ийм үед та энэ талаар дэлгэсэн нь нэг талаар кейс боллоо. Таныг өмөөрөх хэсэг байхад Х.Нямбаатар сайдыг харлуулах, массыг өөр тийш нь чиглүүлэх гэсэн оролдлого гэж хардах хүн ч байна. Тийм зорилгогүй гэдгээ та яаж батлах вэ?

-Фэйсбүүктээ нийтлэсэн постноосоо болж хуулийн байгууллагад шалгуулж, дарамтлуулж байгаа би дахиад асуудалд орооцолдохыг хүсэх үү. Яасан гэж худлаа хэлэх билээ. Үнэхээр аргаа бараад, сандарсандаа л өнөөдөр тийм пост оруулсан. Өөр ямар нэгэн зорилго, санаа байхгүй шүү.

-Та өмгөөлөгч авсан уу?

-Авсан, авсан. Өмгөөлөгчгүй бол барахгүй. Аягүй муухай мушгиж асуудаг юм байна лээ.

ҮЗЭЛ БОДЛОО ИЛЭРХИЙЛСНИЙХ НЬ ТӨЛӨӨ ӨӨР ХЭН НЭГНИЙН БУРУУТГАХГҮЙ ГЭХ БАТАЛГАА АЛГА

-Х.Нямбаатар сайдтай уулзсан уу. Энэ талаар ярилцах бодол бий юү?

-Би тэрийг мэдэхгүй, таних ч үгүй. Таних ч албагүй. Прокурорын байгууллага надад яллах дүгнэлт үйлдсэн тул шүүхээр явах нь тодорхой боллоо. Өнөөдөр Монголын цагдаа, прокурор Нямбаатарын талд ажиллалаа. Маргааш намайг Чингэлтэй дүүргийн шүүх дээр дуудсан.

-Та очих уу?

-Очно оо. Өнөөдөр надад тохиолдсон энэ зүйл Монголын бусад иргэдэд тохиолдохгүй гэх баталгаа алга. Маргааш өөр нэг иргэнийг фэйсбүүктээ пост оруулсны төлөө, хэн нэгэн улс төрчийг, сайд, даргыг шүүмжилснийх нь төлөө хуулийн хариуцлага хүлээлгэвэл яах вэ. Олон сар хуулийн байгууллагад шалгуулаад ирэхээр хүссэн, хүсээгүй хууль судлах шаардлагатай болдог юм байна.

Одоо батлах гэж буй Эрүүгийн хуулийн 13.14 “Худал мэдээ тараах” заалт зөвхөн хэвлэл  мэдээллийн байгууллага, сэтгүүлчдэд хамаатай бус. Монгол хүн бүхэнд хамаатай. Нэг сайт худал мэдээ тараалаа гэж бодъё. Баримтаа дутуу нягталснаас болж, санаандгүй тараасан ч байж болно шүү дээ. Тухайн мэдээг хэн нэгэн фэйсбүүктээ шэйрлэсэн тохиолдолд буруудна, хуулийн хариуцлага хүлээнэ. Бүр 80 хүртэлх сая төгрөгийн торгуультай, тав хүртэлх жилийн ялтай болгосон гээд бод доо.

Монгол Улсын иргэн өөрийнхөө үзэл бодлыг чөлөөтэй илэрхийлэх эрхтэй. Энэ үндсэн эрхийг нь ноцтой зөрчиж, энэ эрхэд нь халдаж буй үйлдэл биш гэж үү. Үзэл бодлоо илэрхийлснийхээ төлөө өөр хэн нэгэн битгий ингэж хуулийн байгууллагад шалгуулж, буруутан болоосой.

Энэ мэдээнд өгөх таны үнэлгээ

Хуваалцаарай Жиргээрэй