Израильд “КОВИД-19”-ийн эсрэг 100 хувь үр дүнтэй эм бүтээжээ

Тель Авив хотын Ичилов Эрүүл мэндийн төв бүтээсэн коронавирусийн эсрэг эмийн нэгдүгээр шатны туршилт амжилттай явагдаж дуусжээ. Тус эмийг EXO-CD24 гэж нэрлэсэн бөгөөд “КОВИД-19”-ийн дунд зэргийн хүндрэлтэй болон ноцтой хэлбэрээр өвчилсөн хүмүүсийг түргэн эдгэрэхэд тусалсан байна.

EXO-CD24 эмийг дунд зэргийн болон түүнээс муу хүндрэлтэй 30 өвчтөнд өгөхөд бүгд эдгэрсэн байна. Өвчтөнүүдийн 29 нь гурваас таван өдрийн дотор эдгэсэн аж. Тус эмийг Ичилов төвийн Надир Арбар бүтээсэн юм.

Энэ эм цитохин гэх бодис удирдлагагүй их хэмжээгээр ялгарахаас хамгаалдаг аж. “КОВИД-19”-ийн ихэнх нас баралт энэ цитохины ялгаралтын улмаас болсон хэмээн үздэг. EXO-CD24 нь экзосом (эс хооронд бодис зөөвөрлөдөг бичил цэврүү) ашиглан уушги руу CD-24 нэртэй уургийг оруулдаг юм. Ноён Арбарын лабораторид ажилладаг Ширан Шапира хэлэхдээ “Энэ уураг эсүүдийн гадаргууд байдаг бөгөөд дархлааны тогтолцоог зохицуулахад чухал үүрэг гүйцэтгэдэг” хэмээжээ.

Тус уураг нь дархлааны системийг “тайвшруулж” цитохиний ялгаралтыг багасгах үйлчилгээтэй юм.

Доктор Арбар “Энэ эмийг өдөрт нэг удаа хэдэн минутын турш амьсгалж ашигладаг. Тус эм цитохин их хэмжээгээр ялгарч байгаа төв буюу уушги руу шууд очдогоороо бусад эмнээс ялгаатай. Бусад эмнүүд тодорхой цитохинийг сонгон авч саатуулдаг ч олон тооны ноцтой гаж нөлөө үзүүлдэг. Харин EXO-CD24 нь ямар нэгэн гаж нөлөөгүй үйлчилдэг юм” гэсэн юм.

Одоо тус эмийг клиникийн туршилтын дараагийн шатуудаар оруулах болно.

Эх сурвалж: Times of Israel

Б.БУЯНДОРЖ

Энэ мэдээнд өгөх таны үнэлгээ

Хуваалцаарай Жиргээрэй