Сандарсан, бясалгасан хоёр

Ерөнхийлөгчийн сонгууль товлолт хугацаа ойртох тусам Х.Баттулга, У.Хүрэлсүх гэсэн хоёр хүн олон нийтийн дундах сонирхолтой дүрүүдээр нэрлэгдэх болов. Энэ өдрүүдэд гаргаж буй тэдний үйлдэл, зан характер, элдэв төрлийн уулзалтуудыг олон нийт ихээхэн анхааралтай ажиглаж буй. Ерөнхийлөгч Х.Баттулгын хувьд ҮХЦ дээр ойрын өдрүүдэд ихээхэн анхаарал хандуулж буй бол У.Хүрэлсүх нам дээрээ төвлөрөн ажиллаж буй юм.

ТЭД ЗОДООН ХИЙСНЭЭСЭЭ ХОЙШ ДАХИН НЭГ УДАА УУЛЗЖЭЭ

Ерөнхий сайдын суудлаас У.Хүрэлсүхийг буусны дараа хэдэн өдрийн турш Ерөнхийлөгч Х.Баттулга шоктой байсан гэгдсэн. Тэр шокны гол шалтгаан нь тэд Ерөнхий сайдын өрөөнд зодолдсон асуудал болж таарав. Ерөнхийлөгч чуулганаар У.Хүрэлсүхийг Засгийн тэргүүнээс чөлөөлдөг орой ҮАБЗ-ийн  шуурхай хуралдаан зарласан. Гэвчиг өнөө хоёр нь орж ирээгүй тул чуулганы танхимд өөрөө орж ирж, үг хэлээд гарсан билээ.

Индрээс буухдаа нэг их эвгүй харц шидэлцсэн хоёр Ерөнхий сайдын өрөөнд нэгнийхээ хөл рүү өшиглөж, нүдэн тус газар нь буулгалцсан нь үнэн аж. Тухайн үед өрөөнд нь байсан хүмүүс тэднийг салгаагүй бол ширүүхэн зодоон болох нөхцөл байдал үүсч, зөвлөхүүд нь сандарсан  байна.Уг  зодооныг  хоёр талаасаа ихэд нууцалж өнгөрүүлээд, саяхан дахин нэг уулзалт зохион байгуулжээ. Уулзалтаар юу яригдсан нь тодорхойгүй байгаа ч эрх биш тэд нүүрэндээ сорвигүй салцгаасан байна.

-У.ХҮРЭЛСҮХ “БЯСАЛГАГЧ” ДҮРД ШИЛЖИЖ, ИЛ ГАРЧ ИРЭХЭЭ БАЙВ-

Ерөнхий сайдын албаа өгснөөс хойш У.Хүрэлсүх олны нүдэнд ил гарч ирсэнгүй. Сар шинийн маш  хөнгөн мэндчилгээ дэвшүүлээд л өнгөрлөө. Харин МАН-ын зүгээс Ерөнхийлөгчийн сонгуульд анхаарах ажлаа асар сайн эрчимжүүлсэн. Тэд ер их зүтгэл гаргаж, ХҮН, МАХН-ыг С.Эрдэнийн АН дахь жигүүрийг үндсэндээ худалдаад авчихлаа. Сонгинохайрхан дүүргийн нөхөн сонгууль тойрсон бэрхшээлээ хүртэл өөрсдөдөө ашигтай хувилбараар шийдэж чадлаа.

МАН-ын дүрмийн хүрээнд намын даргын суудал Л.Оюун-Эрдэнэд шилжих учиртай ч У.Хүрэлсүхийг тойрон хүрээлэгчид “Дарга аа, та сонгуульд шүдгүй арслан хэлбэрээр орж  хэрэггүй. Их хурлаа сонгуулийн дараа хуралдуулж, суудлаа өг” гэж ятгасаар товлосон хурлаас нь буцуулжээ. Тэрбээр эдүгээ нэг л өдөр “Би ард түмнийхээ төлөө үхэхэээс айхгүй байна” гэх алдарт ишлээ хэлж, Ерөнхийлөгчийн сонгуульд дэвшихээ зарлах эгзэгтэй үеийг далдаас отож сууна. Тэр бясалгаад байгаа мэт боловч үнэндээ гол дүрээс сарничих вий гэх их айдастай  суугаа нь ч тодорхой юм.

-ЕРӨНХИЙЛӨГЧИЙН ЦЭЦ ДЭЭРХ САНДРАЛ ЭЦЭСТ НЬ ИЛ ГАРАВ-

Ерөнхийлөгч Үндсэн хуулийн цэц дээр чухам ямар тоглолт хийх нь бүр 2019 оны арванхоёрдугаар сараас хойш сонирхол татсан. ШЕЗ-ийн төлөөлөл болсон цэцийн хоёр гишүүний бүрэн эрхийн хугацаа дуусч,түүний орны томилгоог хэрхэн хийхээс хамаарч, Х.Баттулга нэр дэвших эрхээ авах эсэх хувь заяа шийдэгдэхээр харагдаж байсан.

Гэвчиг ил асуудал саяхнаас ил болов. Яг таамагласанчлан, иргэний нэрээр Х.Баттулгыг нэр двэших эрхгүй асуудлаар ҮХЦ-д гомдол ирж, тэр дагуу Ерөнхийлөгч очиж тайлбараа хийв. Тэрбээр ер их дотоод зөрчилтэй, сандарсан хүн гаднаа үглээд л явдаг төрх үзүүлж, өөрөө намба алдсан үйлдэл хэд хэдийг угсран хийлээ. Хөшигний ард ҮХЦ-ийн гишүүдийг толгой дараалан лоббидох ажлаа нэлээд рэтнээс хийж, дараа нь дуудаж уулзаж, өөрөө очих үйлдлүүдийг ил хийсэн талаарх яриа хөвөрч байна.

ТЭМДЭГЛЭЛ: Саяхныг болтол У.Хүрэлсүх ч тэр, Х.Баттулга ч тэр, нэг их дүрдээ орж, албан тушаал, эрх мэдэл мөнхийн байх юм шиг санаж, чөлөөт зах зээлээ хүртэл төрийн хараат болгох агуулга ярьж, хавьтсан бүхэн рүүгээ хөмсөг зангидаж явсан. Тэгвэл ердөө гурван сар гаруйхны дараа тэдний нэг нь төрийн тэргүүний суудалд заларч, нөгөө нь иргэний эрх ямбаа эдлэхээр хүлээгдэж байна. Төмөр зам, сайд нарын тохироо, тэргүүтэй олон асуудал дээр хачин сайхан эв түнжинтэй явсан улс биенийхээ нүүрэн дундуур буулгаад авах хэмжээнд холдож, улстөрөө өөр өөрсдийнхөөрөө нэгнийхээ эсрэг хийхээр салцгаасан нь энэ. Төрийн тэргүүн, Ерөнхий сайдын суудал дээрх тэднийг нэгтгэж байсан эрх ашиг эдүгээ сарниж, хэн нь Ерөнхийлөгч болох вэ гэдэг ганцхан асуулт дээр төвлөрч, тус тусдаа зангирцгааж сууна.

Энэ мэдээнд өгөх таны үнэлгээ

Хуваалцаарай Жиргээрэй